جارى التحميل
استخدم زر ESC أو رجوع للعودة
كان ياما كان
كان ياما كان فى الحدوتة
فيه راجل على سطح الدار
مستنى يجيله السلم
لكن مستنى على نار
والسلم عند النجار
والنجار عايز مسمار
والمسمار عند الحداد
والحداد سافر برّه
وسألنا عليه ميت مرّة
أتاريه بعد ما لف ودار
عاد الحداد من بره
لكن معملش المسمار
ما خلاص ركب المرسيدس
وفلوسه فى البنك كتار
ومازلنا عايزين سلم
ومازال عطلان النجار
هيسافر هو التانى
ويواصل نفس المشوار
والراجل فى الحدوتة
مستنى على سطح الدار !
بيكيا !
بيكيا
* بيبيع إيه ده
سألتنى البت ام احمد
بنت الريس عبهادى
وانا أصلى فى العزبة دى
يعنى مانيش واحد عادى
دا انا باضرب واقسم واحسب
وقرايتى زى اللبلب
شوف بقى سنتين فى المكتب
حدا سيّدنا الشيخ نادى
كان عكازه بيهرينا
لو يغلط واحد فينا
وعشان كدا حين شبّينا
بقى منّا دكاترة ومنّا
محامية وأفندية
حتى انا بقّال أرديحى
لكن بيقولوا علىّ
رأسمالية وطنية
حافظ أقوال مأثورة
ومتابع دورى الكورة
وافهم لا مؤاخذة سياسة
أكتر من شيخ العزبة
وكتاب الله ما هى كذبة
أصلى اتربيت فى البندر
مع خالتى وجوزها عنان
راجل بواب وتشوفه
تفتكره من الأعيان
ونهايته رجعت العزبة
هنا وفتحت الدكان
ويوماتى بالمّ زباينى
حتى امّا باكون عيّان
وافضل اكح وأتنحنح
كدا زى بتوع الراديون
واقرالهم فى الجرنان
مرجوعنا بقى لموضوعنا
بقى لما البت ام احمد
سألتنى دا بيبيع إيه
قلت لها يا بت ياهبلة
بيكيا يعنى روبابيكيا
والروبابيكيا معناها
لو عندك حاجة قديمة
تنادى له وتبيعيهاله
وأكيد طبعا هتبيعى
لو جه معدول فى فصاله
* يا حلاوة ، دا ولا فى السيما
افرحى يا حاجات يا قديمة
والله وشفتى لك يوم
بعد ما كنا بنرميكى
قبلى العزبة على الكوم !
.......................
البت ام احمد جريت
ع الدار زى الرهوان
وشوية ورجعت تانى
ومعاها اشكال والوان
إشى مقطف وإشى طاقية
واشى شىء كان يوم جلابية
وحاجات هلكانة وتقرف
وعليها جيوش دبّان
حجبت عن عينى الرؤية
وعن الناس الدكان !
قلت لها بذمتك انتى
دى حاجات تتباع يا ام احمد
إنشالله يا شيخة ما توعى
ولا توعى تخلفى أحمد !
.............................
البت اتقمصت منى
وجريت ع الدار زعلانة
ولّعت سيجارة وقاعد
فإذا بالبت تهانة
والبت تهانة السودة
دى مافيش فيها الا لسان
بتقوللى ام احمد قاعدة
تدعى عليك وقت أدان
قلت لها صحيح ؟ حلفت لى
فناولتها فص لبان !
بيكيا
جيت والله ف وقتك
وندهت عليه قام جاى
وعزمت عليه بسيجارة
وعملت له كنكة شاى
وسأله ازاى الحال
إنشالله كدا يكون عال
قاللى ولا عال ولا حاجة
وكتاب الله ولا حاجة
م اللى عرضوها علىّ
يرضى ياخدها الزبال
قلت له شوف بقى يا معلم
اسمعنى الله يهديك
لفيت العزبة بحالها
واللف وجع رجليك
وعرفت احوال عزبتنا
بعد ما شفتها بعنيك
ونصيحتى لك يا معلم
لو تسمعها هاتغنيك
تطلع من هنا ع البندر
ربنا يفتحها عليك
تجمع حبة روبابيكيا
وتخش البدلة الشيك
بعدين ترجع عزبتنا
تفتح لك فيها بوتيك !!
