جارى التحميل
استخدم زر ESC أو رجوع للعودة
10
قفْل (الجزيرة مباشر مصر) نصر مبين
حمى الوطن من خطر ( أيمن وطه وزين )
ويجوز كمان يقفلوا ( رابعة ) و( مصر الآن )
ويا رب نقفل ( فلول ) و( التت ) قولوا : آمين !
****
إلا انتحارك يجوز لك أى شىء تانى
صحيح ضغوط الحياة خانقاك وخانقانى
لكن بفطرتنا بنشوف الانتحار أسلوب
مرفوض بيجعل من المجنى عليه جانى !
****
بلاش تقول الحقيقة ، غيّر الموضوع
وبان كأنك سعيد مهما تكون موجوع
ولما تحلم بلاش تحلم بصوت عالى
لأن تحت المخدة ميكروفون مزروع !
****
مرتبك كله فى ستين سنة تحويش
هايجيب لك الشقة ، ونشوفك ساعتها ( عريش )
وللجهاز يلزمك عشرين سنة تانيين
يعنى ببساطة كدا هتلاقى كله ( مافيش ) !
****
القاضى بيقول لكم "عودوا لمقاعدكم"
وأكيد تاريخ حكمه هايكون هو يوم عيدكم
بس انتفاضة أهالى الشهدا والثوار
بإذن (قاضى القضاة) للسجن هاتعيدكم !
****
منْع استيراده للأسف كان قرار
محتاج مناقشة موضوعية وحوار
لو حد بيسوق توك توك اختار بديل
هايعود بنا تانى لعصر الحمار !
****
فى مدخل المدرسة مكتوب بخط كبير
كلمة ما كنتش لاقيلها معنى أو تفسير
ولما شفت ابنى ( طور ) الله فى برسيمه
عرفت معناها ، معنى كلمة ( التطوير ) !!
****
(إما نكون أو لا نكون) ، ناس كتير
يتردد الجملة دى ، بس الخطير
ترديدها من غير وعى ، وعشان كدا
فقدت خلاص مضمونها يا شكسبير !!
****
الباقى من شعرى شايب بس قلبى شباب
وزىّ جيلى فى بنك ( حليم ) فتحت حساب
وعشان كدا لو كتبت كلام فى عيد الحب
جايز يكون ( حلو ) لكن هاتشوفوه ( كداب ) !
****
الثورجية بتوع بوركينا فاسو أكيد
هايكون لهم فى الربيع العربى درس مفيد
لكن إذا غنوا ( رجعت لينا بوركينا
تانى ) ورقصوا ، خلاص ، انسى ان فاسو ( فى عيد ) !
****
اهتموا يا ناس بسينا وازرعوها ناس
دا رمل سينا دهب وحصاها لولى وماس
وخلوا سيل العرق يوقف بحور الدم
عايزينها مدفع ودانة فى حضن ساقية وفاس !
****
من قبل ويكيلكس ما تسرب لك الأخبار
عايز أقول زى ما حليم قالها حبك نار
لكن باخبى مشاعرى عشان مافيش عندى
غير بس فدان محبة وبيت من الأشعار !
****
يا غزّاوية يا تاج العزة فوق روسنا
يا عيون على حدودنا جيل ورا جيل بتحرُسنا
عدم مشاركتنا أيام حربكم وكمان
يوم نصركم شىء أكيد بيحزّ فى نفوسنا !
****
قريت كتاب التاريخ م الجلدة للجلدة
مالقتش جيل انظلم واتهان كما الجيل دا
بس اللى حازز فى نفسى إن جلادُه
ضعيف وتافه ، وللتاريخ باسجّل دا !
****
لا ميّة ولا كهربا ولا شبكة اتصالات
كله انقطع ، واللى باقى رقابنا يا حضرات
وسِرّ مآسينا فى حكومة " مافيش " اللى
عايزة تخلينا نكره سيرة الثورات !
****
بشرنا رمضان بتكبيل مردة الشياطين
اللى بشرورهم محاوطينا ليوم الدين
لكن شرور مردة الإنس اللى عارفينهم
رمضان ماقالش اللى هايخلصنا منهم مين !!
****
ومادمت بتقول بكل برود " أنا قرفان "
نويت اغيظك واغيظ أهلك كمان وكمان
واصلى ع اللى إله العرش صلى عليه
والمؤمنين أجمعين وملايكة الرحمن !
****
الحمد لله ، رحيلها قبل تكريمها
كأم مثالية نعمة ربنا يديمها
أمى لا تعرف ( تهز ) مشاعر التحكيم
ولا عندها ( نقطة ) من فيفى تقدّ مها !
****
الكفتة فى الإيدز والا الإيدز فى الكفتة
والا الحكاية كدا على بعضها نكتة ؟
ورأيكم ايه يا أهل الطب ؟ مش بنقول :
إن المدينة ومالك فيها لا يُفتى ؟!
****
كان فيه مذيع اسمه باسم تعرفوش راح فين ؟
وهل اختفاؤه المريب كان زُهد فى الملايين
والا لأن النظام ولى خلاص والا
كان ( شىء من الخوف ) ولو خوف يبقى خوف من مين ؟
لا يوجد