الناس بتوع عاوز دراسة جدوي وعاوز اعرف ايه احسن الحلاب ولا التسمين والكلام ده كله
ما جدوى دراسات الجدوى الاقتصادية لمشاريع الإنتاج الحيواني؟!
بص يا باشا بعيدا عن موضوع الاحباط او ما شابه
الفكرة ان دراسات الجدوى والافضليه دي اتعملت في بلاد برا علشان هما عندهم مقاييس موحده
يعني علف شركه فلان مكتوب عليه كل مواصفاته وكل تركيبته وبيستعمل في ايه وامتي وفيه مقاييس ومعايير عدي عليها قبل ما ينزل السوق وكل شويه فيه رقابه حقيقيه (وحط تحت حقيقية الف خط) علي انتاج المصنع
نفس الكلام علي العجول او العجلات فيه مواصفات موحدة لو عاوز تعمل حظيرة تساع خمسين راس او الفين او حتي مليون ولازم تستوفي كل المعايير (برضه تحت رقابة حقيقية وصارمة)
فا لما تنزلك دراسة جدوي من ايطاليا او المانيا او امريكا تقول ان البقرة بتحلب 80ك متوسط او العجل بيزيد 2 ك في اليوم دول ناس عندهم نظام وعندهم معلومات والكلام هناك موحد مش حتلاقي فروق رهيبه بين نوع علف ونوع تاني في السعر او الجودة كلها بتكون في حدود 10-20% مش اكتر
نقطة تانية مهمة وهي ان انتاجية البقرة او العجل بتختلف علي حسب البيئة اللي هي قاعدة فيها دول ناس هناك بتشغل موسيقى كلاسيك للبقر وهو بيتحلب وفيه فرش لتدليكه وعمل مساج للبقرة وهي داخله تحلب ده غير طبعا الاهتمام الرهيب بالنظافة كل دي عوامل مهمة وبتاثر علي انتاج اللبن واللحم ومواصفاته كمان
اخيرا بقي فيه حاجه اسمها التربية الاقتصادية بمعني ان اقل عدد ممكن اربيه يحقق معايا اعلي ربح وده مستحيل يتحقق مع عجل ولا عشره علي الاقل علشان تحقق دخل محترم لازم ماتقلش عدد الحيوانات عندك عن 40-50 راس ساعتها بتجيب اعلاف مباشرة من المصنع بخصم وخلافه
بلاش تجري ورا اعلانات النت والعجل ابو 2 ك في اليوم والبقرة ام 40 ك لبن في اليوم دول لو حصلوا في مصر بتبقي صدفه او في مزارع شغاله بالنظام اللي قولناه في الاول انما تروح تدفع 50 الف وتجري بيها عالمصارف والترع يبقي انت يا سارق الفلوس دي يا اما ماعندكش مخ توزن بيه امورك
معلش علي الاطاله
بقلم / محمد السحيمي
نشر هذا الرأي – في جروب رابطة مربي الثروة الحيوانية بمصر – مساء السبت 30 أكتوبر 2021 .
عرض وتقديم
الكاتب والباحث/ محمود سلامه الهايشه
المحاضر المركزي بالهيئة العامة لقصور الثقافة- وزارة الثقافة
https://youtu.be/6kmXyCHo7Fk

=========.
الناس بتوع عاوز دراسة جدوي وعاوز اعرف ايه احسن الحلاب ولا التسمين والكلام ده كله
ما جدوى دراسات الجدوى الاقتصادية لمشاريع الإنتاج الحيواني؟!
https://youtu.be/6kmXyCHo7Fk