جارى التحميل
استخدم زر ESC أو رجوع للعودة
1
الحُب زى الكهربا بيدوب
موجب في سالب , يحصل المطلوب
بنحِسّهم من غير ما بنشوفهم
وقَدرنا ويّاهم ما منّه هروب !
****
يا مجلس الأمن المُهاب الهُمام
طال التباحُث ليه بشأن السلام
قلتم فلسطين بنت عم الكويت
لكن لقينا الفعل غير الكلام !
****
أحلى كلامنا اللى ماقلناهشى
وأحلى أيامنا اللى لم تنعاش
أحلى نجومنا اللى ماشفناهشى
وأحلى أولادنا اللى لسه ماجاش !
****
قولى لى من ابه خايفة أو خايفة ليه
وانطلقى من أسرك في قبضة ايديه
الخوف مجرد كهف ضلمة ف جبل
شيلى فانوس إصرار معاك وادخليه !
****
حقيقة فيها كتير من الإلغاز
كما إنها بتثير الاشمئزاز
سر اشتعال النار في سراييفو
مش رغم إن دا لإن مافيهاش جاز !
****
ويا أمريكان إعصار كاترينا
عقاب على اللى بتعملوه فينا
رب الوجود أرسل جنوده تقيم
فى الأرض عدله وعدله يكفينا !
****
في الأرض حاربوك ، عذّبوك ، كذّبوك
واستقبلك في سماه مليك الملوك
موقف جليل يهز قلب الحجر
بس البشر لسّه ف نفوسهم شكوك !
****
ما أعجب الإنسان ، يروَّض أسود
يصاحب الأفيال، يلعّب قرود
ويبقى صعب عليه يصاحب أخوه
من بين جميع المخلوقات في الوجود !
****
أكلت ليه سيدنا يوسف يا ديب
بكى ، وفاجئنى بِرَدُّه العجيب
- أنا برىء لكن - ودى قسمتى
تكدبونى ، والسبب إنى ديب !
****
سألته : ليه تمن الرغيف في ازدياد ؟
قاللى : يجوز علشان بنحلف عليه
سألته : ودا شىء يرضى رب العباد
قَفَل الحكيم بُقُّه وغمَّض عينيه !
****
فى ملف كاس العالم الميمون
قانون رياضى منضبط موزون
وهو إن الصفر له قيمة
وصلت فى مصر لخمسميت مليون !
****
لو كانوا خدعوا أو خدعهم أبوك
بلاش لعاصْفًْة جديدة يستدرجوك
اعقل يا بوش وافهمنى من غير غضب
شعب العرب مش كله أمرا وملوك !
****
عرفت ليه اسمه سوار الذهب
لأنه إنسان معدنه من ذهب
الحاكم العربى الوحيد اللى ساب
الحكم حىّ بنيّة صافية وذهب !
****
يا معَلِّى راية مصر ماتوطيهاش
بوجودها جنب رايات مابنحبهاش
رايتنا كرامتنا إذا تهون نهون
تكون شويِّة بوية فوق سير قماش !
****
أنا مش غبى لكنى باتغابى
علشان أسابر منطق الغابة
تعلبها هو ملكها بدهاؤه
وملكها منفوخ نفخة كدابة !
****
يا كمبيوتر عيب عليك استحى
وفِز قوم يا ندل من مطرحى
دا انا مُخْرِج الحدوتة دى كلّها
وانت يادوب كومبارس فوق مسرحى !
****
راحت عليك يا إيدز يا مفترى
وسارز أثبت ان عضمك طرى
لكن فى رأيى إن أخطر وباء
هو اللى( فيروسُه) احتلال عسكرى !
****
شِدُّوا الحزام دلوقتى أصبح قانون
وكان شعار في الماضى لو تذكرون
والفقر حشمة شعار قديم ! فَكَّروا
وبين قوسين هاكتب ( مجرد ظنون ) !
****
لولا معاناة أهالى كوسوفا وهجومهم
ع الأمريكان ، كان هبقدر مين هنا يلومهم
بالرغم من إن أهالينا العراقيين
أول ضحايا يعانوا من يورانيومهم!
****
شوف برلماناتك وعمايلها فيك
ووجودها فى وادى بعيد عن واديك
راجع حساباتك وفكّر فى ناس
تمثِّلك ، مش ناس تمثل عليك !
****
نوابنا من كتر إخلاصهم لدوايرهم
بيناموا فى الجلسة بعد ما هجروا سرايرهم
يا ريت تبادلوهم الإخلاص بالإخلاص
وتريحوهم بقى وتجيبوا ناس غيرهم ؟!
****
كنا زمان ع الحديدة بس بعناها
جملة قديمة قوى بيحس معناها
اللى فى عز الشتا نار الغلا لاسعاه
ياما قلنا آه واحنا بس اللى سمعناها!
****
فى العالم اتناشر تريليون دولار
حجم الخساير بسبب الانهيار
الاقتصادى ، بس مصر ف أمان
ما أعجبك يا تصريحات الكبار !!
****
مش كل من قال صدق ولا كل صادق قال
ولا كل واحد قالوله صدّق المتقال
تفتكروا إيه السبب ، ولحد إمتى ، ومين
يقدر يقدم لنا إجابة لأى سؤال !
****
مشروع (خريطة) بوش ودهاليزه
لطريق فلسطين صعب تنفيذه
ليرجَّع المسروق ليبرمها
خريطته دى ، ويحطَّها ف ....!!
لا يوجد