ت

تعالوا يا نُصاح نفكــر شوية
فى حكاية شغلانى قوى الليلـة
ليه ( الحواية) فوق دماغ الصبية
شيلة لكن بتخـفِّف الشيـلة ؟ !
----------

تسلم إيديك وتعـيش يا دود القز
وتلَبِّس الناس اللى عايشة فى عز
بس انت بصراحة ما تلزمنـاش
يلزمنا دود تـانى بيزرع رُز !
----------

تقدر تقوللى لما جدك قتل
أخوه وملقاش أى حيلة يتاويه
مين أرشده ورماله خيط الأمل
مش برضه كان جدى الغراب والا إيه ؟!

----------

ث

  )ثعالب الصحراء ) بقوا كتير قوى
وموقفك يا عراق بقى خطير قوى
وناسنا دول فى الشجب ناس عال قوى
ومش هاقول غير ربنا ع القوى !
----------

ج

جهلى بسعـر البنكنوت مش عيب
لا عندى ين ولا دولار فى الجـيب
على قد رزق اليوم باعيش يومـى
واهى ماشية مرة تصيب ومرة تخيب!

----------

جواكى "شجرة دُر " رعبانى
بترن صوت قباقيبها فى ودانى
ودليل جنونى إنى محتاجلك
وباحس إنى نصك التانى !

 ----------

 ح

حرقت أوراقى وقصفت القلم
يمكن يموت ويّا السكوت الألم
ألمى هزمنى وقلبى أصبح قلم
يكتب حكايتى بحبر غالى ، بدم !
----------
حاول كتير وافشل وحاول كمان
لا تقول مفيش فايدة ولا تكون جبان
عود الدرة لو كان هزيل ، مستحيل
يشيل ويتحمل ويطرح كيزان !
----------
حلم "القراءة للجميع" كان بعيد
وبعد طول الصبر ان الأوان
ادى الكتاب بالفعل فى كل إيد
ويا شعب مصر الطيب ادعى لسوزان !
----------
  حقك مادمت مُصِر وحريص عليه
لا بد بالإصرار هتوصل إليه
الشمس ما بترميش خيوطها الدهب
على جبين إنسان مغمض عينيه !
----------
حمودة الاهطل عنده "آنسر ماشين"
طلبته ، رد بنفسه قاللى انت مين؟
سجل رسالتك باختصار قلت:
فعلا مستجد الفرح دايما حزين !
----------

خ

خذ موعظة من "البوسنة والهرسك"
من "بوسنا" إيده مسيره يوم "هارسك"
حارب عدوك بس بسلاحك
وكُل رغيفك من حصاد غرسك !
----------

خبر ولاد آدم قابيل وهابيل
أطماع لأخ قتل فى أخ قتيل
هذا هو الموجز ،وكل تاريخ
الإنسانية للخبر تفاصيل !
----------
خط الحدود أمحوه بأستيكة
وتعالوا نبقى زى أمريكا
ماهى برضه فيها ساعات حاجات حلوة
مش كلها هروين ومزيكة !
----------
خروف ولا بس فروة صوف أبَّهَة
ونعجته بتحبه ويحبها
أ (جاز) لها ترعى فى غيطان الجيران
كان اللى كان ،طب ليه بقى يسبَّها !
----------
خلوا اللغة الأجنبية أجنبية بجد
واحموا الوطن من تفرنج زاد وفاق الحد
اتعلموها ، بلاش تتعلموا بيها
دا اللى مالوش خير فى نفسه مايحترمهوش حد !
----------
خطوة حبيبتى هى أجمل إيقاع
يدخل ودانى يهز وجدانى
ويصحِّى جوه القلب ألف انطباع
ساحر ، وآه م السحر آه يانى !
---------- 

د

ديمقراطية لشعب جاهل فقير
نكتة سخيفة قوى يا عبد الخبير
مين اللى قال يا بياعين الكلام
إن الحمار له حق تقرير مصير !
----------
دخلنا سرداب الحياة مُجبرين
ومسيرنا نخرج زى ما دخلنا فيه
أما السؤال الباقى طول السنين
السر كان فى دخولنا وخروجنا إيه ؟!
----------

ذ

ذوقك وإنسانيتك ثروتك
مش هى جاهك لا ولا عزوتك
ضعفك -وجواك خير -بيحييك سعيد
وقوتك - بالشر - بتموتك !
----------

ر

رسالة بالفاكس للمسئول عن التحقيق
فى قضية بتمس شرف المهنة بعض الشئ
واحد مقاول من ايهاهم كتبله يقول
جبل المقطم وقع ،بس ومفيش تعليق !
----------
رخصت قوى يا عم ليه الحاجات ؟
مع إنها من أشهر المنتجات
قاللى : وهيبقى كل شئ فُلَّلى
باتع قوى سر الولى اللى اسمه (جات ! (
----------
رفعت صوتى كش وحش الفلا
وصار صداه ملو العمار والخلا
قال الصديق : فين الطريق قلت له:
آدى الطريق يا صديق و إلا فلا !

----------

ز

زمجر يا رعد "امشير " وزومى يا ريح
فلاح أنا مصرى أصيل وفصيح
يغلَّوا ولَّا حتى يلغوا الجاز
لساه فى دارى منقد القلاويح  !
----------
زغلول صُغَيّر جوه غية حمام
بيعلموه يبقى رسول للسلام
هجم عليهم فار ، طاروا الكبار
وفاتوه مع الزغلول يكمل علام !
----------
زنزانة زى القبر متر ف متر
جواها فارس كلمة صاحب فكر
معروف لكل الناس ، وسجَّانه
حر وطليق وغير جدير بالذكر !
----------
زمن الفتوات انتهى وابتدا
زمن ندالة وبلطجة وعربدة
مين يا ضعيف يحميك من البلطجى
وانت اللى خليته بضعفك كدا !

----------

بقية ديوان الهموم على الصفحة التالية