ياعينى على القلم
=======
 
قالوا القلم قيمه
قلت والله القلم سيما
 
نشوف جواه افلام
مرسومه ومكتوبه بأيدينا
 
ساعه ياخدنا لاجمل مينا
ساعه يسعدنا وساعه يبكينا
...................
 
 
ياعينى على القلم لما تلجمه الايام
ترسم له سطور وتختار ليه الكلام
 
يبقى زى الاعمى ماشى يخبط فى الظلام
خايف يقول كلمته خايف يبقى بيها مُدان
 
ان كتب تلقاه تايه بيكتب أى كلام
وان سِكت ممكن يجف فيه المداد
............
ياحروف الكلام انتى ب 60 وش
ياويله اللى يصاحب حروف الغش
 
تلقاه يفضل يدش يحاول يزوق الوش
والوش مهما غش مسيره تكشفه الايام
 
والحر مهما اتزل يعيش مرفوع الراس
والكذاب مهما كذب اكاذيبه لابد تبان
 
............
 
القلم افعوان
يشبك الحروف يحزم الجمله
يرقصها 0 على واحده ونص
 
القلم شيطان
يرسم الحرف ويزخرف الكلمه
والجاهل من كلامه ممكن يطب
.............
 
القلم نور
بنكتب بيه اسم الله
 
القلم نار
من اذيته بنقول الاه
 
القلم سلطان
ساعه يكون عادل
ويحكم بصدق الكلام
 
القلم سلطان
ساعه يكون ظالم
ومن خطه البرىء يُدان
...........
 
ياماسك القلم دير بالك
القلم ممكن يرفع قدرك
وممكن بيه تُبقى مُدان
 
اوعى يغريك القلم
وتنسى فى يوم ذاتك
وتستخدمه فى أهانة الناس
 
القلم زى اللسان
ممكن يطلع الكلمه جميله
وممكن يزرع الفتن بين الناس
========
قلم الصابر