شفتش بلد الونش فيها بيتسرق ؟
شفتش بلد الأصل فى سفنها الغرق ؟
شفتش بلد ماتعيرش للسكة الحديد
أى اهتمام إلا إذا القطر اتحرق ؟
شفتش بلد أراضيها صحرا واهلها
بيخضروا صحارى جيرانهم بالعرق ؟
شفتش بلد تصرف على جراج أربعين
مليون جنيه وتهدّه خوفا م القلق ؟
شفتش بلد فيها الكبار فوق القانون
وبدون خجل سايبة المواطن يتفلق ؟
شفتش بلد وزراءها تجار أو رجال
أعمال بياخدوا عمولة رسمى وع الملأ ؟
شفتش بلد نوابها جوه البرلمان
بيناموا ويسيبوا القوانين تنسلق ؟
شفتش بلد بتجدد الخدمة لألفين
مستشار يا خدوا مكفآت بالغلق ؟
وشبابها على رأى المثل خرموا الودان
مستنظرين وعد الحكومة بالحلق ؟
شفتش بلد من يوم ما عملوها بلد
وقفة محلك سر عند المفترق ؟
شفتش بلد فيها العجايب كلها ؟
لو كنت بلدياتى إوعى تقول لى لأ !
مارس 2010 م
