زينة الصبايا

زينة الصبايا يا مصر يا زينة الصبايا

قلبى فدا ترابك وحبى لك حكاية

أرويها وارويكى بعرقى ونبض قلبى

ولا لىّ بعد رضاكى عنى أى غاية !

****

من كهربة أسوان لاجيب العقد ليكى

وبخضرة الصحرا لاحنّى لك إيديكى

وافدى بعمرى كل حبة رمل فيكى

ياللى فى ضلّك وف هواك بيهون شقايا

**** 

قلبى نبات اخضر رواه النيل محبة

واشتد عودى يا مصر بيكى حبة حبة

شبّيت وانا واهب شبابى لأغلى شابة

ليكى يا نبع الحب والخير والهداية

****

عطشانة سينا لسلسبيل النيل وهىّ

من يوم ما كانت طفلة بتشابى البنية

ع النيل ، وآن ليها الأوان سينا الصبية

تحضن حبيبها النيل ويعلى الحب راية

****

من بعد صبر سنين تبوح بالسر لينا

وتقول لنا سينا الرمال مش هى سينا

سينا المداين والجناين بتنادينا

سينا الرمال رايحة وسينا الخضرة جايََة

****

نادى علينا والبعيد هنقرّبولك

لو حتى فى نجم السما إحنا نجيبولك

دا اللى فى ساعة شدتك ما يطعشى قولك

مايكونش فارس ليكى يا زينة الصبايا

****

يا ام الرجال يا مصر يا ضامّة صفوفنا

أرواحنا اهى شايلينها والله فوق كفوفنا

دا احنا اللى هدّينا جبال الخوف ما خُفنا

هانعيش نحبك م البداية للنهاية !

كان عندنا غية

كان عندنا غية ساكناها قمرية
كانت تحب الأغانى والملاغية
طارت بخفيّة ، حطّت بحنية
راح كل شئ منها ما خدتش شئ هىّ !
****
القمرى ابو القلب غيطى والجناح نيلى
حوّم على الغية غنّى المواويلى
وقال يا قمرية رايدك تعالى لى
****
القمرى ابو القلب زيتى والجناح دهبى
حوّم على الغية لكن ويا عجبى
لا قال يا قمرية رايدك ولا قرّبى
****
القمرى لاخضر رايدها تروح معاه داره
تقسم معاه لقمته وتقاسمه مشواره
والقمرى لاسود نفش فوق عشها ريشه
قالت نعيشو سوى وع الهرم طاروا !

أحلى الكلام

يا مصر يا بلسم المجروح
يا روح الروح
يا أطهر عطر فى الدنيا علينا يفوح
يا شجرة حب تحت فروعها ضلتنا
يا بحر حنان وشط أمان يا غنوتنا
يا لقمتنا وهدمتنا
يا غرتنا ولمتنا
يا أحلى نغم باحنّ إليه فى عودى يا مصر ؟
****
يا مصر يا قبلة الإنسان فى كل زمان
يا إيد ممدودة بالإخلاص فى كل مكان
يا أرض الجود
يا بحة ناى ورنة عود
يا جنة واللى بالجنة يكون موعود
بيبقى يا مصر من باقى البشر محسود
تعيشى وتسلمى ودايما تسودى يا مصر
****

يا مصر يا نبع حكمة ونور لكل الناس

يا أرض بتدّى خير مع كل ضربة فاس

ودايما يا حبيتى يا مصر ولادة

ولادك ع الدوام بين البشرسادة

وحبنا ليكى أصبح عادة وعبادة

مافيش غير بس حب الله يفوقه يا مصر !

****

يا مصر يا كلمة مكتوبة بحروف من نور

ومهما يلف يا غالية الزمن ويدور

هواكى يا أمى فى قلبى شباب ما يشيب

يزهّر عوده ، أزهاره تطيب وتطيب

ويصبح واحة فوّاحة بعطر وطيب

وحواليكى تطوف روحى بشوقها يا مصر

****

يا مصر يا لحن صافى المغنى والمعنى
يا أم ف حضنها الدافى بتجمعنا
وبيقولوا اللى يشرب يامّه من نيلك
مسيره مهما طال البعد بيجيلك
لدفا دارك وآثارك ومواويلك
وأرضك منبت الخير الوفير يا مصر

****

يا مصر يا قبلة الحرية والتمدين

يا حصن بيحتمى فيه كل صاحب دين

كليم الله ويوسف والمسيح سكنوك

وماريّا وهاجر للعُلا رفعوك

وآل البيت بآيات الكرم غمروك

وخير المرسلين ذكَرك بخير يا مصر !

