جارى التحميل
استخدم زر ESC أو رجوع للعودة
9
أنا قلبى توك توك بين تريلات عجب
خلوا براح الدنيا عنه احتجب
ولما حس بوحدته فى الزحام
ثار وانتفض ورفض بشدة وشجب !
****
مانديلا رمز التحدى والتسامح مات
من بعد رحلة نضال حقيقية مش شعارات
كان الزعيم فى زمن بيحاول الإعلام
فيه - للأسف - إنه يعمل م الفسيخ شربات !
****
َرحَلت لكن كلامك فى الضماير حىّ
شفناه وبنشوفه فى عتمة سنينّا الضىّ
وكان فى شعرك با عم احمد فؤاد يا نجم
تجسيد لقول العرب : آخر العلاج الكىّ !
****
فيه غنوة لو تسمعها ماتملهاش
وغنوة لو تسمعها ماتميلهاش
اختار منابك م اللى طاب واستوى
فى جنينة المغنى ومش م اللى هاش !
****
تفرعن الحاكم علينا تلاقيه
جين مصرى مش مشاركنا ناس غيرنا فيه
واللى مالوش فى الفرعنة لو حكم
بنبادر احنا بالتفرعن عليه !
****
ومين هاينجد وطن دمّه بقى مشاع بين
أولاده من بعد شعبه ما انقسم شعبين ؟
كان حلمه تصبح صحاريه خُضرة وموانى
أصبح بيحلم بـ " مينا " يوحد الشعبين !
****
فض اعتصام والا فصيلين فيه ما بينهم تار ؟
والا تكالب على كراسى مذلة وعار
ملعون أبوها الكراسى اللى تخلى فصيل
أداة لتدمير وطن عن عمد وبإصرار ؟
****
أيام طفولتنا كان لنا لعبة شعبية
فيها صراع الندالة والفروسية
بس اللى طول عمرنا ما شفناه فى لعبتنا
وجود تحالف ما بين ( عسكر وحرامية ) !
****
الحمد لله الخبير اللطيف
اللى بفضله خلى شخصى الضعيف
عايش على الهامش وراضى بكدا
وماليش طموح فى لقب ( مواطن شريف ) !
****
لو كنت دارى بخطيئتك والا مش دارى
اتأمل اللى جرى واللى مازال جارى
كنت بهروبك من الإخوان للعسكر
( كالمستجير من الرمضاء بالنارِ ) !
****
طول ما البيادة بتعْلى فوقها كالعادة
إرادة الشعب مش هايكون لها سيادة
وتعالوا نقرا التاريخ ونحلل الواقع
ونشرب القهوة على روح الوطن سادة !
****
العبد دايما هايفضل عبد للسيّد
حرّيته بتبتدى لحظة ما يتقيّد
شىء فى الجينات للأسف م الصعب تغييره
يتساوى فيه كل من عارض ومن أيّد !
****
شفتوش رئيس دولة ساكن بالإيجار غيرُه ؟
طبعا ما شفتوش ، وهو دا سر تغييره
وإلا هاتضيع على ايديه هيبة الفرعون
اللى رعاياه بتسبجدى فتات خيره !
****
معقول يا ثوار يناير تعلى فى الميادين
صور مبارك ؟ وهل أصبح بتوع آسفين
والبلطجية رموز ثورية ؟ وسؤالى
بالاختصار اللى قام بالثورة ثار على مين ؟!
****
الراجل اللى ورا الراحل عمر سليمان
قال تصريحات عنترية يشيب لها الولدان
لكن ماشفناش وراه هو كمان راجل
يقول له عيب اختشى وبطّل هَطَل يا فلان !
****
( رُد انت يا حسين ) على اللى سألوا جبهتكم
بتعادوا ليه كل من حاول مواجهتكم ؟
وهاتنقذوا بالنضال الثورى مين من مين
وياريت يبان من إجابتك حُسن نيتكم !
****
مادام بتاكل رغيف مش من عزيق فاسك
عمر القرار اللى تاخده ما يبقى من راسك
الحكمة بتقول كدا وعشان تزيح عنك
عتمة سنينّا العجاف خليها نبراسك !
****
فى كل شىء يشبهونا إلا تصويتهم
إلكترونى ، جعل ديمقراطيتهم
حرة ونزيهة ، فهل نقدر فى يوم نبقى
زى الهنود فى نزاهتهم وحكمتهم ؟!
****
وصف الربيع العربى بالاسم دا
بيأيده الواقع عشان كان كدا
هبت معاه ريح الخماسين وضاع
دم الشباب الشُهدا فعلا سُدى !
****
سبب الحرايق والخراب والدمار
مش بلطجية أو شوية صغار
الصورة واضحة واللى حرق الوطن
هو اللى وياه الدولار والسولار !
لا يوجد