زجلية باللهجة المغربية
رجاف الله
************
شهقت شهقة
قلت هدي هي الفرحة
نسيت فيها ديك ل غمة
قال صاحبي
صور بلا حشمة
راه احنا خاوا 
ؤسعداتي بهاد اللمة 
نحطوا لبراد والصينية
وديما زاهية البركة
زغرتات امي
وقالت ياولدي
الله يبارك هاد الصحبة
مشات ايام
ؤجات ايام
حتى تقلبات حياتي تخمام
الصاحب ساط برابوز 
حتى احم لمجمر 
ؤخلاني ابحال العطار
ندور من دوار لدوار
حازم اشطايطي فرزمة 
وكاع داو لخبار
ورجعت لديك الدار
نعيش فريد 
راني مجدوب ؤبوهالي
حتى واحد مايسمع اكلامي
نبات مظيوم
ونفيق مهموم 
راه جاي اليوم أصاحبي
نكون تحت الثراب 
مردوم.
سمير مطيرك