****

يا مصر يا ضحكة فى عيوننا كبار وصغار

هاقوللك ايه ؟ قليل لو تقدر الأشعار

تعبر عن أحاسيسى اللى جوايا

هواكى يا مصر كان مولود هنا معايا

كبرت وكان بيكبر برضه ويايا

زَرَع جوايا إحساس بالكرامة يا مصر

****

هاقوللك ايه يا أمى وانتى إلهامى

وحبك مالى وجدانى وأيامى

ومن صغرى وانا شايلك فى سدرى حجاب

وحبك هو نور قلبى وقلبى شباب

ولو سجلت أشواقى فى ألف كتاب

هايتبقى كلام جوايا ياما يا مصر !

 يا سيدى القاضى

ياسيدى القاضى

أنا مانيش راضى

ومش هكون راضى

ما دمت فى الحاضر

كما كنت فى الماضى

حالى عدم وانت

عن حالى متغاضى

عيالى عريانة

وبطونها خويانة

والعيلة بالكامل

م الفقر عيانة

لا لقمة بتكفّى

ولا هدمة بتدفى

ولا قرش فى كفى

ولا انت فى صفى

و( عُمَر)  خلاص مابقاش

بيجينا متخفى

يداوى مواجعنا

وعشان كدا ضعنا

يا سيدى القاضى

بلاش تواسينى

موت طموحى انت

واحيينى واحمينى

دا عيالى م العوزة

لىَّ بتشكينى

وتفِرّ من عينهم

دمعة تبكينى

يا سيدى القاضى

وان كنت مش راضى

معذورعشان باشقى

وارجع لدارى القى

صحن العيال فاضى !!

 بين الرمش والننى

الشعر والمغنى فنى من خضار سنّى
وان كنت اغنى ما اغنى غير لناس منى
لقمتنا من قمح غيطنا والغموس م النيل
ومصر شايلينها بين الرمش والننى ؟

رسالة من رمال سينا

أمانة عليك يا أعظم أم فى الدنيا ما تبكينا
ولا تلفّى فى توب الحزن أسامينا
كفاية ان احنا عدينا وعلّينا
على الشط الحبيب الراية بإيدينا
وخلينا سنابلنا قنابل تحمى وادينا
وادينا فتحنا باب نصرك ويكفينا
فى لحظة حب يوم آخر وداع لينا
بأكتر من حنان الأم حضنتنا
رمال سينا !
وطول عمرك عزيزة علينا والله يا مصر
يا دُرّه فوق جبين العصر
يا حب كبير ملا قلوبنا
ولا يعرف حدود و لا حصر
****
ويكفينا اننا يومن ندهتينا
بكل حماسنا لبينا
وقلنا لك فداكى الروح
وايه الروح اذا خاطرك يبات مجروح
أمانة عليك يا أعظم أم فى الدنيا
تخلينا غنا ومواويل
تخلى عبورنا حدوتة يقولها ولادنا جيل ورا جيل
أمانة عليك لتسقيهم عُكارة النيل
يحبوا النيل , يشبوا ولاد شداد الحيل
كما كنا فى كفاحنا المر ولا بنمل ولا بنميل
لا هيملّوا ولا يميلوا
وهيزيلوا آلام الجيل
يجيبوا الفجر , فجر النصر , تعيشى العمر كله يا مصر
صبية عفية ولادة
ولادك سادة ضارب جدرهم فى الطين
ويوم الشدة متواعدين
يهبوا , يحاربوا , يتحَدّوا
يعدوا بحور ولو كانت بحور من دم
ويفدوا بالعزيز الغالى أعظم أم
****
أمانة عليك ما تنسى ف يوم وصيتنا
وخلى الشجرة تحكى للنبات الأخضر حكايتنا
وحكمتنا تهفهف بيها نسمتنا
بطول الوادى وبعرضه
ما عاش من عاش وخطوة غريبة فوق أرضه
ما عاش من لم يأدى للوطن فرضه
ما عاش إنسان إذا ما هان عليه عرضه
كدا كانت مبادئنا
نصادق من يصادقنا
ويوم نلقى العدا نسكت وتتكلم بنادقنا
كدا كانت مبادئنا
نحب الخير لناس بتحب لينا الخير
نحب العزة والحرية والتعمير
نحب القمرى والقمراية والكروان
نحب يحبنا الإنسان فى كل مكان
لكن أبدا مبنفرطش ف حقوقنا
بيجرى النيل بنبض الثورة فى عروقنا
كدا كانت مبادئنا
وادينا مشينا أول خطوة للتحرير
وباقى كتير
لحد ما يكمل المشوار
ويطلع فوق سماكى نهار
أعز نهار وأغلى نهار
نهار النصر
وطول عمرك وهتدومى
عظيمة يا مصر !!

