شعر وأدب Poem and Arts

edit

مـأســـــاة بحـــــر البقـــــر

(8 إبريل 1970)

دكتور جيولوجي عبد العاطى سالمان


الله أكـبـر.. الفـجـر أذن... الـلــه أكــبـــر

قومى ياخضــرة ... عـشــان نصــــلى

وخـاضـــرة تسمـع ... كـلام عــويــس

وتقــوم مـعـاه ... وتقـــــول وراه

نويت أصلى... الصبـح حــاضر... اللـه أكـبر

عـويس وخـاضرة .... فـلاح وزوجتــــه

عـــايشين حياتهـم .... بقـريـة هاديــة

عيشـة سعيـدة .... باحمـد.. وفـاطـمـــة

أمـل حيـاتهم... يبقـى ولادهـم ... أحسن دكاترة

*****

بعد الــســـــــلام... ختــموا الــصــلاة

وعــويس يقول .... يــالــه يـــاحلـوه

صــحى الولاد .... وفــطـريـهــــم

أمــا آنـا رايــح.... لحد غيطنــــا

أروى الـزراعـه ... دى الميــه جــاتنــا

وأجـيب مـعايـا... قـرنيـــن حـراتــــى

نتغــدى بيـهـــم ويــا الـــــولاد

*****

وخــاضرة قـالت .... الـوقت بــدرى

خلـى الـجـبـايب .... نايمـين شــوية

وهـى راحــت .... للبقــرة جـــوه

تحـلب لبنهــا .... فـــى فخــرتها

وبعـد سـاعة .... الصبـح نــــــور

والأم نـادت .... لأحمــد وفـاطمـة

قـوم.. يا حمـادة ..... يـاحلـو.. ياسـمر

وأنـت يا قـطــة .... يالـه يا سكر

*****

أحمـد وفاطمــة .... لبسـوا هدومهـم

سـت الحبـايب  .... جـابت فطــورهم

بــإيديـن حـنـونة .... وأكلــــــتهم

وبــرمـش عينهـا .... وســـرحتهم

*****

وباسـت أحمـد.. وأختـه فاطـمـة.. وودعتــــــهم

بعـد الوصـايا .... يـاولاد ضـــرورى.. تخلى بالكم

ومـاتغيبوش.. بعـد الخـــروج.. مــــن مـدرستكم

حــاضر يـأمى .... وخــدوا كتبـهم.. وكـراستهم

*****

خـرج الـولاد لمـدرستهـم... زى الزهــــــور

اليـوم كـان أربـع.. والجـو صــافى.. والــدنيا نـور

دق الجـــــرس .... دخلـــوا فصولهم ماشيين طابور

وجـــه المــدرس.. أسمر بلون النيل.. واسمـه عــاشور

*****

بــدأ التــلامذه ...  درس الصــبـــــاح

بقلوب بـريئة..وعيـون جميـلة .. لـون الصبـاح

وعاشور أفندى.. يشرح ويسأل .. بعــد الإيضــاح

فجـأة .. رعـد .. بــارود .. والـدم ســاح

*****

أتـارى كـان فى السمـا... فــانتوم سـايقها جبـان

بـص فـى خريطتة .. شـاف الهـدف .. مدرسة

بحـر البقـر .. أضـرب.. بأمـر ديـــان

وصـب ظلم الجبابرة .... شيطان فى ثوب أنسان

ثمانية ابريل.. بحر البقر .. صبحت وليمة للذئاب

بصــوا ياعالـم .. سبعين ملاك تحت الـتراب

حاضنين آلامهم.. وأحلامـهـم.. طـواها كتـاب

والـدم لون كرارسهم.. وأناتهم.. عـذاب فى عذاب

*****

وجرى الجميع.. للمدرسة.. صــوب الأنــين

وبسـرعة راحوا.. يـرفعوا.. الطـوب الحـزين

من فوق ولادهــم.. وفـى عيـونـهم.. ألم ملايين

لموا جثث أطفال.. فى عمر الزهر.. لـسه صغيرين

*****

عويس وخاضره.. واهـل البـلد.. حملوا الـولاد

قلوب كثيرة.. كانت معاهم.. تقدر تقول.. كل العباد

مشهـد رهيب.. شافوا الحجر.. من رهبتة.. أصبح رماد

ومــع الهـــدير .. دفنــوا الولاد.. والكل عاد

*****

وبصوت حزين.... زى أنـات الـرباب

خاضرة تقول : أحـسن دكـاترة.. فى التراب

وعويس يقول:خاضرة .. إنت فاكره إن ده.. يبقى تراب

ده مـش تــراب .... دى أرضنــــــــا

دى حتــه مـن روحنـا .... دى هيه قلبنـــا

فيهـا اتــولد... أجـــــداد  لنـــــــا

ناس من العظام .... واللا انتي ناسية.. أصلنا

*****

عشـان كـده.. مايهمناش.. مـوت الولاد أو الدمار

بـدام فدى.. شرف البـلاد.. وبيمـحى عـــار

قومى ياخاضرة.. بلاش بكى.. عايزين نجيب الإنتصار

وحياة بلادى.. وحياة ولادى.. على الصهاينة.. لاشعلها نار