والنبى يا مّه
والنبى يا مّه قولى لابويا
يدينى ريال
أو نص ريال
أو ربع ريال
قولى لابويا والنبى يامه
****
أشترى يامه لحسة شامبو
بيقولوا يامه فيه ناس حطوه
بيخلى الشعر الزفت جاتوه
والنبى يا مّه
****
أشترى يا مه عربية بيجو
بيقولوا يامه اللى ركبها شافوه
يتأنزح حتى على امه وابوه
والنبى يا مه
****
أشترى يامه دستة ميلامين
بيقولوا يا مه انه لطيف ومتين
نصبح يا مه من البنى آدمين
والنبى يا مه
****
أشترى بيه شهادات استثمار
بيقولوا يا مه فوايدها كتار
واللى ماعندوش هيروح النار
والنبى يا مه
****
احجز بيه تليفزيون ألوان
فيها إيه يعنى اما نبيع فدان
ونعيش زى الناس الأعيان
والنبى يا مّه
****
أشترى بيه " مرقة ماجى " واهيص
واتمرد على مِش البلاليص
وان عزّ التوب نلبس قصاقيص !
والنبى يا مّه
****
أشترى بيه " أولد سبايز " افوق
والناس تعاملنى برقة وذوق
وامّا اغلط عمرى ما اكون محقوق
والنبى يا مّه
****
أشترى بيه رز من الدكان
ويا خوفى يا مّه الوقت يكون حان
نتفرج ع الرز ف إعلان !
والنبى يا مّه !
بعجر سلكاوى الأهلاوى
بعجر سلكاوى الأهلاوى
كان فلاح من شلشلمون
سمّوه سلكاوى عشان عدَّى
م السلك وجاب تليفزيون
والأهلاوى عشان بيحب
النادى الأهلى لكن بجنون
يعنى حيطان بيته اللى بناه
م الألوفات الراجعة معاه
والشبابيك وعصاية الجحشة
واخدين نفس اللون اياه
نرجع تانى لقصة بعجر
والصاحى يوحّد مولاه
بعجر كان جدع ابن حلال
غير دراعينه مالوش رسمال
بس يا ولداه عنده عيال
ومالوش فى الشغل البطال
قصر القول عدمان الحال
لا اللقمة ولا الهدمة نضيفة
ولا فيه فى الجيب ولا تعريفة
والتعريفة ساعات بتكون
حلم عشانه الروح بتهون
مد ايديه بعجر للناس
لما بقى عليه تل ديون
والفقر كما شيطان ملعون
والعوزة جنون أى جنون
مشى فى السكة العوجة وياما
مشى بهوات فى السكة العوجة
لكن فيه قوانين فى بلدنا
ما تجيش إلا على المطحون
دخل السجن ، خرج م السجن
يحب السجن فعاد للسجدن
فأصبح بعجر وش سجون
وهناك خد فكرة عن السلك
عدّى السلك ، عاد م السلك
أصبح بعجر صاحب ملك
شاف الكورة ، حب الكورة
شجع كورة ، أصبح يقعد
فى المقصورة
بعجرنا أصبح أهلاوى
مع إنه لا لعيب ولا غاوى
لكن ناوى
يبقى مهم بأيها شكل
ويغيّر أصناف الأكل
حتى الغيط الماصص منه
لحمه ودمه أصبح ( حكل )
زى ما بتقولها المذيعات
فى الراديو وفى التليفزيون
أصله خلاص مابقاش مطحون !
بعجرنا كان إيد شغّالة
أصبح بعجر إيد بطّالة
أصبح عالة
كان متبهدل ع السقّالة
أصبح بيخاف م السقالة
إيده المشهورة بخشونتها
لجلن تخلق لقمة عيش
صبحت إيد همدانة جبانة
بتاخد لكن مابتديش
بعجر مات
الإنسان الشهم الساكن
تحت الجلد ف بعجر مات
شاف بهوات الانتخابات
خش ف لعبة الانتخابات
وبلحاليحه اشتدت ريحه
خد بعجر أعلى الأصوات
واحنا تملى على دى الحالة
خش الجلسة ، نام فى الجلسة
صحّوه قبل نهاية الجلسة
سألوه شايف إيه فى الجلسة
قال اللى شافوه الرجالة !
والرجالة فى الاجتماعات
دايما يتناقشوا ف تفاهات
وتطول وتطول اجتماعاتهم
وتكون فى الآخر قراراتهم
شكر لواحد م البهوات
نعى بريمو لواحد مات
تبرير زايف للأزمات
هتافات ، شعارات ، سيما أونطة
هى دى لعبة الانتخابات
بعجر مات
بعد ما كان جواه إنسان
من غير عزوة ولا فدان
لكن كان مخلص وأمين
كان مزروع فى الطين والطين
غالى على اللى ماعندوش طين
جد جدوده كان مع أحمس
جده استشهد يوم حطين
عمه وابوه أول من حاربوا
بشهامة ف حرب فلسطين
هو واخوه أول من عدّوا
يوم حرب تلاتة وسبعين
بعجر عدّى وعاد من سينا
وف ظنه الدنيا هتدينا
أتاريه واتاريكم واتارينا
كلنا سارقانا السكينة
بعجر فكر ، بعجر شار
بعجر قرر ، راح مشوار
عدى السلك الشايك خايب
عاد م السلك الشايك جايب
أصبح خيره ف داره زكايب
أصبح بعجر قط سمين
بعجر يحلم بالألوفات
أصبح يلعب بالملايين
واحنا اللى قرينا الكتوبات
ضايعين قدام البتارين
حلم حياتنا بحالها قميص
على جوز جزمة وبنطلونين !
