من اكثر العادات التي تجعلني في حاله غضب ان يخلف احدهم معاد معي أو ياتي متاخراً او لا ياتي ، فباعتذار او بدون اعتذار اصب عليه غضبي، وذلك لاني شخص اقدر اهمية الوقت واحترام المواعيد، وعلى ذكر احترام المواعيد انا لا احترم مواعيد استيقاظي من النوم فحبي للنوم تخطا جميع الحدود المباحه والغير مباحة فى معاد الاستيقاظ .
صباح يوم الاحد الذى لا اذكرالموافق له من تاريخ ولكن اذكر معاد اجتماع مهم مع تيم خيرنا ، استيقظت متاخرا فقررت اركب تاكسي " أبيض ابو عداد " ، وانا خارج بسرعه قررت اعتذر تلفونيا عن تاخير ولكن حظي لم يسعفني فصدر من تلفوني صوت أنثي رقيق دافئ يقول لي " لقد نفذ رصيدك برجاء شحن البطاقه فاشتريت كرت شحن من ابو عشرة بعشرة ولكن كان صعبان عليا فقدان ذلك الصوت الرقيق الدافئ .
بربع صباع شاورت لتاكسي " ابيض ابو عداد " وركبت واتكلنا ع الله فقولت اشحن بقا واعتذر ، شحنت واعتذرت واحتفظت بكرت الشحن بعد استخدامه فى شنطتي .
لفت نظر السائق انى احتفظ بالكرت بعد استخدامه
فقالي هو بايظ ولا ايه يا باشا ؟
قولتلوا اه بايظ باماره انى لسه متكلم من شويه منه
ضحك وقالي اصلك حطيته فى شنطتك ولا يمكن انتا من الناس اللى بتجمع الكروت كهوايه وكده
قولتلوا الحكايه يا اسطي ان مش هخسر حاجه لما احافظ علي الشارع اللى ماشين فيه واستنا لما اروح المكان اللى رايحه وارميه فى سله الزباله ، الراجل سكت فجاه وبصلي
قالي عليا الطلاق يا باشا انتا برنس والله بجد برنس
خد نفس عالي وقالي ياااه يا باشا عارف والله انا قبل كده كنت ماشي فى شارع لاقيته نضيف اوي ومكنتش لاقي فيه ورقه او كيس بسكوت والله كان نفسي اعمل فرحي هناك يا باشا ، والله قليل لما نقابل ناس ذيك يا باشا بس قولي يا باشا هو انتا مولود كده ولا ايه بالظبط ؟
قولتلوا اكيد لا بس اتعويدت ان اكون نضيف فى بيتى فبقيت نضيف فى اي مكان تاني .
والحمد لله وصلت الإجتماع وانا بحاسب السائق ولسه همشي قالي يا باشا انتا برنس والله واوعدك هشتري كيس زباله كبير واحطه فى العربيه عشان ننضف البلد بنت (***)
قولتلوا ربنا يكرمك وربنا يوقعنا فى بعض عشان نتكلم فى حوار الشتيمه دا لازم نخلص منه وضحك ومشي .
استفيت من هنا ان ممكن تغير نفسك فتقدر تغير الاخرين لكن العكس غير صحيح وكل دا كان فى التاكسي " الابيض ابو عداد "
