جارى التحميل
استخدم زر ESC أو رجوع للعودة
3
مافيش ثواب لك - فى رأيى - لما تدبح كبش
وتفرقه ع الغلابة اللى انت نازل هبش
فى حقهم م الوطن واللى عملته يادوب
عيار عمل فرقعة فى الجو بس ماصابش !
****
بلاش تقولوا فراعنة ، قولوا مصريين
وشجعوا بحكمة وبأسلوب حضارى رزين
ماتش الجزائر لا هو عين جالوت تانية
ولا فوزنا فيه عمره هايخليه شبيه حطين !
****
باعتب عليكى يا مصر عشان ماليش غيرك
وبرغم حبى الكبير حارمانى من خيرك
عايش فى هامش صحايفك بس مش ندمان
وهاموت فى حضنك بأنفلوانزا خنازيرك !
****
وكان سؤاله البرىء: فين ماما يا جدو؟
على سؤال مصطفى يا مسئولين ردوا
مروة الشهيدة بتطلب م الوطن ياخد
يتارها مش عايزة دمعة حزن فوق خده !
****
لو ( كُسكُسى ) بليدة الشهير كان سبب
غير منطقى - فى هزيمة المنتخب
أنا واثق ان هزيمته م الأمريكان
( قلعة ) غرور مش ( وكر) قلة أدب !
****
الطفل إسلام شهيد ( العِلم ) فى بلادنا
جعل قضيتنا – بعد ما أدمى أكبادنا -
محصورة فى سؤال محدد ، هل مدارسنا
تقدر تعلّم صحيح وتربّى أولادنا ؟!
****
الطالبة آية زهرة رقيقة لسّاها
إحساسها بالظلم خنق الفرحة جوّاها
امتى هتتكرمى يا وزارة التعليم
وتبينيلنا الحقيقة اللى انتى عارفاها !
****
المية مسمومة والا إشاعة مرسومة
سؤال برىء من خلايق صابرة مهمومة
مش جايز ان اللى بيعبيها فى قزايز
عايز يبيع اللى مركون عنده ياحكومة ؟!
****
يا (قهر زاد) خلى الملك (شجبيار)
ياخدها جد بقى وينسى الهزار
كرسى الشهيد احمد ياسين القعيد
إنذار لأصحاب الكراسى الكبار
****
يا رأسمالية يا متوحشة غورى
بعتمتك ، خلى خلق الله تشوف نورى
أنا العدالة اللى عطلتيها بغرورك
آن الأوان بعد غيبة يبتدى دورى !
****
خير الكلام دايماً ما قلّ ودلّ
ولكل عُقْدة قِدر يقدِّم حل
وانا باختصار جداً باحاول أقول
كل اللى جوَّايا ، عسى ولعل !
****
الحمد لله اللى نجا البشر
فى مصر من أخطار جنون البقر
وألف ألف تحية للجزارين
برفع سعر اللحمة زال الخطر !
****
بيقولوا تمر فخامة الرّيس اتجمرك
ادفع بقى الجمرك المطلوب على تمْرَك
يا شعبنا الطيب المغلوب على أمره
خُد قدوتك فى مواقفك من ولاة أمرك !
****
قضية النكبة بعد ما بلغت الستين
خايف ليبقى مصيرها مصير كتير عايشين
خارج حدود الاهتمام على قهوة المعاشات
مع إنهم كانوا برضه زيّها مُهمّين !!
****
لو كل دمياطى دفع أجر يوم
تعويض لها يمكن يبان فجر يوم
خلاصنا من كارثة وجود شركة
الموت البطىء اللى اسمها " أجريوم " !
****
تفتكروا لو إن عالم مصرى فى الذرّة
رغم احتياجنا إليه سافر بلاد برّة
على طريقة عصام الحضرى ، هل هانشوف
ضجّة مماثلة بشأنه ؟ أشكّ ميت مرّة !
****
يا أيها المبدعين فى كافة الميادين
لعّيبة الكورة قلبوا كافة الموازين
فقدت قيمتها ثقاقة العقل فى بلادنا
والأفضلية بقت لثقافة الرِّجْلين !
****
رجوع ولادنا بكاس أفريقيا من غانا
قدر يرجع لنا الفرحة اللى ناسيانا
تعالوا نفرح شوية لأننا ( فاصل
ونواصل ) الغوص فى مشاكلنا اللى خانقانا !
****
ألفين وسبعة خلاص بتلمّ كراريسها
واحنا الغلابة اللى كنا ضحايا كوارثها
مرشحين لسباق ألفين وتمانية
فى تحمّل الهمّ نبقى أهم فوارسها !
****
يا خمسة مليون جمع بينكم جبل عرفات
فى مؤتمر خالى م الخلافات والانحرافات
ليه بنلاقيكم فى مؤتمرات كتير تانية
وكأنكم مخلوقات من عالم الخرافات ؟!
لا يوجد