#عِشت_بين_الناس_كتاب

.....................

ماليش صُحاب !!

ف بَلِمّ نَفسي لترابيزات المكتبة

وأسحَب كتاب

وأبعثُه من بَعد موت

بعد أما كان وارىٰ التراب

بَنفُض غُباره المَنسي على وِشهُ

ف تبان ملامحه المُحزِنة ، ويـبُصلي

ف عنيا تِخجَل تُرفُضهُ وبَحِنِلهُ

وابدأ معاه من أوِلهُ

يحكيلي عن أيام ما كان سيِّد الكُتُب

مَيبَتشّ يوم على رَف كان بايت عليه

يدخُل بيوت الناس تَمَلّي وبـتراضيه

ويضَحوا بِـنضافة إيديهُم يِمسَحوه

يتصاحبوا يوم وأتنين وفجأة ، يرجَعوه

ويلاقى صاحب تانى أسّره بين إيديه

كُل الكتب حاسدينهُ علشان مركونين

ورغم قِلة رَكنتهُ لِسـاه بيسأل هو مين  !

يفرح يومين مع قلب صاحب قَدرهُ

بعدين يسيبهُ ويهمِلهُ ، يصبح حزين

" الناس بتأخد مِنى روحى وبـَتِرِمّىِ"

  قالها وباشِت صفحتين

 .. من دَمع كان من مصدرين ..

دَمعهُ اللى نازل من كسوفهُ وحَسرِتهُ

ودمعى لما لقيتنى جزء فـ قِصِتهُ

بعدين سَكَت ...

وقالي وفر دَمعِتَك

وَدينى _بالله_ رَف تانى فـ سِكِتَك

رَفي القديم شاخّتِ خَشَبتهُ من سنين

وأشتقت أشوف الناس ، وشاكِر طَلِتَك

دَفيتلهُ خوفهُ بـحُضنى وإيديا

وجَعنا واحد واللى فيك فيا

انا عِشت بين الناس كتاب

ولا حد مَرهْ حَس يوم بيا

وقبل مِنك..

كان تَملّى ماليش صُحاب

وبَلِمّ نَفسى لـترابيزات المكتبة

وأسمع كتاب ..

  انا هَشتريك بالغالى وبغّض التَمّن

انت الوحيد صادق وينفع تؤتَمّن

وخرجت وانا شايلهُ ف إيديا بكلمهُ

لقيته بَص لـفوقى وأتغرقّ عياط

وِاتبل بالكامل وباش ع الارض مات

لفيت ببص على الجدار  ..

لقيتها خانة " أرشيفات " .. "*

حنينى جالى الليلة ولمَسنى

وبرغم قدامى كذا تصنيف ..  

انا لما حنيت للى يشبِهلى

لقيتنى ماشى ناحية " الأرشيف " *"...

#مصطفى_شمس