جارى التحميل
استخدم زر ESC أو رجوع للعودة
كتيبة المذيعين
عجب العجب كل يوم بنشوفه من مذيعين
ملوا الشاشات كذب وبذاءة وقلة دين
بيسألوا مصر رايحة لفين وهُمّا اللى
واخدين قرارهم وعارفين مصر رايحة لفين !
**
مذيع محسّسنا إنه العبقرى اللى مالوش
مثيل ، وعنه مشاهدينه مايستغنوش
أستاذ مالوش حل فى التخطيط وفى التزغيط
ومعاه وثائق ومستندات مايتعدّوش !
**
ومذيع مع بداية الثورة بكى بدموع
وياما حاول يبكينا على المخلوع
بيخلى م الحبة قبة ما بين زعيق أجوف
وسكوت يثير الملل لكن مافيش موضوع !
**
ومذيع على الشاشة بيبان غامض التضاريس
حالف ما ينطق بغير الغش والتدليس
بيبيُن الدنيا سودا للى بيشوفه
ومالوش هدف إلا نشر ثقافة التيئيس !
**
ومذيع بدون لزمة بيجيب كل يوم سنيد
حضوره وغيابه ولا بيضر ولا بيفيد
زى اللى للست بيقول (عظمة على عظمة )
يخلى جمهورها يتسلطن وهى تعيد !
**
ومذيع بيلدغنا تطلع لدغته بالدم
وملّون الدنيا حوالينا بلون الهم
بيبان لنا إنه شايل همّ كل الناس
وهو ولا دارى بظروفهم ولا مهتم !
**
ومذيع غلس من غلاسته قطعت سلك الدش
كل اللى بيقوله تزييف للحقيقة وغش
معجب بنفسه لأنه قدر فى تقديره
يقف قصاد الملك بغلاسة ويقول ( كش ) !
****
ومذيع بطبلة بيستظرف ودمه تقيل
ومذيع كما الطفل مع إنه عريض وطويل
ومذيع فى أحسن حالاته نقول عليه أراجوز
وكلهم مبدعين فى الغش والتضليل !
**
وتلات مذيعين أشاوس كانوا أصحاب بيت
فى زمن مبارك ولسة بيقولولنا ياريت
أيامه ترجع ، ولمّا بيقبضوا الدولارات
بيشعللوها وبيصبوا على النار زيت !
**
ومذيعة فى الولولة واللطم أستاذة
لكل شىء ضد فكر الثورة منحازة
كانت من المخلصين فى حملة التوريث
وعندها فى التحول خبرة ممتازة !
**
ومذيعة نسخة حريمى من المذيع اياه
بتعيد كلامه الممل كأنها حافضاه
ولما بيكون معاها بتبقى مبهورة
بسبُّه وهجومه وشتايمه فى خلق الله !
**
ومذيعة بتبان حسب ألوان فساتينها
نصيحتى لك تنسى كل ما تسمعه منها
شاغلانا دايما بأوهام كاذبة ومآسى
مع إنها هى مشغولة بملايينها !
**
ودول مجرد رموز لكتيبة المذيعين
اللى على هدم ثورة مصر متعاهدين
بيقبضوا من فلوس مشبوهة بتموّل
بسخاء مالوش حد قنوات الفلوليين !
2012 م
