جارى التحميل
استخدم زر ESC أو رجوع للعودة
11
مش مصر يا " ميسّى " مهما اشتدت الأزمة
هى اللى تقبل تشوف واحد مالوش لزمة
زيّك عشان تلقى عنده حل مشاكلها
بجزمته ، إنما ها تدوسه بالجزمة !
****
ولا اللوايح ولا القوانين ولا الدستور
هايكون لهم فى مواجهة أى فاسد دُور
فى بلد شعارها " مافيش حاتم بيتحاكم "
طبيعى يبقى أمين الشرطة إمبراطور !
****
لما اختفى ورق الشجر م الغصون
أكلوا القطط فى "مضايا"يا "بان كى مون"
والقتل بالتجويع جريمة يا "بان"
مش شىء بيمشى حسب مزاج الزبون !
****
نصيحة منى لكم علشان ما تنخدعوش
عيشوا الحقايق بحياديّة وما تبالغوش
وإلا ها نشوف شَجَر أحلامكم المزروع
فى أرض ألفين وستُاشر طَرَح فنكوش !
****
أنا ابتديت الكلام وانتى اللى كمّلتيه
كأننا قبل ما نقوله اتفقنا عليه
مع إننا لسه متقابلين ، لا كان بينا
كلام ولا سلام ولا حتى اعرف اسمك إيه !
****
فيه عيش وملح قديم جمعنا سوى
روى حياتنا بالحنان وارتوى
وبالاقى صورتك ساكنة فى كل شىء
حواليا وانتى بعيدة ، حتى الهوا !
****
صوتنا اتنبح من كُتر الاستنكارات
وف كل لحظة بتتنهب مليارات
لا اللى بينهب قال كفاية ، ولا
عند اللى منهوب حل غير السكات !
****
برغم إن حكايتنا أجمل الحكايات
فى الحب ، لكن تعبنا قوى من الأزمات
العيش مخاصمنا والحرية ناسيانا
حتى الكلام الجميل محشور فى حلقى ومات !
****
ليه بس يا ونش ما وقعتش على الفاسدسن
الونش قال لى : حسابهم لسة جاى بعدين
أصل اللى يقبل بحج الرشوة مش ممكن
يموت شهيد مهما يتخفّى ف عباية الدين !
****
وعشان بقى أهل الفساد ناس كتير
محتاج لردّ على تساؤل خطير
إيه العمل فى سنين عجاف ، للأسف
وصل الفساد فيها لكرسى الوزير ؟!
****
موجة غضب يا نشامى جوه بحر غريق
من وسط أهله وناسه خاطفة طفل برىء
وكأنه ساجد لمولاه يشتكى حاله
بيقدّم الصورة للعالم بدون تعليق !
****
قال الدولار للجنيه اتهدّ واتنيّل
دا العَشرة منك تمن كيس شيبسى للعيّل
قال الجنية : بس انا باجى بعّرّق صاحبى
وانت لصاحبك بتيجى بعد ما يريّل !
****
فى شهر يوليو وأغسطس أصبح التكييف
فى كل بيت م الضروريات كأنه رغيف
عيش أو مدرس خصوصى للعيال ، واحنا
ما بين جحيم الغلا وجحيم حرارة الصيف !
****
يا هلترى شهر رمضان السنادى أكيد
ها ينتهى زى كل سنة بيوم العيد ؟
جايز يكون فى السؤال تفكير عبيط لكن
جايز كمان فى الإجابة عنه حاجة تفيد !
****
أنا قلبى بيقول : بلادى لو سمع سيرتك
يا ساكنة روحى وروحى نفسها أسيرتك
اعتبرى إن اللى جارى يا مصر على أرضك
فاصل وهاتواصلى رغم اللى جرى مسيرتك !
****
مايهمنيش يبقى كرسى الحُكم مين شاغلُه
وأى شىء تانى إلا مصر با تجهلُه
هى الرغيف والسكن ، هى صباح الخير
اللى بنحلم جميعا نبقى من أهلُه !
****
دم الشباب اللى سايل فوق رمال سينا
باعت رسايل معاها تزيد مآسينا
بتقول لنا باختصارعايزين يا مصريين
ناس ياخدوا بالتار لنا ، مش ناس تواسينا !
****
رغم انتشار كاميرات مراقبة ورادار
وصفارات إنذار قدر باقتدار
يتمشى فى صالات المطار وسط ناس
دايما بتسخر من غباء الحمار !
****
فى الأرض حاربوك ، عذوك ، كذبوك
واستقبلك فى سماه مليك الملوك
موقف جليل يهز قلب الحجر
بس البشر لسة ف نفوسهم شكوك !
****
الأكل من غير لا زيت ولا ملح ولا سُكر
خلانى عصبى ودايما دمى متعكر
وخلى طبق الحلاوة وسندوتش الفول
من الحاجات اللى لما باشوفها باتحسّر !
****
بورصة حياتى جميع أسهمها فىالنازل
وعلىّ من غير سبب حظى بيترازل
بس اختلال المعادلة شىء خلاص مابقاش
غريب علينا فى دنيا كلها مهازل !
لا يوجد