حدوتة
كان فيه ولد شاب وبنية
قام الولد عشق البنية
سكن الولد قلب البنية
واتعاهدوا يومها ع الجواز
****
راح الولد فى يوم لابوها
ومعاه قرايبه يخطبوها
قال هاتوا شقة وجهزوها
وعلينا جانب م الحهاز
****
ضاع م الولد زهرة شبابه
ومن التعب صابه اللى صابه
كل اللى مطلوب منه جابه
حتى النجف والبوتاجاز
****
لكن وما باليد حيلة
الشقة كانت مستحيلة
مطلوب خلو بالقليلة
قد اللى مصروف ع الجهاز
****
كان فيه ولد شاب وبنية
رايداه وبيحب البنية
ولا ذنبه ولا ذنب البنية
باعوا سوا دبل الجواز !!
حالة حمل
دخل العيان ع الدكتور
قال للدكتور: غيتنى يا بيه
دايما نفسى تغم علىّ
ومدروخ مش عارف ليه
كشف الكتور ع العيان
وضحك بعد الكشف عليه
قال له اما انت تقول عن نفسك
عيان أمال ابقى انا إيه ؟
دا انت ما شاء الله فيك صحة
تقدر تسحب بيها وابور
قلبك ما فيهوش شئ بالمرة
تقدر تطلع عاشر دور
نبضك عادى وضغطك عادى
وكلك كدا على بعضك عادى
والإنسان العادى يا عم
الشيخ شئ نادر فى الدنيا دى !
قوم ربنا يديك العافية
ويديم الصحة دى عليك
دا انت مافيش ميكروب فى الدنيا
وانت كدا هيأثّر فيك !
* قلت انا عيان يا ابن الناس
ما عليك غير تكتب لى علاج
دا انا مستورة معايا وأشيتى
معدن ، يعنى مانيش محتاج
أقدر اجيب الدوا لو حتى
هايكون تمنه عشرة جنيه
الحالة اللى انا قلت عليها
شخصها وشوف اسمها إيه
واكتب لى روشتة ويبقالك
منى الشكر وخد أتعابك
- با الحاج ارجوك تفهمنى
واهدى بلاش تتعب أعصابك
بعد الكشف عليك وحياة النبى
ما انا شايف عندك شئ
* يا ابنى اكتب لى علاج ريّحنى
انشالله مايرمكش ف ضيق !
-مش معقول أبدا هاتجنن
الأعراض اللى انت قايلها
شايف انها مش ممكن أبدا
تجرالك لما باحلّلها
* ليه بقى ؟ هوانا كداب يعنى
دا انا راجل رسمالى إيمانى
- ع العين والراس قولك لكن
طبى أنا بيقول شئ تانى
* بيقول إيه فهّمنى لا ماخذه
جايز اكون انا راجل جاهل
والأمثال بتقول فى بلدنا
إن العلم ماهوش بالساهل
- يا با الحاج ان كانت حالتك
كدا فهتبقى أصعب حالة
أصل دى حالة حمل وحالة
الحمل ما بتجيش للرجالة !
* طب ما انا عارف
- بتقول عارف
انت يا راجل هتجنّنى ؟
* بس اسمعنى وطوّل بالك
زى ما تدينى خد منى
- حاضر يا با الحاج انا سامعك
أرجوك اتفضل فهمنى
بس احكى لى بدون تفاصيل
والله حكايتك هتجنّنى !
*شوف بقى يا ابن الناس الأمرا
اللى انا قلته كله تمام
هى الأعراض دى بحذافيرها
بتجيلها من ست ايام
- بتجيلها ؟ بتقول بتجيلها
* أيوه امال ، لجماعتى بهانة
- يعنى مش انت بقى العيان
* لأ طبعا هى العيانة
- طب ليه هى ما جتش معاك
* تيجى معايا ؟ يادى العيبة
دا انا راجل شهم يا دكتور
على رأى الناس شيبة وهيبة
معقول اودى جماعتى بإيدى
تتحدت مع سخص غريب
- حاجة غريبة لهو ّ كمان
الكشف الطبى فى رأيك عيب ؟
* لأ مش عيب ، بس الرجالة
ممكن تغنى عن النسوان
فى الشغلة دى وادينى حكيت لك
من غير تزويد ولا نقصان
كان ممكن تكتب لى روشتة
ودا شئ سهل وفى الإمكان
لكن أصعب شئ فى الدنيا
إنها ع الرجالة تبان !
- لو حتى فرضنا ان دا جايز
لكن حتى على الكتور ؟
* طبعا تدارى وتدّارى
لا مؤاخذة حتى على ( الطور)!!
بقية قصائد ديوان بيكيا على الصفحة التالية