جارى التحميل
استخدم زر ESC أو رجوع للعودة
2
وكأن بوش قال ( أنا بوليس ) قاصد المعنى
بالعربى ، يعنى مافيش امتى ولا اشمعنى
يا حاضر المؤتمر بالأمر قول حاضر
وماتنساهاش ( ضدّنا كل اللى مش معنا ) !!
****
الفتوى بتقول حرام حرْقك لكن يا قش
الشعب قام فش فيك غيظُه ، لا خاف ولا كش
عشان حكومة السحابة السودا موقفها
مع الأسف من عيشتنا السودا موقف هش !
****
بعزم أولاده نال كاس آسيا فى الكورة
وبان كأنه فى دنيا اللعب أسطورة
عايزين نشوف للعراق فى الجد إنجازه
المنتظر يوم خروج أمريكا مقهورة !
****
فى خنقة الحر لما يهل فصل الصيف
بيبقى فوق الكبارى للغلابة مصيف
لطيف ، خفيف ع الجيوب ، لكن باقول يارب
اجعل كلامنا على مستثمرينّا خفيف !
****
هيرخّصوا ( التُوكْ تُوك ) خلاص ، مبروك
ومن مخاطره قرروا يحموك
لكن هيفقس بكره فى الشارع
مفعوص جديد من غير رُخَص ( تكتوك) !
****
فى العيد يقول الخروف يا ريتنى كنت حمار
وابعد بعيد عن خطر سكينة الجزار
سمعه الحمار قال له إنت بتندبح مَرّة
وانا باندبح بالمعاملة المُرّة باستمرار
****
صدِّك ملوش فايدة ، ربك باللُّـقا آدِن
ومهما حرب الدلال هتطول أنا مهادن
وخايف ادعى عليكى تدوخى دوخة ( بوش)
فى مطاردته بدون أمل لأسامة بن لادن !
****
معلوم (نتنياهو) نتن.. يا.. هووو
ووفَّروا أى كلام هتقولوه
اتجمعوا وواجهوه ، لو تقدروا
اتغيروا وساعتها هتغيَّروه !
****
يا مولَّعين الشمع ومزوَّقين
التورتة ، بقى بالذمة مش مكسوفين ؟
نقصت سنة من عمر هذا الفتى
و بتضحكوا و كأنكم شمتانين !
****
ضيَّعتى ليه منى قيراط بختى
وليه معايا يادنيا لبَّختى
إن كان على فدَّان شطارتى خُديه
إدِّيه لمحظوظ ينفعه ياختى !
****
لكل مبدع في الآداب أو في الفنون
لحظة تجَلِّى بتبقى موضِع للظنون
ودا شىء طبيعى لأنها فعلاَ يادوب
شعرة ما بين العبقرية والجنون !
****
مبروك عليك ، بيقولولك تحت بيتكم بير
بترول ، وهيهدّوا بيتكم بكرة وعليك خير
بس السؤال يا بطل : هاتجيب منين حيطة
علشان تعفّق عليها شهادة التقدير ؟ !
****
يا أيها اليمن السعيد ، ثروتك
بيبدّدوها جنرالات ثورتك
يا أيها اليمن اللى مابقاش سعيد
عيد كل حساباتك وقول كلمتك !
****
اللى ماعملوش زمان في انجلترا جدودى
قدر ما بين يوم وليلة يعمله دودى
ديانا سبعين سنة استعمار ودودى زعيم
بمنطق العصر ويا مصر انهضى وسودى !
****
يا مُبعدين عن أرضكم مُكرهين
دلوقتى بيسمّوكم المُبعَدين
ولما ييجوا يبعدوا ناس جُداد
ساعتها هيسمّوكم اللاجئين !
****
سألوا الحكيم : بنلاقى جوه الحَبْس
ناس مظلومين ليه ؟ قال : كِبار القوم
بنوه يكفّى صنف واحد بس
سيان بقى الظالم أو المظلوم !
****
إزاى ياميّه جريتى في العالى ؟
قالت عشان كان الطريق خالى
والكل شافنى ما حد وقَّفنى
ماعملشى ليه كل اللى يحلالى !
****
الحلَقة زايطة ، وكتّفوه أربعة
كأنه كلمة حق في المطبعة
هل يعلم الناس اللى بيكتّفوه
الفرق بين اليأس والمجدعة !
****
حتى ولو كان الطوفان احتمال
أيام سفينة نوح عليه السلام
كانت هتبقى رحلة آخر جمال
بس ابن آدم عُمْرُه ناقص علام !
****
في الليل بيتساوى الجمال والقُبح
مع إن لِلِّيل ألف عبن صاحية
وهى عين وااحدة في وش الصُيح
كاشفة الحقيقة بدقة متناهية !
لا يوجد