جارى التحميل
استخدم زر ESC أو رجوع للعودة
ديوان " الهموم الإنسانية بالحروف الأبجدية "
الإهداء
إلى أمى وأبى يرحمهما الله . . .
علمانى الشعر ؛ ثم إلى زوجتى . . . تحملتنى شاعراً !
سيد الموجى ؛ الزرقا ديسمبر 1999 م
أ
ابنى سألنى :يعنى إيه كافيار ؟
خلانى بسؤاله ارتبك واحتار
ملقتش عندى كلام أقولهوله
غير إنه نوع من أكل أهل النار !
-----
ابنى الأخير صممت اسميه " أمير"
يمـكـن يحقق حلم جده الكبيـر
كان ألف رحمة عليه بيحلم زمان
يضرب بفاسه الأرض يطلعله بير !
-----
إديها ضهرك زى " عبد السلام"
واحذر خداعها ، وصُدها ع الدوام
الدنيا زى ) البلهارسيا ) إذا
قدرت عليك يبقى عليك السلام !
-----
اتخيلوه ارتد بصره إليه
ومسك كتاب من كتبه يقرأ فيه
هتقولوا " أمى " وهو طه حسين
عميد أدبنا ،ألف رحمه عليه !
-----
أزمة " لو كربى" ظروفها تشبه ظروف
تلكيكة الديب لما قال للخروف
جدك شتم جدى ، ودار الزمان
ليبيا وديب تانى ، ومن عاش يشوف !
-----
إرمح يا إنسان واجرى جرى الوحوش
غير رزقك المقسوم فى يوم لم تحوش
أما اللى كان واجب عليك تعمله
ما أعجبك ، هو اللى ما بتعملوش !
-----
أعشق بلد فيها قيراط طينى
واعشق قيراط من غلِّته طحينى
واعشق خضار زرعى عشان لونه
يشبه عيون محبوبتى ،نور عينى !
-----
أستحلفك بالله يا تليفزيون
سوق إعلاناتك مش لأى زبون
سيب الفقير عايش فقير وخلاص
وبلاش بقى تخليه فقير مجنون !
-----
أنا برئ شوفوا مين طَرْبَق عمايركم
وبلاش تزيحوا خطاياكم على غيركم
لأنكم فى الحقيقة محتاجين زلزال
يهز مش أرضكم ،لكن ضمايركم !
-----
افتح بيبان الكلمة أو سدَّها
ابنيها صرح منيع أو هدَّها
إصنع ما شئت يا صاحبى ،بس المهم
ما تقولش كلمة وانت مش قدها !
-----
أنا مش باهين كلمتى بحثاً عن الشهرة
ومش باقول أى حاجة واطلب الأجرة
لأن ناس النهارده رأيهم لو كان
مهم ،فأهم منه رأى ناس بكره !
-----
أنا زى مايكون اتهبلت بجد
عمال اقول بصراحة فوق الحد
ولا حد سكِّتنى ولا ردِّنى
ولا قال : خدوه قيموا عليه الحد !
-----
أنا مش حكيم عصرى ، ولا عصرى
هو كمان محتاج يكون له حكيم
فوق رمل أحلامى بنيت قصرى
موج الحقيقة حطَّمه تحطيم !
-----
ب
بالغنا فى الأحلام دفعنا التمن
وبقينا عبرة لأهل هذا الزمن
تاه حلمنا بين الخليج والمحيط
وخسرنا بلح الشام وعنب اليمن !
-----
باسمع أغانى وياما رخصت يا أغانى
لا كلمة ولا لحن ولا صوت شبه إنسانى
يا مين يشوف لى طبيب أنف وأذن شاطر
لإنى خايف يكون العيب فى ودانى !
-----
برصاصة منه تطيش يجوز أنطخ
ويجوز كمان ينصبلى هو الفخ
لكن لسانى وقلبى فى الشدة
ما بينطقوش غير بس قولة " أخ ! "
-----
بانده عليك ، اسمع ياليل الندا
أصلك غريب ولابد هتروَّح
مسيرها حتة شمعة قد كده
تجعل جبال العتمة تطوَّح !
----------
بياع بطاطة عجوز على الكورنيش
قرَّبت منه همست له بشويش
فين الأحبة بتوع زمان ؟ ابتسم
وقاللى : واقفين فى طابور العيش !
----------
بعد (القشف ) بهلول معاه محمول
سألته : ليه بتلف بيه على طول ؟
قال: أصله محمول ،يعنى لو يتركن
يخرب ، (صدقت ماهم يومينكم دول ) !
----------
بيفرقونا وهما يتلمُوا
وبيخدعونا اللى ما يتسموا
ويجعلوا ابن العم ببساطة
يتخلى حتى عن ولاد عمه !
---------
بقية رباعيات ديوان الهموم على الصفحة التالية
لا يوجد