ديوان ( بيكيا )
الرسوم الداخلية والغلاف
بريشة الفنان أسامة عمران
الإهداء
إلى روح أستاذى وأستاذ الجيل من شعراء العامية المصرية ؛ بيرم التونسى
سيد الموجى ,,
القاهرة يناير 1977 م
أول الكلام
الدنيا بوابة
لها ضلفة بتزغرد
والتانية ندّابة !
أمنا الغولة
يا أمنا يا غولة
قبلن ما ابدأ كلامى
أقولهالك صريحة
ما يخدعكيش سلامى
وحاذرى م المرارة
فى لحمى وف عضامى
****
فى رحلة عمرى كان لى
من الضلوع مجداف
وكان الطين سريرى
وبرد الليل لحاف
شربت دموع عنيه
وكلت رغيفى حاف
****
وجيت وسلاحى كلمة
وكل الناس ورايا
عملت الخوف مداس
رفعت الصدق راية
عملت كل كلمة
فى أشعارى مراية
****
يا أمنا يا غولة
انتبهى واسمعينى
ها قوللك كلمة واحدة
فيها مرارة سنينى
وبعد كدا يا غولة
كلينى تريحينى
عنيكى يا غولة حمرا
عنيكى يا غولة حمرا
عنيكى يا غولة حمرا
يا مصر يامّه
يا مصر يامّه
يا اسم باقى
يا نيل بيروى
زرع الشراقى
أعشق سماكى
واعشق نخيلك
وان تندهيلى
أجرى واجيلك
أحضن ترابك بشوق ولهفة
وف كل وقفة
تلاقينى جنبك
شايل فى قلبى
حبك منارة
قنديل يضوّى
فى كل شارع وكل حارة
جوايا أحمس
قطز ، عرابى
ابن الوليد ، عنترة ، جيفارا
الحب نبضى والأرض أرضى
ولجل أرضى
تحلى المرارة
****
يا مصر يا ضحكنا وبكانا
قولى لولادك
يعلموا ولادنا فى الحضانة
المم قمحك
والأمبو نيلك
والدح هو قطنك وتيلك
يفهم وليدك يشيل جميلك
يكبر وعزمه
فى قلبه قايد
وقت الشدايد
فى عنيه يشيلك
****
يا مصر يامّه
ياللى فى طينك
باتعب والاقى
زاد اشتياقى
يعلموا ولادنا فى ابتدائى
القمح طينك
والقطن طينك
والثورة من عزم فلاحينك
ولا غير إيدينا
ولا غير سلاحنا
يشفى جراحنا
ويطلّع الشمس فوق صّباحنا
يا مصر يامّه
حاسبينا دايما
وحسّى بينا
وفهمينا وعلمينا
دا رمل سينا
محتاج يا أمى أصغر ما فينا
يصبح فدائى
يا مصر يامّه
يا اسم باقى
قرقر
حا يا قُرقُر
كُلها ساعتين ونوصل
شد حيلك
دا انت طول عمرك يا قرقر
راضى ويايا بقليلك
يبقى ليه جىّ النهارده
تتقمص وتهز ديلك ؟
جر عَرَبيتك و ياللا
والا يعنى عايزنى اشيلك؟
******
حا يا قرقر متناكفنيش
جرى ايه يا ابن الحلال
دا انا مفطرتش يا قرقر
وانت معلوف علفة عال
يبقى هل يرضيك كدا نعطل
وماناخدش المشال
طب واجيب اكلك منين ؟
طب واقول ايه لما نرجع للعيال ؟
حا يا قرقر دا انت عارف
كل حاجة عن حياتى
دا انا بحكيلك حاجات
يمكن متعرفهاش مراتى
دا احنا ع الحلوة وع المرة
سَوَى سارحين يوماتى
برضة واقف ؟
برضة هاتسبنى كدا لوحدى أهاتى؟
****
حا يا قرقر عيب عليك عطلتنا دى ,
اخزى الشيطان
واما نرجع لك على
هازوِّد المعلوم حفان
عارف انك م التعب هلكان
وعيّان من زمان
بس مش معنى كدا تسيبنى ارغى
زى البغبغان
****
برضة واقف , طب ورحمة أمى
وعليَّ الطلاق بالتلاتة من مراتى ,
تلاتة بالله العظيم
هاسحب الكرباج ماخلِّى
شبر من جسمك سليم
والمثل بيقول يا قرقر :
اتقى شر الحليم
برضة واقف , لسة واقف
يعنى مش ناوى تطاوعنى
طب يا قرقر, خد يا قرقر
يعنى ومشيت مستقيم
عمرى اقول عنك كدا
هاتعيش بهيم و تموت بهيم !