حكاية لسطى بلية

لسطى بلية وعمره ستاشر سنة

كان صبى ميكانيكى ويّايا أنا

بس كنت ايامها كاتب حسابات

عند واحد عنده ورشة سيارات

والحكاية م الأساس

لما خدت الثانوية العامة وبمجموع كبير

كنت محتار اعمل ايه وانا ابويا مش بس فقير

لأ دا هو الفقر ذاته !

فى الشقا ضيّع حياته

وجميع ممتلكاته

إيد نحيلة شايلة فاس

واحنا كنا خمسة م الصبيان وأكبرهم أنا

أما أصغرنا فكان طفل رضيع ابن سنة

وتلاتة بنات وأصغرهم على وش جواز

مكتبى طبلية العيلة وفوقها لمبة جاز

والعيال اخواتى نايمين يعملوا أصوات نشاز !

رغم دا كله أخدت الثانوية

وتركت الزرقا بلدى وجيت لمصر

ودخلت الجامعة وبرغم الدراسة المجانية

إلا إن أبويا شاف الويل عشانى

استلف م الناس ورهن البيت وحتى

عفش بيتنا الأثرى باعه حتة حتة

ثرت ، قلت ف نفسى لأ ولحد إمتى

عيلة بالكامل تموت م الجوع عشان واحد يعيش ؟

وبَعَت جواب لابويا قلت له ماتبعتوليش

ولا مليم م البلد ولا جبنة ولا بيض ولا عيش

وابتديت اسعى وقلت : ربنا ما هينسانيش

ولأن الوالدة راضية عنى والوالد داعيلى

بعد كلم يوم كنت كاتب حسابات

بتمانية جنيه فى ورشة سيارات

عند واحد يبقى خال طالب زميلى

والحقيقة الراجل اما عرف ظروفى

كان مريحنى فى شغلى وفى الحساب

وابتديت آكل وألبس شيك تماما

زيى زى أى طالب فى الآداب

وانا طول عمرى مادخنتش سيجارة

أو عملت فى يوم لبيت مشبوه زيارة

مش نزاهة أو نباهة أو شطارة

إنما اللى القرش بيجيله بمرارة

واللى ساكن فوق سطوح بيت جوه حارة

يعرف ان السكة دى سكة خسارة !

........................

المعلم شاف فى دخله فيه زيادة

وان شغل الورشة بيزيد كل مادة

اتبسط منى وزوّد لى الماهية اتنين جنيه

وبدأ يعزمنى عنده ف بيته ويقرّبنى ليه

وهناك فى البيت بقيت اشرح فرنساوى لآمال

وآمال بنته دى كانت طيبة وبنت حلال

وبطبيعة الريفى مابيعرفش فى أصول الدلال

التقيتنى بقول لها احساسى ناحيتها بحق

والبنية برضة كانت معجبة مقلتش لأ !

واتفقنا ع الجواز من بعد ما اتخرج أنا

يعنى حالا ، أصلى كنت ايامها فى آخر سنة

وأخدت شهادتى واتعينت اخصائى اجتماعى

درجة سابعة كادر عالى بعد حرمانى وضياعى

وجريت ع الورشة رحت اقابل الريس بتاعى !

قلت له أنا جى طالب القرب منك فى آمال

قال لى وآمال عمرها ماتغلاش عليك يا ابن الحلال

إنما أنا اصلى خلاص رابط كلام مع لسطى بلية

بلية دفع المهر والشبكة وعنده شقة عال !

o      انت بتقول ايه ؟ صرخت بعصبية

          بلية يتجوز آمال الجامعية ؟!

-       ايوه يا ابنى ، وفيها ايه ؟

o      لكن يا ريس    !!!!!

-       بلية اسطى وعنده مستقبل كويس !

......................

والحقيقة كلامه كان له حق فيه

كل دخلى الشهرى كام ؟ عشرين جنيه !

أما بلية فدخله فوق الميت جنيه

وعشان حبى لآمال بنت المعلم

دُسْت على قلبى وقلت اظلمها ليه ؟

وانسحبت من المكان وف عينى دمعة

وآمال كانت هناك شايفة وسامعة

واتخذت قرارى هتجوز واخلف

وابنى بلية

مش هيتعلم فى جامعة !!

