مين بيكره المذاكرة ؟؟؟

طبعا هنلاقى كتيييير !!! والسبب لأنه قرر يكره المذاكرة !. السبب ده مدعم بركائز فى مخ الإنسان من وهو طفل .

مثلا تبقي خارج مع اخواتك الصغيرين وهوه طفل لسه معندوش فكره عن اي حاجه حلوه او وحشه في حياته يجى حد رخم يقوله ( كبرنا بقى وهتروح المدرسة ويبتدى الأرف وتشوف اللى شافوه اللى قبلك ).
   أو يقوله ( بكره تروح تعمل الواجب بقي ويطلع عينك في عمايله وتحس بدل ماانت مقضيها لعب ) رغم أنها بتتقال بهزار

ببساطه الطفل لا يعرف يعني ايه واجب ولا مدرسه ولا أى حاجة.
  بس لما حد قله كده فتح ملف في عقله على طول مباشره سجل فيه حاجه اسمها مأساااااااااه.

وبدأ يدخل في الملف  الافكارالآتية :-
 -إنه هيروح المدرسه ( مأساة ).
 -إنه هيرجع تعبان ( مأساة ).
 -إنه لازم يعمل الواجب ( مأساة ).
 -إنه هيزاكر ويتعلم ( مأساة ).
 -إنه لو معملش الواجب هيضرب ( مأساة ).

ويبدأ يدخل في دماغه افكار كلها سلبية هو غير قادرعلى الاختيار ايه يدخل دماغه وايه لأ بس ببساطه اتنقلتله الأفكار.

مين قال ان المدرسه وحشه والله حلوه .
ومين قال ان المذاكرة وحشة !! حد طايل يعرف معلومة جديدة ،والله أكترشئ يسعد الانسان واي انسان إنه يعرف حاجه جديدة .
وبعدين ربنا قال " أقرأ "أول آية نزلت في القرآن.
 الواجب ( شئ حلو قوى إنى أعمل  الواجب اللى عليه والواحد بيبقي فرحان إنه أنجز عمل ( ومن أسباب التحفيز إنجاز الأعمال ) وبيبقي عايز يقدم أجمل ما عنده .
 ربنا خلق الإنسان  على الفطره والناس اللى حواليه أفسدوا فطرته عن طريق أفكار سلبية عقيمة ( يدمروا بيها الطفل ومش مدركين بيعملوا إيه !! ). وبالتالى الطفل نشأ على أنه :
- مش بيحب يزاكر.
-بيهرب من المدرسه.
 *لأنه اتبرمج عند الطفل في كل موقف ميعملش فيه الواجب ويضرب بيعرف أنه فعلا الواجب ده مأساة.
 *وكل مرة يتأخر على المدرسه يضرب بيعرف انها ماساة ييجي بعد كده يهرب من المدرسه.
 *ومش بيحب القراءة  وهى سر وجودنا وحريتنا في الحياة
( الحريه ارادة تتولد في رحم العلم والخبرة )

ده طبعا بخلاف أفكار أخرى سلبية مثل :-

" أصل انت فاشل ".

" انت اصلا عمرك مافلحت ".

"ابقي قابلني لو عرفت تحقق حلمك ده لو هو طموح وتجاوز كل اللى فات ".
" ابقي وريني هتنفع ازاي كان حصل من زمان ".

"اللىذاكر ذاكر واللى فلح فلح ، أنت خلاص ضيعت نفسك" .

الكلام ده بيتقال في كل لحظه في المجتمع حتى لو مش من أهلك فأنت بتسمعه فى المجتمع المحيط بك ، ولعدم ثقتك فى نفسك بتصدق كلام الناس وتحس أنك تافه .

فالحكاية كلها بدأت من فكرة

هو ربط المذاكرة بالمدرسة ، والواجب ، والعقاب وكل العوامل السلبية وبالتالى قرر أنه يكرها ، ويكره القراءة بصفة عامة

 مش كتير بنسمع من طلبة تقول لبعضها : " كتاب إيه اللى عايزنى أقراه أنا مصدقت أخلص امتحانات وأرمى الكتاب من إيدى !!"

لذلك راقب أفكارك فهى التى تشكل حياتك