…………..
رحت لبعجر بيه ينصحنى
قال حاجة من اتنين تغنيك
يا تكون سلكاوى وتعدى
يا تخليك وتكون سلّيك
سامعة يا مصر ؟ فاهمة يا مصر
اصحى يا مصر ، فوقى يا مصر
عهد علىّ يا مصر لا هابقى
ولا سلكاوى ولا سليك
لكن هافضل عايش فيك
حتى يهل الفجر عليك !
يتيم معاه جامعة
خرج الولد م البلد ووجهته الجيزة
وف جيبه حق الحلق وف سدره تعويذة
ما هنو أصله خد يا مّه
ثانويته العامة
وهيدخل الجامعة
المجد قدّامه
وف قلبه أحلامه
وفى العيون دمعة !
****
أم الولد فى البلد عاشت على الدُّقة
لجلن يعود الولد ويزقّها زقة
ماهو أصله هيواصل
ويعود لها واصل
حسب ما هى سامعة
هايجيب لها جزمة
وتنتهى الأزمة
والفضل للجامعة !
****
عاد الولد للبلد وشهادته قد كدا
كل اللى ناب امه منه فاتحة فى السيدة
ماهو أصله عاد لامه
يحكى لها عن همه
وهى مش سامعة
أم الولد ماتت
وفى البلد فاتت
يتيم معاه جامعة !
يوم ما يرتاح الحمار
الزمان المغربية
المكان جوه الزريبة
فى الزمان دا والمكان دا
الجاموسة والحمار والكلب دايما فى اجتماع
بعد ما بيعلفهم الواد اسماعين أبو السباع
ياكلوا بعدين يشربوا من طشت جايباه ست لاف
بالمناسبة العبد لله لف واتغرب وشاف
بس طول عمرى ما شفتش بنت غير البنت دى
بيقولولها يا ست لاف !
ست لاف إيه بس ؟ يعنى كان على ايامها الأسامى بالفلوس
ثم لوكانت بتنباع بالفلوس ما هى تبقى غالية
كانوا هيسمّوها لو كرموها سبعة أو تمانية
قصدى بالحكاية دى أقول لك إن فيه أسماء غريبة
وحاجات فى كفرنا فعلا عجيبة
فمتستغربش للى هتسمعه جوه الزريبة
****
* قوللى يا حمار ، انت مالك ؟ ياترى مشغول بإيه ؟
قوللى مش جايز أساعدك ؟
- وانتى هتساعدينى ليه ؟
انتى يا جاموسة جاموسة يعنى شغلى مالكش فيه
كل واحد له اختصاصه
واللى عقله ف وسط راسه
ما فى شئ يصعب عليه
* انت حر ، انا كل قصدى تقوللى ع اللى انت مداريه
- وافرضى انى هاقول حكايتى وانك انتى هاتسمعيها
وان هذا الكلب راح يفهمنى وانتى هاتفهمينى
ايه اللى هيجيلى قوليلى م الحكاية والرواية ؟
هل فى إمكانك بقى بعدن ما هحكى تريّحينى ؟
* كل شئ جايز مافيش شئ مستحيل فى الدنيا ديّه
يا ما جرّيت محاريت ودرت فى سواقى عفيّة
شوف بقى حالى النهارده وراحتى وحياتى الهنية !
السواقى بقت مكن بيدوّروه من غيرى انا
واختفى المحرات وجابوا وابور يدور بمدخنة
ضحكت الدنيا لجاموسها بعد شقا مليون سنة !
- وانت إيه رأيك يا كلب فى اللى بتقوله الجاموسة ؟
=اللى بتقوله الجاموسة صحيح دى مش عايزة كلام
أنا برضه ارتحت فعلا ع الأقل بقيت انام
الزرايب والبيوت مبنية بُنا آخر تمام
يعنى صعب على الحرامى مهما كان ابن حرام
إنه يسرق أى حاجة وبكدا اطمنت نمت
دنيا مافيهاش حاجة دايمة
- أيوه أيوه خلاص فهمت
تقصد انك كنت دايخ فى حراسة الدار زمان
فبنوها ونوّروها وبكدا آن الأوان
لك عشان ترتاح وتنسى كل أيام الهوان
كل دا صحيح بس بالنسبة لوظيفتى غير صحيح
ودا هو سبب تعاستى ، يعنى بالعربى الفصيح
البيوت والكهربا دول شالوا عنك ألف حوسة
والمكن والبوابير اتحملوا شغل الجاموسة
وعشان ارتاح لابد الفلاحين تركب تكوسة !
بقية ثصائد ديوان بيكيا على الصفحة التالية
لا يوجد