بُكرة العيد

بُكْرَه العيد والناس على كل الناس هتعيّد بُكْرَه العيد

بُكْرَه هتطلع شمس بلدنا ، تضحك ضحكة طفل وليد

بُكْرَه نقابل قمح العيلة ف جُرن العيلة بالزغاريد

بُكْرَه هننسج قطن بلدنا ونكسى ولادنا جديد في جديد

بُكْرَه العيد هيجينا وياما كنا بنحسبله المواعيد !

****

بُكْرَه العيد والناس هتغنى وتنسى الماضى بكل أساه

بُكْرَه ربابة مصر تنادى تخَلّى الوادى يقول الله

بُكْرَه هننسى كل امبارح جارح أحاسيسنا بأذاه

بُكْرَه نحقق كل أمل عشنا بأشواقنا نستناه

بُكْرَه قمرنا يضَوِّى وصوتنا يدَوِّى يصحّى الدنيا صداه !

****

بُكْرَه جناين مصر تزَهّر وتجود بعبيرها الفوَّاح

بُكْرَه نقيم الزينة ، نقابل بالأشواق دنيا الأفراح

بُكْرَه نغنّى ف ضل التوتة و نشرب م القُلّة ونرتاح

بُكْرَه يعود الغايب تايب بعد ما قضّى سنين سواح !

بُكْرَه الوادى الضيق يوسع ، يوسع ، يصبح أرض براح

****

بُكْرَه هنبدر عرق العافية يسيل ع الصحرا كأنه النيل

بُكْرَه هنسهر تحت قمرنا فوق مصاطبنا نفول مواويل

بُكْرَه ومهما تكون الشيلة فوق اكتافنا مش هتميل

بُكْرَه تعود الشمس الدافية تمسح هم وبرد الليل

بُكْرَه يولّى الزيف ولا يفضل فى وادينا غيركل أصيل !

****

كنا زمان ياحبيبتى بنحلم نهرب ،  نسكن نجم بعيد

كنا زمان بنخاف من بُكْرَه ونقابله بحسرة وتنهيد

كنا زمان بنحس بتوهة رغم وجود الإيد فى الإيد

لكن بعد غياب يا حبيبتى هلّ وعاد من تانى العيد

يمسح دمعة ويقيد شمعة كنا بنحسب مش هتقيد !

****

بُكْرَه العيد والعيد يا حبيبتى همس ونجوى بين قلبين

متعاهدين ع الحب وطول العمر هنبقى متعاهدين

لو عطشانة ارويكى بعرقى ، مش هرويكى بدمع العين

لو بردانة يضمك قلبى وروحى بكل حنان وحنين

لو مجروحة افديكى بدمّى واتمنى انى أَوَفّّى الدين!

****

بُكْرَه العيد والعيد هيقرَّب كل بعيد اشتقنا إليه

بُكْرَه العيد ولا شئ في الدنيا غير العيد هنفكّر فيه

كنا زمان طول يومنا ننادىعليه وف نومنا بنحلم بيه

كنا بنستناه مع إنه بيزيد حيرة مستنّيه

إنما ليه أنا كدا متفائل ، بصراحة مش عارف ليه !