أنا

أنا عود نابت فى الريف
نازل مدينتكم ضيف
واخد زوادتى من امى
حزمة جلاوين ورغيف
لا تاجرت ف يوم بكلامى
ولا من طبعى التزييف
بَرايا يجوز ما يسُرش
لكن جُوايا نضيف !!

 حريقة فى دار الزناتى

حريقة , حريقة , و دار الصويت
ومن كل حارة ومن كل بيت
لقيت الخلايق بتجرى جريت
أتارى الحريقة فى دار الزناتى
ودار الزناتى
على يمينها دار عم عبده الناياتى
وقدامها دار بنت خالة مراتى
ويادوب دقيقة
وطاحت فى كل البيوت الحريقة
خلعت الهدوم وخلعت المداس
وقلت لمراتى غيتينى بفاس
وفزى الحقينى بسرعة شوية
تجيبى مع الخلق كام طشت ميّه
****
وفقت التقتنى على السطح واقف
مع الخلق عمال بازيح فى الوقيد
وكل ما نرمى شنيف نلقى غيره
يولع , و نلقى الحريقة تزيد
ونسوان تصوت وأطفال تعيط
وبط وفراخ هاجّة ، وحمام يطير
وخالتى رئيفة أم زيد قالعة راسها
ورافعه ايديها تقول يا مجير!
مفيش حد فى العزبة اسمه مجاش
دا حتى اللى بينه و بين الزناتى
خلاف أو زعل برضه جه متواناش
ما هو احنا أن قعدنا ومطفناش
بيوتنا وعزبتنا هتروح بلاش
مفيش حد منا الا عنده وقيده
ونار الحريقة أما تاخد براحها
ولا قدر الله فى لحظة تبيده
*****
نهايته ما فتش يا دوب ربع ساعة
وإيد ربنا معانا زى ما قال
لنا ( الشيخ فريد ) حين بنيقى جماعة
طفينا الحريقة
وع المسطبة فى الطراوة قعدنا
ومنا اللى نام
وبديول هدومنا مسحنا عرقنا
وبعد ما فقنا بدأنا ندردش
وناخد وندى سوى فى الكلام
مفيش فيك يا عزبة حريقة قديمة
الا جبنا سيرتها وحكينا عليها
برغم اننا احنا اللى قاعدين جميعا
بنبقى سوى واحنا بنطفى فيها
اذن فاللى بحكى بيحكى لمين؟
متعرفش , ده طبعنا أجمعين
ووارثينه من الفات السنين !
*****
نهايته , هوا العصر لما لفحنى
تعبت قوى وحسيت انى دافى
ولسه يا دوب كنت قايم مروح
ما نلقالك الا وابور المطافى
أتارى ياسين ابن عمى موافى
فى وقت الحريقة جرى ع الكبينة
وطلب المطافى وخبى علينا
*****
نهايته وقفنا جميعا ورحنا
نسلم على اللى جايين فى الوابور
وقلنا لهم أن احنا برضة بنفسكم
طفينا الحريقة ف خمس ست دور
يا اهلا وسهلا يا ميت الف مرحب
دى عزبتنا زارها الهنا والسرور !
*****
لقيت الكبير اللى فيهم بيندهلى
وسالنى فين المكان اللى فيه
طفيتوا الحريقة , فقلت الحريقة
دى كانت فى دار الزناتى يا بيه
وسبب الحريقة ان كانت مراته
بهانة بتخبز فى نفس المكان
وكان الهوا صعب حبه النهاردة
فكان المقدر وكان اللى كان!
*****
وكتب الكلام ده فى نوتة معاه
وقاللى وحيث جيت وملقتش حاجة
ودا بعد ما وصلنا منكم بلاغ
ففيه محضرين للزناتى خفاجة
سمعت الكلام أضايقت وقرفت
صحيح احنا بلغنا نطلب وابور
وأزعجنا سلطات وعطلنا قوة
وجانا الوابور مالتقاش الحريقة
ما يكتب يا سيدى انه طفاها هوّ !!
نحايله ندايله مفيش فايدة فيه
وجت فكرتى وانا واقف مكانى
فقلت يا ناس يا اهل عزبتنا شوفوا
وأصلى انا كلمتى فوق لسانى
بدال ما الزناتى خفاجه يروح
ويدفع هناك الشئ الفلانى
لأن الوابور جا وملقاش حريقة
ما تيجو بسرعة نولعها تانى !!

 آخر الكلام

واعلم يا صديق العمر يا نبت الريف
ان قضيتنا بأكملها حاجتين اتنين
كلمة صريحة بنقولها من غير خوف
ورغيف !!   

رقم الإيداع 2335 لسنة 1977 م

          مطبعة نور الأمل / السيدة زينب