*****

حاضرب بــفأسى.. فــى الأرض وأهــزها

وأرويها مـن نيـلنا.. وأكــــبر زرعهــــا

وأبعـت حصـادهــا ..... للـــــــرجال

اللـى علـى.. شـــط القنــال.. بيحمـوا عزها

*****

أما آنا.. راح آكــل بملـح.. وانسي المــرق

مايهمنيش.. إن كنت مكسى.. والا لبسى.. م الخرق

كل اللى عايزه.. نجيب سلاح .. نــعـمل سبق

فى عبور جيوشنا للقنال .. والنار مغطية الأفق

*****

ونحـررك.. يـا أرض سينــاء.. م اللئــام

ونلبسك ثــوب الانتصار.. ونـورك.. بعـد الظلام

ترجـع.. فلسطـــين.. الحبيبـة.. لأهلهــــا

والطيـر يغنــى.. للســـــــــــــلام

 

عــاد السـلام ..... ليكم يا أحباب الســـلام 

ملاحظة: هذا الرابط يحتوي  علي الصور البشعة التي توضح تفاصيل المجزرة:

 

absalman

دكتور / عبدالعاطي بدر سالمان جيولوجي استشاري، مصر [email protected]

  • Currently 1/5 Stars.
  • 1 2 3 4 5
1 تصويتات / 146 مشاهدة

نعي شهداء مذبحة الكميــــن

(شهداء رفح يوم السبت 17 رمضان 1433 الموافق 5 أغسطس 2012)



أنعيكوا يا خير الرجال *** أنعيكوا شهـــــداء الكميـــــــن
كانت عيونكم ساهـــــــرة *** علي المعاـــبر في الكمــــــــين
ساعة الفطار ومع الأذان *** أخذتوا غدر، من أسافل، مجرمين
ملهمش ملة ولا هويــة *** ملثمين،، ملهمش ديـــــــــــن

الشعب كله راجل وست *** ولد وبنت ،، مكلوميـــــــن
ملي حصل لولاد بلدنا *** خيرة شبابنــــــا ،، في الكميـــــــن 
بس عزاءنا إنكم نلتوا الشهادة *** في شهررمضان الكريم
شعب وجيش ،، حمل نعوشهم *** في موكب الشرف الحزين

وحياة بلادنا ،، وحياة ولادنا ،، إللي دمهم ســال في الكميــــــن
ما تنام عيونا، والتار حنخده *** من الذيول والمجرمين 
يا جيش بلدنا،، وأمنهــــا *** إحنا معاكم أهل مصر،، الطيبين
لازم نجيب حق الرجال *** ونرد كيد الظالمين المعتدين

 

absalman

دكتور / عبدالعاطي بدر سالمان جيولوجي استشاري، مصر [email protected]

  • Currently 0/5 Stars.
  • 1 2 3 4 5
0 تصويتات / 261 مشاهدة

 

مصر المحروسة

اشتقت ليكي يا مصر  وانتي بتضحــــكي

فين بسمتك ،،، فين رقتك ،،، فينك يا قلبي

وفين طعامة ضحكتك

وفين براءة بسمتك

 

سرقوها منك،،، همه مين؟

سرقوها منك حاقدين

سرقوها منك حاسدين

سرقوها منك مغلولين

 

لا تزعلي ،، يا مصر ،، يا ام الصابرين

لن تهزمي ،، لن تقهري،، أبدا ورب العالمين

فيك الجوامع ،، فيك الكنايس،، فيكك الازهر والحسين

فيكي  الشباب ،،  فيك الرجال المخلصين

 

بس اصبري ،،  ولا تضجري

البسمة جاية ،، والفرحة جاية

رغم أنف الحاقدين

من خواطري في حب مصر

عبدالعاطي سالمان

 

absalman

دكتور / عبدالعاطي بدر سالمان جيولوجي استشاري، مصر [email protected]

  • Currently 0/5 Stars.
  • 1 2 3 4 5
0 تصويتات / 193 مشاهدة
نشرت فى 22 يونيو 2012 بواسطة absalman

<!--<!--<!--

إنسوا التورته

 

إنسوا التورتة ...... يا ولاد مصـــر

ياللي رفعتوا .....  رايات النصــــــــــر

شوفوا شهدائكم ،،، إللي ضحوا عشان النصر

شوفوا شبابكم،،،،، إللي اتصابوا،،،، عشان العزة ترجع مصر

جابوا حرية ،،، جابوا كرامة،،، زرعوا العدل في أرض النصر

إنسوا التورته ،،، وضموا صفوفكم

إنسوا التورته ونقوا قلوبكم

إنسوا التورتة وخلي هدفكم : وحدة ،، وجهد ،، لرفعة مصر

 عبدالعاطي سالمان

absalman

دكتور / عبدالعاطي بدر سالمان جيولوجي استشاري، مصر [email protected]

  • Currently 45/5 Stars.
  • 1 2 3 4 5
13 تصويتات / 333 مشاهدة

دكتور: عبدالعاطي بدر سالمان

absalman
Nuclear Education Geology & Development »

ابحث

تسجيل الدخول

عدد زيارات الموقع

965,251