قرقر ! انت زعلت منى
طب خلاص حقك علىَّ
ما انت بتخلينى افرغ
فيك همومى المتدارية
وانت عارف ان اللى زى
حالاتنا احنا الأرزقية
لوعطلنا نجوع ، نموت ,
لا لنا معاش و لا حتى ديَّة
يبقى ليه تسيبنى كدا
قُدَّام حمير الناس اهينك
أو تخلى الناس تقول
انى أنا مش مالى عينك
بس والعشرة يا قرقر
بابقى حزنان حزن ياما
لما اشوف عرقك بيجرى
وانت تعبان فوق جبينك
بس هاعمل ايه أدينى
باقول فى سرى الله يعينك
الحياة صعبة يا قرقر
واحنا فى الدنيا ضحية
لما كرباجى بيهرى
جتتك فى اللحظة ديّة
اوعى تفتكر ان دى
منى شطارة وعنجهية
اللى فيك من هم عيشتك
والله اكتر منه فيَّ
زى كرابيجنا احنا مابتسلخ
جلودكو انتو الحمير
الزمان كرباج يا قرقر
فوق ضهور العربجية !
لقمة العيش مرة زى
الصبر يا قرقر يا اخويا
وانت عارف انك انت
كل ما ورثت من ابويا
كان بـِوِدِّى تكون طوالتك
فيها أحسن صنف فول
كان بودى كل ما تتمنى
يا قرقر تنول
وانت عارف كل حاجة
ع العموم من غير ما اقول
******
المهم الوقتى نوصل
بالبضاعة فى سلام
لجل نرجع بعشانا
قبل ما الاولاد تنام
ساقية دايرة واحنا فيها
مربوطين على الدوام
أما الّف سيجارة أصل
دماغى لفت م الكلام !
اللهْ ! داحنا خلاص يا قرقر
جينا عند المزلقان
واحنا دايما موعودين
بالركنة فى هذا المكان
واللى جاى ع البعد تعرف
ايه كمان ؟ قطر البضاعة
يعنى لو معدناشى
فيها ركنة بالقليلة
نص ساعة
طبعا المفروض بقى
تعدى بسرعة المزلقان
بالسلامة , شد حيلك ،
هيلا ، ياللا القطر بان
ليه كده اتكعبلت ليه
استر يا ساتر الله حىّ
شيلوا و يايا يا خلق
يا ناس ياهوه ,
القطر جىّ !
........................
بابكى ليه ؟ بعد اللى صابنى
بتسألونى بابكى ليه
هو فيه فى الدنيا شئ
غير الحمار ابكى عليه ؟
طب يا ريت القطر كان
خطّى على رقبتى أنا
كان عيالى هيحزنولهم
شهر أو حتى سنة
بس كانوا هيلقوا لقتهم
ويتاووا فى دار
العيال ممكن يعيشوا
بالحمار من غيرى انا
بس مش ممكن يعيشوا
بىَّ من غير الحمار !
ابرز بالبريزة
ابرز بالبريزة
تكسر الإشارة
تقعد ع القهاوى
وترُصّ الغبارة
ما هو لو مات ضميرنا
بيصْغَر كبيرنا
يتساوى غفيرنا
برئيس الوزارة !
****
شيل المارلبورو
يطلع لك ملفك
يجرى قبل دوره
دون ما تخش صفك
وان نضّفت كفك
قراقوش يستأفّك
ما ينوبك يا عينى
غير تعبك ولفّك !
****
لحلوحك فى إيدك
تعمل كل حاجة
يبقوا الناس عبيدك
وتبقى الخواجة
لو إيدك نضيفة
يا أستاذ خفاجة
بالنشرة الظريفة
هاتشرّف سفاجة !
****
شلنك شنّه شنّة
تلقى ابن الذين
يحجز لك فراخك
والزبدة المتينة
وان قفّلت مخك
يضطهدك أخينا
شطَّبنا يا افندى
فوت بكره علينا !
كلب البت مباركة الهبلة!
