بلياتشو
بلياتشو ولوني وشي بالأصباغ
ولبسوني اراجوز وقالولي
قوم ضحك الأولاد ورقص البنات
قولت لا دي مهنتي
ولا بفهم في دي الحاجات
قالولي بسيطه تتنطط وتتشقلب
وتقول أي شوية هلفطاط
يا عالم ياهوه أنا معلم 
مهنتي التعليم وتقويم السلوكيات
طظ فيك وفي السلوكيات
شالوني ولقيتني متعلق في حبل
وفوقي ربي والسبع سموات
والوشوش تحتي فطسانه من الضحكات
بترعب من الخوف وافتكروني
من رعشتي إني بعملهم حركات
طيب حد فيكم ياللي 
بتضحكوا على البلياتشو
بص في عينيه وجاب كاسات
يملاها بسحيح من الدمعات
ويفردها على مناديل الزمن
ويفند ويجفف فيها الدمعات
هيلاقي كل دمعة وراها غصة ألم
وكتير من الآآآآآآهااااااااات
وبقيت متدلدل في حبل 
بين السما والأرض
وبيلونوا وشي بلون الضحك
علشان يداروا فيها الحزن 
إللي أتولد وياي
بلياتشو بيموت من الأنين
ودمعته بتضحك الخلجات
وإيه يعمل الأراجوز وحبل الساقية 
في رقبته مربوط
ومحكوم عليه زي تور الوسية 
يلف جوه الساقيه السبع لفات
آه لو تعرفوا إللي جواه
آه لو لتعرفوا
طارق صابر عبدالجواد
مــــــــــــــصر
الإسماعيليــــــــــة