الدنيا والإنسان
رباعيات سيد الموجى
الطبعة الأولى أغسطس 1985 م
الغلاف والرسوم الداخلية للفنان جودة عواد
الإهداء
إلى من علمتنى كيف أحب الحياة
سيد الموجى
إن كنت فاكر غيرك انت مافيش
أنا بانصحك إنك تبطل غرور
ولا عمره هايفيدك جمال الريش
لو جيت فى يوم يا طاووس حاربت النسور !!
----------------------------------
ولا كل من شفناه بيرقص سعيد
الطير بيرقص من آلام الدبح
ولا كل صبح يجيب معاه يوم جديد
فيه يوم بيطلع فوقه مليون صبح !
-------------------------------
قاتل وشايل بين إيديه القتيل
يفرّجه للناس عشان يشتروه
مين اللى قال ورد الجناين جميل
وهو ميّت بين إيديكم يا هووووه !
------------------------------
الناس بترمح زى خيل السبق
ولا حد منهم فى النهاية سبق
طال السباق وعاد لحيث ما بدأ
بهزيمة الإنسان وفوز القلق !
------------------------------
من النزول للبحر ؛ خوفك علىّ
بيزيد غلاوتك عندى يوم بعد يوم
بس المهم يا صاحبى بالنسبة لىّ
إنك ماتنصحنيش وعلمنى اعوم !
----------------------------
سبحانه لما خلقنى ثبّت عنيه
قدام فى وشى عشان مابصش ورايا
ولجل اشوف شغّلت عقلى وإيديه
بوحى منه صنعت بيهم مراية !
---------------------------------
يا هلترى يا نجمة يا منوّرة
بينك وبين الأرض كام ألف ميل ؟
ورغم بُعْدك برضه ضيك سرى
يقول لنا : أبدا مافيش مستحيل !
--------------------------------
قال لى : مافيش أعلى منها ، قلت له المدنة
قال لى : ما فيش أغلى منها ، قلت له بلادنا
قال لى : مافيش أوفى منه ، قلت بحر النيل
كتير بنقسى عليه ولسه فيه زادنا !
----------------------------------
زحمة طابور العيش تخلى الرغيف
له نفس طعم النصر بعد الكفاح
حربين مافيش فيهم مكان للضعيف
والفرق بس يادوب فى نوع السلاح !
--------------------------------
صوت الغراب مزيكة فى ودان حبيبته
مع إننا بنتمنى ليه السكات
وكل شئ نسبيّة فعلا حقيقته
والحب يقدر يصنع المعجزات !
--------------------------------
العنكبوت أستاذ نسيج فنان
نسيجه فيه فنه وتجديده
يا هلترى هل فكّر الإنسان
يتأمله من قبل ما يبيده ؟!
---------------------------------
يا هلترى مين اللى عايش فى مين
احنا ف زمانّا والا هو اللى فينا
واللى مضى من عمرنا من سنين
مرّينا بيها والا مرّت علينا ؟!
----------------------------------
ليه كل ما ابنى قصورى فوق الرمال
موجك بيجرى عليها ويهدّها
صبرك علىّ يا بحر لسه الآمال
جوايا ياما وانت مش قدّها !
---------------------------------
مين اللى خلى الطير يطير فى السما
وعلمه فى البحر فن العوم ؟
سؤال قديم ؛ عارف كدا إنما
حبيت اقول للخلق : صح النوم !
---------------------------------
يبكى الوليد بحرارة لحظة حضوره
بكل صدقه والبراءة اللى فيه
يا هلترى واحنا اللى عارفين مصيره
لكن بنضحك ، هل بنضحك عليه ؟!
--------------------------------
الغربة مش إحساس ببُعْد المكان
الغربة إحساس باحتياج الأمان
فيه ناس بتتغرّب فى حضن الوطن
وناس بتلقى وطن فى لمسة حنان !
--------------------------------
أسد الجنينة لو يفكر يعود
للغابة من تانى هيلقى الأسود
- لأنه كان عايش فى وسط البشر -
طالعين يقابلوه بالرايات والورود !
---------------------------------------
قسوة ولادنا علينا شىء مش غريب
لأنهم غيرنا احنا أيام زمان
بيرضعوا م البزازات الحليب
وأمهاتنا رضّعونا الحنان !
--------------------------------
يتحسّر السجّان على حاله
فى لحظة الإفراج عن المسجونين
يسأل ولا من ردّ لسؤاله
الحُر مين فينا ومين السجين ؟!
|
|
