س
سألته:ناقصك ايه يا عصفور بقه
قاللى وحزنه خانق الزقزقة :
أفتح بمنقارى القفص وانطلق
زى الفراشة الخارجة م الشرنقة !
-----------
ساعات خيالى بيبقى لا معقول
بس لمشاكلنا بيلقى حلول
صور لى عضو البرلمان الجديد
له إيد وحيدة وميت لسان بيقول !
----------
سر جمالها فى "الحَوَر" و "الَّلما"
ومش فى كونها فذة أو مُلْهَمة
ناقشوا قانون المرأة فى ضوء كدا
وراعوا شرع الله مش العولمة !
----------
سَبَحت جوه عيون حبيبتى ارتويت
لمَست شفايفها شفايفى انتشيت
شفت ف عينيها سؤال قتل نشوتى
كان السؤال: امتى هيبقالنا بيت ؟!
----------
سيان تكون فى السر أو فى العلن
لازم فى يوم هتبان يا صاحبى ولن
تموت حقيقة مهما طال الزمن
بس المهم يقولها مين أولاَ !
----------
سَعْيَك لِشَغْلُه يجوز يكون مقبول
لكن بقاءك فوقه مش هيطول
(الكرسى ) هو الباقي يا صاحبى
مع الأسف ، والزايل المسئول !
----------
سيناريو واحد واختلاف أسماء
وألف ألف عرض لذات الداء
لكن لا هتافاتنا ولا دموعنا
هيخلوا آخر حزننا " الشيماء" !
----------
ش
شيل من قاموسك "مستحيل" و"ياريت"
واصنع مصيرك زى ما اتمنيت
الليل برهبة عتمته كيان هش
كما جرن قش يبيده عود كبريت !
----------
شوفوا احنا فين والدنيا حوالينا فين
وانتو السبب فى دا كله ( يا مسقفين (
بيقول ولا الضالين كبيركم ، بتتسابقوا
بدون تفكير فى قولة : آمين !
----------
ص
صاحبى اللى وقت الشدة دايما يحوش
عنى الخطر ويصد زحف الوحوش
واللى يساومنى على كرامتى برغيف
ماقولش عنه صديقى ومصدقوش !
----------
ض
ضاعت سنين عمرى فى وهم كبير
يا شوقى باشا وتهت فى الطوابير
"كاد المعلم أن يكون رسولا"
كانت يا دوب مكتوبة بالطباشير !
----------
ط
طبق الضفادع فى مطاعم باريز
بيقولوا إنه شهى وصحى ولذيذ
سافر يا عتريس بيع ضفادع هناك
وكفاك بقى تسرح بحب العزيز !
----------
طاهر وكل الخلق بيلوثوه
وعشان مالوش صاحب يا عينى هانوه
يا مخصخصين كل اللى كان عام ،حرام
بلاش تسيبوا النيل كدا خصخصوه !!
----------
طوب العمارة فوق كتافى انشال
إزاى ماليش فيها بقى رسمال
إن كان صاحبها له فلوس سايلة
أنا برضه عرقى فيها كان سيَّال !
----------
طب قوللى إيه فى الدنيا مش بفلوس
ومين بغير قرشه يسود ويسوس
اتأمل الدنيا وشوف حالها
فى قبضة" القرش" الديول والروس !
----------
ظ
ظهرت نتيجة الامتحان العصيب
وكان نجاح المصرى شئ مش غريب
بانى الهرم والسد يقدر قوى
يخلى رملة توشكى بستان خصيب!
----------
ع
عصفور - وكان مغرور - وقع فى الفخ
لكنه أبدا لا استكان ولا نخ
ندد ، شجب ، استهجن الصياد
الانتهازى الدون..... إلخ إلخ !
---------
عار يا عرب يا مسلمين أى عار
بيحرقوا بغداد فى عز النهار
ويادوب شجبتوهم يا أحفاد قطز
ميت ألف طز فى شجبكم للتتار !
----------
على قد آخر عزم فيك خد شهيق
مبقاش خلاص غير الهوا أى شئ
ممكن ضريبيا يحسبوك عليه
ودا مش هزار دا كلام بحق وحقيق !
