الموتي.. صـلاح جاهــين
قصيدة الموتي آخر شعر كتبه صلاح جاهين, وكان علي درجة عالية من الشفافية فيها حين قال: حبايبنا يا غاليين ما أحناش ح نتأخر وقد كتبت في مايو1983 في أجواء رحيل أمل دنقل.
ورغم أن الشاعرين قد رحلا فإن هذه القصيدة شديدة الحياة, خاصة في هذه الأيام. أدب في صفحة الموتي.
بيكلموني كل يوم الصبح
بصورهم الباهتة
بعيونهم الثابتة
بيسألوني كلهم إمتي
ح تنطبع صورتك كمان
انتا..
هنا زينا في صفحة الموتي؟
حبايبنا يا غاليين
ماحناش ح نتأخر
الدور ح ييجي والمصير محتوم
ياللي صورتها بطرحة الزفة
ده حكم من قبل الوجود محكوم
يا اتنين عجايز: حاج, ومقدس
صورتين بلاسة والجبين مهموم
يا مغترب
ياصورة طالعة من جواز السفر
يا رسم علي وش التابوت مرسوم
في حفاير الفيوم...
وحفاير الفيوم
جبانة م الزمن العتيق
مشهورة بالصناديق
وعليها بالألوان صور مخاليق
كاهن.. مراكبي.. ست بيت.. تاجر..
بنية حلوة.. عسكري.. شاعر..
صور بشر أيامهم انحسرت
مداينهم اندثرت
توابيتهم انكسرت..
مافضلش منها غير وشوش
بيبصوا نفس البصة
وبيحكوا نفس القصة
مستغرقين في الموت بلا غصة
وفي الخلود رايحين..
زي اللي في الجرنال
في صفحة الموتي
قلت الشبه من أين يتأتي؟
قالوا عشان الكل مصريين
الكل مصريين
الكل نفس الهوية
نعي المطارنة جنب نعي الشيوخ
طالبين سوا الرحمة الإلهية
طالعين سوا أمجاد سماوية
في وحدة أبدية
ما تعرف الطايفة المسيحية
م الأسلامية..
تشهد صورهم جنب بعضيهم
في الأعمدة السودة البكائية
بإن دي.. هيا ديا.
بأحكي عن الموتي وملك الموت
يحصد أمم ويدري في الملكوت
يقعوا كندف التلج
غير مسموعين
أو كالجبال يقعوا بأرعبها صوت
باحكي عن الموتي في شتي العصور
وبأقول عليهم ألف رحمة ونور
مش بأحكي ابدا عن أمل دنقل
لأنه عايش رغم سكني القبور
وقالوا في الأمثال..
اللي خلف ما ماتش
وعن أمل يتقال..
اللي ألف ما ماتش
وسلام علي اللي ف صفحة الموتي
وسلام علي اللي ف صفحة الأحياء
ساحة النقاش