12
اتعَقّدت بالدولار وبالجنيه المِِطَاطِى
واتقندلت بالقناديل اللى مالية الشواطى
واتهبِّبِت بالسولار والغاز ومش باقى غير
بس الرغيف على دِكّة الاحتياطى !
****
النهاردا خمسة يونية عشرة رمضان ، يوم غريب
أصل فيه ذكرى لهزيمة ونصر فى توافق عجيب
ربما تكون هى أول مرة يتقابلوا سَوَى
عبر تاريخنا المعاصر واللقا قسمة ونصيب !
****
( الكاس بتاع مين ؟ ) بتاعنا ، بس مش عايزين
نقرّب النار يا نايبة مصر م البنزين
فَرْحتنا بالإنجازات بتخلى أهل الشر
يشككوا فى انتصارنا ويقلبوا الموازين !
****
مين اللى بعد الفوز دا يقدر يقول :
السوق مافيش فيه زيت وسُكّر وفول ؟
ارقص يا حضرى وارقصى معاه يا مصر
دا كفاية إنك جبتى فى الدنيا جول !
****
( اتسرسبت من بين إيدينا السنين )
وف عينى يا سيد حجاب دمعتين
دمعة على فراقك ودمعة على
أحوال وطن بيودّع المبدعين !
****
ما تخربيش عشّنا يا فرختى بإيديك
وافتكرى عشرتنا ، يمكن ربنا يهديك
إن كنتى بتبيضى بيضة تمنها جوز جنيهات
بلاش ينَسّيك غرورك إنى برضه الديك !
****
قَفلت بابى وسمكرت الإزاز والشيش
يا جايّة وياكى خيبة تقيلة للى يعيش
ولولا إنك من الممكن تكونى سنة
مكتوب علىّ أعيشها لقلت لك ماتجيش !
****
على مدار التاريخ راح موسى وجا موسى
ومصر محروسة ، ومن اليَمّ نجا موسى
لأنه صامد فى وش الكهنة والفراعين
أقولها من تانى والا فهمت يا جاموسة ؟!
****
( بلاك فرايداى ) بقت ( وايت فرايداى ) ليه ؟
يا عبقرينو زمانك ، قوللى شايف إيه
فى مصر غير اللى كل الخلق شايفينه ؟
دا احنا ( البلاك ) نفسه شاف حالنا صعبنا عليه !
****
فتحت باب القفص علشان أطمنهم
لقيت جميع الفراخ واقفين فى أماكنهم
ملعون أبو الخوف من الحرية ، بس هاقول
إيه تانى وانا نفسى واحد – للأسف – منهم ؟ !
****
لكل فرحان قوى بنجاح " ترامب " باقول :
شُغل الأونطة مابيفيدشى مع الناس دول
الأمريكان قرروا واختاروا ،شوف خيبتك
انت بقى فى الدوا والكهربا ، ، ، والفول !
****
زىّ السُكّر ما يدوب فى الشاى
قبل ما ودّعنا وقال : باى باى
مابقتش مصَدّق أى كلام
تقوليه ، وهاصَدّق بس ازاى ؟!
****
مدى ايديكى لدمعة عينى تمسحها
وتخلى مقاديفى تطويها وتمسحها
دا اللى مايعرفش فى بحر الحياة العوم
يصبح صريع الغرق او ياكله تمساحها !
****
البحر سالت دموعه كأنها أمواج
على حال بلد للرعاية وللأمان محتاج
واخد فى حُضنُه ( فريد ) وفريد دا طفل مريض
مُصاب بسرطان ومش لاقى فى وطنه علاج !
****
واحشانى يا جحش – رغم مرارها – أيامك
واحشانى طيبتك ، واحشنى فقر أحلامك
إنت الوحيد اللى لإساءة البشر نسّاى
ومهما يجرى وراك بتبُص قدّامك !
****
بالعلم ، للعلم عاش أحمد زويل ورحل
كان عنده بالفيمتو ثانية ألف حل وحل
لمشاكل الدنيا ، لكن مصر مشاكلها
كانت بعيد عن حلولُه زىّ بُعْد زُحَل !
****
مال وشّك اصفرّ ليه يا عِكِر على الشاشة ؟
مش أردوغان غار وضغطوا عليه بكمّاشة
وشالوه من الحُكْم ؟ لو عندك شوية دم
بطّل بقى بأبأة وارحل مع الباشا !
****
الورد فى الصورة لما العطر فاح منّه
رجّع لقلبى الحزين كل اللى راح منّه
وفرش لبكرة بُساط خُضرة وبَرَاح منّه
وساق دَلالُه لأن الفجر لاح منّه !
****
ما تهللوش للقضاء ، ولا تفرحوا بالقرار
وخدوا من الغاز بتاعنا موعظة واعتبار
وإلا ها تلاقوا صَنافيرنا وتيرانّا ، الغُراب
على غفلة من فوق خريطة مصر خدهم وطار !
****
يا خواجة يا للى فى إيدك الكرباج
جايز تكون لنصيحتى مش محتاج
بسبب غرورك ، سوق بقى براحتك
لكن يا ويلك م الحمار لو هاج !
****
أنا كنت فاكر نفسى شاعر بجد
واللى باقوله ما بيقولوش أى حد
لحد ما اتقابلت عنيه بعينيك
ووضع كلامها الحلو لغرورى حد !
****
قُصْر الكلام ، الجزيرتين صنافير وتيران
طمعانة فيها دُوَل من إسرائيل لإيران
لكن هاتفضل بلدنا رافعة راسها لفوق
واللى يراهن على شىء غير كدا خسران!
****
افرح يا شعب ، الجنيه أصبح بعشرة دولار
ومن النهاردا بَلاها فول وكُلْ كافيار
مع طَلّة الشمس أول يوم فى أبريل ، زيح
هَمّ السنين اللى فاتت وابْدَأ المشوار !