<!--
<!--[if gte mso 10]> <style> /* Style Definitions */ table.MsoNormalTable {mso-style-name:"جدول عادي"; mso-tstyle-rowband-size:0; mso-tstyle-colband-size:0; mso-style-noshow:yes; mso-style-parent:""; mso-padding-alt:0cm 5.4pt 0cm 5.4pt; mso-para-margin:0cm; mso-para-margin-bottom:.0001pt; mso-pagination:widow-orphan; font-size:10.0pt; font-family:"Times New Roman";} </style> <![endif]-->
ليلة ميلادك يا حبيبى تجَلَّى
نورها ، وبشايرها على الدنيا هالّة
يا خير خلق الله عليك السلام
من كل كائن حى سبّح وصلّى
يا من ( على خُلُقٍ عظيم ) مين سواك
م الأنبيا نال دى الشهادة من الله ؟!
****
فى الأرض فرحة وزيّها فى السّما
ليلة ميلادك يا رفيع القدر
فاح عطرها عمّ البراح والنما
ولما شاف نورها توارى البدر
ليلة هداية ومغفرة ومرحمة
تانى الليالى بعد ليلة القدر
****
ليلة ميلادك ليلة مالهاش زىّ
لا فى اللى فات ولا فى الزمان الجىّ
ومهما تزداد عتمة الإلحاد
بنلقى فى حماها الأمان والضىّ
وتعُم فيها بهجة الأعياد
على كل كائن كان جماد أوْ حىّ !
****
لكن فى عز الفرحة يا مصطفى
ما بتبقى فاردة جناحها ومرفرفة
علىّ ، حُزنى بييجى ويشدّنى
منها ، ويخنق كل لحظة صفا
العدل مفقود ، اختفى م الوجود
والظلم موجود فى العلن والخفا !
****
صَدَقت واتكالبتْ علينا الرعاع
ومجد أمتنا التليد كله ضاع
نشبه غثاء السيل ، مافيش عندنا
رغم الهجوم ولا حتى نيّة دفاع
والمسلم اللى التُخمة هاتموّته
ماباقاش يهمه المسلمين الجياع !
****
فى كل أرض بيعلى فوقها الأدان
نازلة المصايب حاطّة فوق روسنا
وبتحاصرنا عصابة الأمريكان
وبودّها تركّعنا وتدوسنا
ولسة مصايبنا هاتكتر كمان
ما لم نغيّر ما بأنفسنا !
****
من بعد قوتنا طريقنا اختلف
وشمْل أعداءنا التأم وائتلف
وسفينة الإسلام محاطة بموج
العولمة ومهددة بالتلف
وبقينا فى هذا الزمان العجيب
أضعف خلف منسوب لأشرف سلف !
****
مستضعفين فى الأرض مع إننا
كنا ما بين الخلق أشراف وسادة
ومبهورين م اللى بينقل لنا
علوم سبق لجدودنا فيها الريادة
وبقينا نخشى الحرب مع علمنا
بمكانة الشهداء وفضل الشهادة !
****
واختم كلامى بالصلاة والسلام
عليك يا طه يا شفيع الأنام
واقول يا رب انصر جنودك ، جنود
الحق واصفح عنّا يوم الزحام
واجعلنا أمة فعل يرضيك وزيح
عنّا النفاق واكفينا شر اللئام !!
