النخلة و الدنيا الفانية بقلم خجالي لطيفة

النخلة ، لا قيود كبلاتهتا ،
و لا عبيد كسبات،
و غير من حرير الكبالة تغدات !

و قرايتها،

و قرائتها من ديوان المجدوب تشبعات.
شلا معاني، و شلا حكايات،
من حليب الفحلة تسربت الكبة!

بدمعي…

بدمعي سقيت جرادي المضيوم،
و بكفي، على المظلوم امسحت الغيوم!
و فوق راس القبة صيحت :
افهم الى باغي تفهم!
شحال من غافل داز من تحت القبة،
ما بان بحال قرانو، محل شلا عقدة،
بقات في الرفوف مستفة,
و بعسل اللواح مرقدة!
@@@@@@@@@@@@@@@@@
افهم الى باغي تفهم!

من حداك داز خيال المكفن!
شفتو في منامي هاز نعشو المعفن!
و كينادي :
هي المعنادة،
هي المعنادة ما تسلم ،
ما تحط السلاح،
و لا هواها تلوتو عائشه و الغرار!
@@@@@@@@@@@@@@@@
هي عمامة الفقيه لسرقها الرعواني و توجوه!
هي حجاب الطماع لكشفوه !
افهم الى باغي تفهم !
البير لكان يورد لقبيلة ردموه !
و الحبل لبيني و بينك و دروه !
و ف قبر داري و دارك دفنوه!
@@@@@@@@@@@@@@@
واش نزيدك او لا باقي ؟
و اش نزيدك او لا باقي ؟
او نسرد ليهم حكايتك في لحلاقي ؟

حتى اليتيم،

حتى اليتيم مكسور الجناح ما قالوه !
نفاوه من الدار و لا حوه لجموع!
ولا كيف الطير بلا ريش،
لا صدر حنين يغطيه!
و لا حتى رغيف باش يطفي نار الجوع و يعميه؟!
@@@@@@@@@@@@@@@
اه من هاذ الدنيا ،
اه من هاذ الدنيا .

هي عبرة واحدة توفي العبار و تشبع المحتاج!
هي العاشرة الى خليتها باعتك،
و الى أهديتها امناتك !
هي دمعة واحدة تسقي لباقي من ريحة التراب!
هي موجة الضمير الى صحى!
[@@@@@@@@@@@@@@@@@
هي ديك القلعة لصنعوها من جلد الفئران!
هي ماية تربعت على عرش الغيوان!
هي .. و هي…..و هي .
هي ديك اللوحة لرسمها الفنان بلون النيران!
@@@@@@@@@@@@@@@
هي ريحة دمي و دمك لعصروه !
هي جمرة،
هي جمرة وسدها قلبي لسرقوه!
هي صرخة مشلولة كتبري على الساس لهدموه!
هي ضاية،
هي ضاية من دم المغدور لعدموه!
هي… و هي … و هي.
هي قناعتي للا يحة جلا يلها فوق الصور !
هي شمعة المهضوم حقو لبلعوه!
هي الدنيا،

هي الدنيا، الى جريت موراها غرقاتك !
و الى اهجرتيها تبعاتك!
هي زرعة ،
هي زرعة نبتت في واد بلقيس لنشفوه!
هي الفتنة للذات و جلبت الجهل لعشقوه!

هي لزرعت و عجنت القمع لباعوه!
هي ديك الدنيا
هي ديك الدنيا لثقلت الميزان لثقبوه!