----------
عفريت ( رواندى ) خرج من الحنفية
وقال كلام تقل همومى علىَّ
مبقاشى نهر النيل يا مصرى نجاشى
ولا عاد هيرجعله اللى داق الميه !
----------
عيبى فراغ جيبى من البنكنوت
ودا عيب بسيط جدا فى تقديرى
أما فراغ عقلى فمأساه ، واموت
لو الفراغ امتد لضميرى !
----------
غ
غير قلة الذمة والإهمال والتقصير
فيه قلة الخبرة وحاجات تانية غيرها كتير
اسوأ ما فيها جميعا آفة "التسطيح "
وواجبنا نقضى عليه فى القطر والتفكير !
----------
غربالنا نايم جار ماجور العجين
بيشتكيله من عجاف السنين
ويقوللـه : معقول طعم قمح الدولار
يشبه حلاوة قمح عرق الجبين ؟ !
----------
غيطنا خلاص أصبح شحيح ريعُه
والعصر سافة فلوسنا تقاليعُه
والصحة مش ولا بد ، وعشان كدا
هعلِّم ابنى الكورة ، وهابيعُه !
----------
ف
فى البرلمان اياه لنا نايب
لكن ملهشى فى الكلام نايب
سألت عضو زميله عنده زكام
عنه ،عطس عطسة وقال : "نايب" !
----------
فِرْعَون ذو الأوتاد وثمود وعاد
شادوا وسادوا وافتروا ع العباد
وياما كان يا أمريكان مفسدين
طواهم النسيان والعدل ساد !
----------
فى بير همومنا عشنا نحلم بيوم
نخرج نشوف الدنيا بره الهموم
البير طفح أصبح محيط وخلاص
مفيش خلاص غير للى يقدر يعوم !
----------
ق
قالوا : ( القراءة للجميع ) انشرحت
قالوا : ( الرياضة للجميع) انبطحت
بس احتياجات الجميع اللى فوق
غير احتياجات الجميع اللى تحت !
----------
قال الأسد فى مذكراته زمان
فى غابتنا دى كان لىّ جد جبان
صرخ فى يوم من خوفه ، خاف منه
كل اللى فى الغابة ، بقى السلطان !
----------
قالولى سافر روح بلاد الفلوس
اتعب شوية وهات معاك المَهْر
من كتر تعبى رجعت ما قدرت ابوس
بعد السفر غير إيدى وش وضهر!
----------
قالوا القمر مبقاش كما عرفناه
اللى وصل عنده التقاه مش جميل
قلت القمر هفضل انا أهواه
مادام وصولى أنا اليه مستحيل !
----------
قريت وأنا باتصفح الجرنان
إعلان جواز ، بيقدم البرهان
على عصر بقى فيه كل شئ للبيع
وارخص ما فيه هو انت يا إنسان !
----------
قرشين شقا عمرى اللى فى"التوظيف"
حزنى عليهم خلى نومى خفيف
حلمت بوظيفة القوى العاملة
صحيت وانا مفزوع باقول: يا لطيف !
----------
قطتنا هربت ويَّا قط الجيران
لكن ما صانهاش الانتهازى الجبان
أول ما لاف على قطة غيرها اختفى
مسكينة ، عقدت صُلح ويّا الفيران !
----------
قصة علاقته بمونيكا ومحاكمته
مش هى فى نظر القانون تهمته
تهمة "كلينتون " اللى لا تغتفر
بتنحصر فى كذبه على أُمته !
----------
قلبى معاك يا حاجب الجلسة
واقف كدا من كام سنة ولسه
ما جاش عليك الدور تقول رأيك
هتقوله امتى امال بقى ؟ .... كبسة !
----------
قلب الحجر بيجود بقوت الدود
ولكل نجم يدور مسار محدود
إحكام بديع فى الكون ، مين أوجده
لو كان مفيش للكون إله موجود !
----------
قول كلمتك و امشى ومتخافشى
ومادام قدرت تقول ما تندمشى
عيش بعد موتك بين حروف كلمتك
لتموت وهى كمان متنقلشى !
----------
قلت لخبير : هو اقتصاد السوق
اسمه الصحيح والا اقتصاد السوء
أنطقها بالقاف والا بالهمزة؟
قاللى : هتنطق صح لما تدوق !
----------
بقية ديوان العموم على الصفحة التالية