خايف عليكى يامصر م النداهه وصوتى من خوفى افترق
النداهين عايزين يكتـــموا صوت الحــروف جــــــوه الورق
ورقك يامصر بينحــرق ومن زمان قلبك ياغاليــــه بينسرق
وسيفك اللى كان بارق زمان عايزينـــه يبقى سيـف ورق
و إبنك اللى كان فارس حنـين عدى عليــه هم السنـين
ومن كتر غلبــه من الزمن أصبـــــح خـــلاص فارس حزين
إوعاك تفكر يللى ترهبنا برصاصك إنك خــلاص بقيت بطل
مليون وليد إتيتموا من عملــتك و بيتولد تانـى الأمـــــــل
أمل فى بكره ما شوفناهوش وفجـر لسه ما عشناهوش
وشمســــنا بتنــــده لـــــكم وتقول لـــكم ما تفـــــكروش
ماتفكروش إن إحنا هنموت لو ألف مره هنتقتل
وللا هنخاف من غدركم وللا هيصيبنا الكسـل
عن حق مصر بقول لكم لو تقتلونا كل يـــــــوم
لو كل ثانيه مننا هيموت شهـيد مش راح نلوم
غير صوتنا لما بعناه علشان خاطركــــــم .... بالرخيــص
ولعلمكم - أصل الرخيص ما بيتشريش ... غير بالرخيـص
جوانا ميت مليون ألم – يا عيــــون تخاف ما بتختشـيش
جوانا ميت مليون قلم حــــر وشريــف ما بيتشريـــــــش
جوانا ميت مليون شهيـد عشانها مش عايز يعــــــــيش
جوانا بكره وبكره جاى وبالعند فيــكم راح نعـــــــــــــيش
و يا ألف قولة آه على ولادك يامصر الطيبـــــه
و ألف صرخه حزينه يا ام دمـعه قريبـــــــــــــه
خايف عليك يابنى يا صغير و ليــــــك العجــب
يللى بتخلق للشهاده ف أرضها مليـون سبب
خايف عليكم كلكم - كونوا معاها
خايف عليكى يا مصر م النداهــه