دار قدامى حوار امبارح
ماسمعتوش بودانى صحيح
بس ساعات الواحد منا
بيسمع بعض حاجات بعنيه
وانا بعنيه دول اللى هياكلها الدود
شفت وكان ويّايا ساعتها
الواد محمود
ابن الحاج معاذ ابو خيشة
فارشين خيشة وقاعدين فوقها
ع المصطبة قدام الدار
كنا ساعتها صفارى سمس
وكان قدامنا ركية نار
حاطين فوقها القهوة المُرة
والراديو ابو حجرين من بره
عمال بيقول فى الأخبار
وماطوّلش عليكو إذا احنا
كدا قاعدين حوالين الجوزة
إلا نلاقى إيه ؟ كلبين
كلب مقفّع كلنا حافضينه وعارفينه
كلب البت مباركة الهبلة
أما الكلب التانى فكان
الله وكيل ولا حتى كلاب السيما
بتوعوت الخواجات !
استغربت وقلت ف عقلى
معقول كلب البت مباركة
يمشى مع كلاب البهوات
ومع الكلب داهو بالذات
وإذا انا سارح فى الفكرة دى
إلا لقيت محمود بيقوللى
تعرف صاحب الكلب دا مين ؟ قلتله مين ؟
قاللى دا كلب قريب العمدة
لكن كلب رباية بندر
يعنى الفرق ما بينه وبين
كلب البت مباركة الهبلة
بالنسبة للبنى آدمين
زى الفرق ما بينك انت وبين العمدة !
![](http://kenanaonline.com/photos/1238406/1238406021/large_1238406021.jpg?1411386526)
سأل الكلب بتاع البندر كلب البت مباركة وقال له
* الناس دول قاعدين كدا ليه
قصده علينا !
قال له وهما وراهم إيه
احنا خلاص داخلين ع المغرب
والمغرب معناه قعدتهم كدا قدام الدور يتسلّوا
أما احنا كلاب العزبادى
من دلوقتى تبدأ ورديتنا لحد أدان الفجر
* ورديتكم ؟
- أمال إيه هو احنا شوية ؟
* إيه شغلتكم ؟
- إيه شغلتنا ؟
أيها شئ يخطر على بالك
ديب أو تعلب أوحرامية
فكرك فيه واحد من دول
يقدر يدخل أى زريبة
طول ما احنا ماسكين وردية ؟
هز الكلب دماغه وقال له
* طب والأكل بتاكل إيه ؟
- أيها حاجة ، فرخة ، حمامة ،
لقمة فى إيد عيل فى الشارع
* بتقول فرخة ؟
- ميّتة طبعا، معقول يعنى هاتكون حيّة ؟
هز الكلب بتاع البندر ديله وسأل الكلب التانى
* طيب وانت إسمك إيه ؟
- اسمى ؟ مافيش ، أنا كلب وبس!
* احنا هناك بقى بيسمّونا
- بيسموكم ؟ يعنى حداكم شلبى وستوتة وأمونة
* شلبى دا إيه ؟ أنا اسمى إيماكو
والكلبة اللى معايا إيفونا
- احنا بقى يا إيماكو يا اخويا
لما نعجز بيسِمّونا
لا بنتسمى ولا بنتنيل
وبيركبنا أهيف عيّل
لكن لجلن نلقى اللقمة
بنطنش دايما ونميّل !
إنما قول لى انت بتاكل إيه يا إيماكو
*باشرب لبن الصبح وباكل
فى الغدا لحمة
- بتقول لحمة ؟ أمال صاحبك ياكل إيه ؟
دا انا عن نفسى لو صادفت ولقيت عضماية
وانا ورا صاحبى
جايز أعزم بيها عليه
كلب البندر هز دماغه وقال له حقيقى انك تعبان
* لكن ليه ما تسيبش العزبة
وتهاجر إلى أى مكان ؟
- هنروح فين يا إيماكو يا اخويا ؟
دا الغلبان دايما غلبان
واحد زيك يتزاينوبه فى
بيوت الناس الأعيان
واحنا رضينا بهم الدنيا
مارضيش بينا الهم كمان
احنا عيشتنا هباب فى هباب
شبنا برغم ان احنا شباب
ناكل لجلن نصلب طولنا
ونعسْكَر قدّام لبواب
وعشان هذا الحال المايل
فيه فى الدنيا كلاب يا إيماكو
زى حالاتك مفروض تزعل
لما يقولوا عليها كلاب !!
