جارى التحميل
استخدم زر ESC أو رجوع للعودة
7
اطرح يا رمل رفح مكان جثامين
خيرة شبابنا بساتين ياسمين
امسح دموعنا وبوح لنا بسرّك
وقول يا رمل اللى قتلهم مين !
****
اكتملت الستين سنة ( عسكرة )
ومصر مش مرتاحة للى جرى
تفتكروا ممكن بعد سن المعاش
نشوفها ( مدنية ) بصحيح يا ترى ؟!
****
مش بالمكانة الرجولة تبان ولا بالسِّن
ودايما الندل للندل اللى زيُّه يحنّ
واللى بحلم الحليم اغترّ بكرة يقول
حقى برقبتى ، ومش هانشوفه تانى يزنّ !
****
لما الكلام فى الحلق بمرارة انحشر
وانهد حيل الخلق بفساد انتشر
آن الأوان للحق بعد غياب طويل
يرجع لأصحابه من ( التسعَةَ عَشَرْ ) !
****
يا مزغط البط بطل بطبطة بطك
وارحمنا من رغيك المتغطى بعباطتك
حلمك بكرسى الرياسة اللى انت متشعبط
فيه ضاع وطلعت فاشوش يا حلو شعبطتك !
****
لو نصبوا تماثيلك فى ميادينا
وعلّقوا صورك فى دواوينّا
هاتبقى دى للفرعنة بداية
مسيرها هاتدينك وهاتدينّا !
****
سمك ، لبن ، تمر هندى ، هى دى الحالة
اللى عليها الوطن ، والفوضى شغالة
فهل هانرجع نقول ويّا سعيد صالح
( مرسى الزناتى اتهزم ) تانى يا رجالة ؟!
****
من مصطبة لقهوة لتويتر لفيس
الكل فاكر إن حُكْم الخميس
للدستورية العليا طوق النجاة
وهو جزء من السيناريو الخسيس !
****
يا (خمسة) يونية أخوك (اتنين) بحُكم هباب
دخل كتاب التاريخ من أوسع الأبواب
وأصبحت نكسته أكبر كتير يا كبير
من نكستك زى ما قالوا أولو الألباب !
****
( الشيخة ماجدة ) اللى قالت إن حسنى برىء
طلع كلامها لا فيه تزييف ولا تلفيق
ويبقى بالتالى ولا فيه شُهَدا ولا مصابين
ولا ثورة ،ويَا فرحة اسبيدر بتاع توفيق !
****
مع الاختيار الصعب بين مرسى
وشفيق فى ماراثون لعبة ( الكرسى )
أتمنى لو كان فيه ( طرف تالت )
زى اللى كان دايما سبب بؤسى !
****
مع الأسف تانى مرة بتنقتل يا شهيد
بنفس فكر اللى قتلك ، بل بنفس الإيد
كأن ثورة يناير وهْم فى عقولنا
خلى اللى خان مصر فى سباق الرياسة يعيد !
****
فى مهرجان ( البراءة للجميع ) تجديد
لمهرجان ( القراءة للجميع ) ، وأكيد
الصُلح ويّا اللى سرقوا مصر بيبيّن
إن الجريمة ساعات – ومع الأسف – بتفيد !
****
نفس السيناريو بيتكرر بحذافيره
فى مجلس الوزرا والبالون وماسبيرو
وبورسعيد والسويس و(محمدين محمود)
والعباسية أخيرا ، هل مافيش غيره ؟ !
****
أتمنى لو ينتهى عصر ( الكأنيّة )
اللى حاكمنا بغباء وساعات بسوء نية
كأننا شعب ، وكأنه وطن ، وكأن
البرلمان له صلة بالبرلمانية ّ!
****
تانى شم نسيم يمر بدون نسيم
ويلاقينا لسة على فيض الكريم
بعد حلم الثورة ما أصبح كابوس
والنظام الحالى أسوأ م القديم !
****
حلم الرياسة اللى ف دمك
كابوس معاه بيزيد همك
بلاش تفكر فى الترشيح
ليطلّعوا ( باسبور ) أمك !
****
( راحت علينا خلاص ) القصرى قال لنجيب
وقررت الاعتزال الست مارى منيب
نجوم كوميديا الرياسة فى مصر لو شافهم
عيّل - من الضحك - لازم شعر راسه يشيب !
****
وليه تروح تشتغل فى بلاد ولاد العم
يهددوك بالكفيل ويطرّشوك الدم
لتوكيلات الرياسة لو بقيت سمسار
هاتبتدى رحلة المليون وتنسى الهم !
****
مش ( مصر لن تركع ) ؟ خلاص اشربوا
ولا تسألوا ولا حتى تستغربوا
طبعا ( طرفنا التالت ) المحترم
هو اللى خلى الأمريكان يهربوا !
لا يوجد