جارى التحميل
استخدم زر ESC أو رجوع للعودة
8
أخَدت مكان البلابل فى الميدان غربان
واللى اختفى م الحقايق يا ( مناضلين ) بان
والشعب واعى وكاشفكم والمثل بيقول :
(عمر الدهان ع الوبر ما ينفع الجربان ) !
****
كان (مهرجان البراءة للجميع) اللى
قدر يشعلل نيران الأزمة ويخلى
مع الأسف (مهرجان البلطجة للجميع)
مَعْلم جديد من معالم ثورة بتوَلّى !
****
قال الدولار للجنيه اتدارى واتنيل
دا العشرة منك تمن كيس شيبسى للعيل
قال الجنيه بس انا باجى بعرق صاحبى
وانت لصاحبك بتيجى بعد ما يريّل !
****
لو التحرش هايبقى وسيلة للتغيير
فمع الأسف مصر مش ممكن هاتبقى بخير
وعيب قوى البلطجية والفلول يبقوا
هُمّا البديل لشباب الثورة فى التحرير !
****
حركة تمرد – لو الإعلام ماهوش كداب –
تقدر بملايينها تكسب مجلس النواب
وبكون لها حكومة شرعية تزيح مُرسى
وأهله وعشيرته – مش كدا والا ايه – يا شباب ؟!
****
( إعلام حمادة ) بأسلوبه الغبى المفضوح
بينادى ببراءة المخلوع بكل وضوح
مع إنه حاول يبان ثورى زمان لكن
عمالته بتوجّهه وعبادته للحلوح !
****
نزف الجراح من موقعة (جملك)
عاد من جديد مع موقعة (جبلك)
تفتكرى فيكى أملنا خاب والا
احنا اللى فينا يا مصر خاب أملك ؟!
****
حتى الجراد من هجوم أسرابه ماسلمناش
وجار علينا اللى يسوى واللى مايسواش
صهاينة وبلاك بلوك ومأجورين وفلول
لكن – ومع كل دول – صامدين ومايئسناش !
****
يا هلترى يا بلاك بلوكيين
إيه فكْركُم ، واللى وراكم مين ؟
وهل القناع هنلاقى فيه إقناع
بحل أزمات شعبنا المسكين ؟!
****
راحت عليهم نجوم السيما والكورة
وحمادة صابر بقى فى صدارة الصورة
وهو لابس هدومه بين بتوع ’سفين
أو لما عرّوه وعملوا منه أسطورة !
****
اللى مالوش شغلة بعد الثورة بسموه
( ناشط سياسى ) زبون فى برامج ( التوك شو )
يفضل يطنطن بكام كلمة حفضناهم
وزهقنا منهم ومنه وحتى م اللى جابوه !
****
باخت ولسّاها بمرور الزمن ها تبوخ
ومع مطالب يناير عقدنا مفسوخ
لا عيش ولا عدالة ولا حرية ولا حاجة
والثورة مش باقى من معالمها غير نخنوخ !
****
يا عام ( تلاتاشر ) يا ريتك تكون
عام للتفاؤل ، فيك تخيب الظنون
وتشاؤم الخواجات بهذا الرقم
يصبح مجرد خوف ووهم وجنون !
****
قلبك يا عمار الشريعى اعترض
واتخلى عن دقاته مش م المرض
لكن من الحال اللى وصلت إليه
مصر اللى كان بيحبها بدون غرض !
****
توكتوك بيسأل تريلا بكِبْر وتحدّى
يا هلترى تقدرى زيّى كدا تعدّى
بسهولة فى وسط حارة عرضها مترين ؟
ضحكت وقالت له : فوت ليوقّعك رَدّى !
****
واصل كفاحك يا مصرى وقوم بقى بدورك
واكتب بإيدك لأول مرة دستورك
هتلاقى شعارات يناير عيش وحرية
وعدالة – بعد استحالة – بقت فى مقدورك !
****
فيلم ( البراءة للجميع ) اكتمل
ومعاه – بكل أسف – فقدنا الأمل
فى حُكم عادل بشهادة الشهود
والحل هو سماع شهادة الجمل !
****
يوم تسعة ، عشرة ، حداشر الدامى
صورته مازلت شايفها قدامى
وسؤال لكل شهيد فى ماسبيرو :
مين اللى أصدر حُكم إعدامى ؟!
****
اتبنى ( فيلم الفتنة ) أسلوب لعين
حاول يشوه صورة المسلمين
واحنا فى بنغازى بقتل السفير
أكدنا – بغباء – منطق المدّعين !
****
" إلا رسول الله " شعار ارفعوه
وبكل حزم على الجميع طبّقوه
قاطعوا اقتصاد اللى يسىء للرسول
اتعاملوا ويّاهم بشىء يفهموه !
لا يوجد