لما قال القرد لأ
ميّل القرداتى واتمدد فى ضل الجزورينة
ولإن الحتة دى كانت أمينة
يعنى مافيهاش أى شئ ولا حتى جن ابن يومين
ماربطش القرد ولا حتى الحمار فى الشجرة ، سابهم مفكوكين
واما راح فى النوم تمام القرد ميّل ع الحمار
قال له يعنى مادمنا ماحناش مربوطين
تبقى قعدتنا كدا لزمتها إيه ؟
والا يعنى احنا خلاص مكتوب علينا نكون عبيده حتى لما بيبقى نايم
يبقى إيه الفرق بينّا امال بقى وبين البهايم ؟
فز يا حمار ، قوم معايا هز طولك
دا انا عندى كلام كتير نفسى احكيهولك
![](http://kenanaonline.com/photos/1238406/1238406022/large_1238406022.jpg?1411386611)
الحمار والقرد بعدوا عن مكان القرداتى
اللى كان نايم يشخّر زى ما يكون عمره قبل كدا ما نام
قعدوا الاتنين تحت شجرة قريّبة وبدأوا الكلام
* خير يا قرد انشالله ؟ كنت عايزنى ليه وهاتقوللى إيه
احكى ، فضفض ، قول وماتخبيش علىّ اللى انت فيه
دا احنا الاتنين الحياة فى حكمها قاسية علينا
فينا هم يهد حيل جبلين وصابرين ع اللى فينا
بس نعمل إيه ؟ دا شئ مكتوب على جبينى وجبينك
واللى مكتوب ع الجبين هانغيروش احنا بإدينا ؟
- كل شئ يا حمار بيتغير ودا حال الحياة
واللى بيقول آه مسيره مع الزمن مايقولش آه
واحنا شوف من كام سنة ع الحلوة والمرة معاه
نابنا م القرداتى بعد اللقمة إيه إلا أذاه ؟
بس برضه ارجع وأقول لك عنده حق
أصله مالقاش حد منّا يقول له لأ
لما بيقول حا بتمشى ، هش بتوقّف قوام
يركبك ويحط فوقك خرجه وبتمشى تمام
يضربك وتطاوعه رغم اللى انت فيه من الآلام
فرعون لو كان لقى له حد رده
كان ضرورى من وقوفه عند حده
واحنا برضه ما استفدناش م التارخ
وتركنا له المصير كله فى يدّه
وانت حالك ع العموم احسن شوية
ما تآخذنيش شغلتك مش اللى هى
يعنى كل مهمتك إنك تشيله
أما انا ربك بقى يعوّض علىّ
صحتى على الدوام متدحضرة
وعملنى - الله يسامحه - مسخرة
والزمان يا حمار مايرجعش لورا
وحياتى باختصار بقت خ . . !
عمرنا مانخدش منه غير كلام
شوفوا ميمون الظريف
لما بيحارب بسيف
واما يمشى ع الرصيف برجلتين
واما يعجن العجين
شوفوا ميمون الهمام
يا سلملم يا سلام
شوفوا ! دا بيضرب سلام للبهوات
روح لسيدنا البيه يا ميمون قول له هات
وانضرب وارقص وأبكى وابتسم
والمصير لسود قصادى بيترسم
قسوة القرداتى بتأثر علىّ ف صحتى
هل هيرحم ضعفى لما ف يوم هاودّع قوتى ؟
والله يا حمار اللى عارفه انى ما هلقى لقمتى
دا احنا والقرداتى عايشين عيشة زق
حالنا عدمان وخلاص قرّبت اطق
يبقى ليه ما نقولش للقرادتى لأ
احنا ماحناش شغالين
طالما ان احنا كدا معاك مظلومين
الحمار مش راح يشيلك ولا حتى خطوتين
وانا مش هاضرب سلام للبيه ومش هاعجن عجين
*الكلام اللى انت قلته يا قرد عندك حق فيه
بس كله كلام فمتعلقش أى أمل عليه
- يبقى نهرب ، اللى يغصبنا على التعذيب دا إيه؟
* انت جايز هتلاقيلك شغلة مرتاحة شوية
فى جنينة الحيوانات ، أما أنا فهى هىّ
فين ما اروح مركوب ومضروب فوق دماغى
يبقى أرجوك لو هربت انت ماليش فى اللعبة ديه !!
بقية قصائد ديوان بيكيا على الصفحة التالية