ولا يوم من أيامك يامبارك ...

 آسفين ياريس

قال تعالى " إن الله لا يغير ما بقوم حتى يغيروا ما بأنفسهم "

وقال عليه الصلاة و السلام " كيفما تكونوا يول عليكم "

• ·       بيدى !! لا بيد عمرو – مين عمرو ؟ معرفش !! جايز عمرو موسى أو عمرو دياب أو أى عمرو ! المهم احنا اللى جبناه لأنفسنا !! وجنت براقش على نفسها . احنا اللى اتبطرنا على النعمة و النعيم المقيم اللى كان الريس معيشنا فيه ! لكن البطران سكته زفت .. ولا مؤاخذة قطران ! ما كنا عايشين بنتفرج على الكورة ! و المصلحة ماشية اهلى وزمالك ! و الله يستره دنيا وآخرة وفى الزمالك الكابتن حسن شحاته , ياما متعنا وخلى مزاجنا أورج الأورج !
• ·       بس احنا اللى فقر ! لذلك خيبنا خيبة غنى ( واحدة ست اسمها غنى ) ! ومحدش يسألنى مين دى الست غنى ؟ كل واحد يعرف بطريقته ! أنا طول عمرى بسمعها كده ! ولو سمحت بلاش قلة ادب . المهم شوية عيال ماطلعوش م البيضة ضحكوا علينا وخلاص !

المهم خلينا فى المفيد قبل الكلمتين دول و النبى ما يروحوا من دماغى

• ·       آسفين ياريس – عرفنا قيمتك وقيمة كل ما قدمته للوطن – فأنت المقاتل المخلص الذى خاض كل الحروب و أهوالها – وانت صاحب الضربة الجوية فى حرب أكتوبر المجيدة –وأنت الذى وقع عليه الأختيار من قبل الرئيس المؤمن \ محمد أنور السادات ( بطل الحرب و السلام رقم 1 – كبير العائلة المصرية – رجل الأصول والقيم والمبادىء و المثل العليا ) , من جيل أكتوبر كله حتى يأمنك على حكم مصر .  والشهادة لله كنت أنت وكل أفراد عائلتك قد الأمانة .
• ·       ممرمط زوجتك الفاضلة بنت الناس الهاى لايف " سوزى " , ومدوخها وراك فى كل مكان داخليا وخارجيا من أجل الوطن ! ده غير شغل البيت من طبيخ و مسح وكنس وتنفيض وملو القلل .... الخ . وكل ده مقابل ايه يعنى راتب هزيل ومخصصات أهزل منه ( ملحوظة :- راجعوا راتب ومخصصات رئاسة الجمهورية ) . وكل ده وحماتك الله يبارك لها ساكتة ولا تنطق من أجل عيون الوطن . بالرغم من أنها مواطنة انجليزية ومربية بنتها على الغالى كله .
• ·       حتى أولادك الطيبين الحلوين علاء وجمال لم ينجو من البهدلة وخدتهم معاك يساعدوك فى حمل هموم الوطن , بدلا من ان يذهبوا للعراق يكونوا أنفسهم زى غيرهم من الشباب . وياريتك أرضيتهم بحاجة تبل ريقهم . لكن طبعك ومش هتغيره " كله لوجه الله و الوطن "
• ·       30 سنة من العمل الشاق و البهدلة و المرمطة و اللف داخليا وخارجيا بيشحت على أبناء وطنه , حتى يوفر لهم حد الكفاية – مش حد الكفاف ( كما كان يفعل الفاروق عمر بن الخطاب رضى الله عنه وأرضاه ) ,  كما هو فى الشرع و الدين !!
• ·       وبعد ال 30 سنة من الشقاء و العذاب من أجل أبناء الوطن , يأتى فئة غالة حاقدة من أبناء الوطن , ويقفوا فى ميدان التحرير وفى جميع ميادين مصر فى جميع المحافظات , هاتفين هتافات بذيئة من عينة " الشعب يريد اسقاط الرئيس " – " الشعب يريد اعدام الرئيس " – " ارحل يعنى امشى ... ياللى مابتفهمشى " !!!!
• ·       طب و النبى ده كلام ؟ قلة الأدب و السفالة على رمز مصر وقائدها وبانى مصر الحديثة ؟ وتسمع كلام فارغ من عينة " مبارك كان كنزا استراتيجيا لأسرائيل " – " مبارك كان نائما على سرير اسرائيل " – " مبارك كل ليلة يتناول طعام العشاء فى اسرائيل " !!
• ·       بالذمة ده كلام فيه حد يصدقه ؟ زعماء اسرائيل والرئيس الأمريكى الأسبق جيمى كارتر يقولوا كده , نقوم احنا نصدقهم ؟!! و الله عيب
• ·       يقوم يطلع واحد اسمه اللواء شفيق محمود على البنا \ مدير مكتب الرئيس المنزلى – وابن المرحوم الشيخ محمود على البنا – شيخ مشايخ المقرئين أيام الزمن الجميل – يطلع ويصدق على كلام اليهود و الأمريكان ؟!!
• ·       يفتش سر الراجل ؟ ويخون الأمانة ويطلع مع المغرض الكابتن \ أحمد شوبير – اللى محدش عارف له ملة ولا دين ويحكى بالساعات الطويلة عن حب الرئيس لمشروب الفودكا الروسى ! وليلة ما السادات عينه نائب ظل يشرب الفودكا طوال الليل فرحا غير مصدق , لأن أقصى أمانيه ان يعين سفيرا فى لندن ! ياسلام على التواضع و الأخلاص لحماته وحماه الأنجليز ! ده حتى لم يكن يزورهم فى الأعياد ولا حتى فى مولد النبى أو شم النسيم !!
• ·       مع ان سوزى قايدة له صوابعها العشرة شمع ! حتى بعد ما باع شبكتها علشان يعمل سرير إضافى لجيمى زى سرير أخوه البكرى علاء . مع ان ده مسئولية الأب !! والست مالها ومال الكلام ده طالما موظفة و بتساعد فى مصروف البيت , وشايلة البيت لوحدها ! ده حتى عمره ماغير لعيل البامبرز بدلا منها !! مش واخدة منه إلا القرف وقرف أهله وعياله ! ده خلى بالك اللى احنا ممكن نعرفه – ناهيك عن المستخبى من أمه واخته والسلايف ... الخ .
• ·       طب مايشرب ياسيدى ! ده رئيس جمهورية ! وكل المسئولين الكبار بتشرب ! وخش على اليوتيوب وشوف المسئولين العرب كلهم حتى ملوك السعودية وحاكم قطر زوج الشيخة موزة اللى صرفت فلوس قطر على عمليات التجميل ! كل دول لهم صور خاصة لما بيروحوا الدول الغربية ! بيشربوا فى نخب الزعماء الغربيين ! هو يعنى كان ماشى فى الشارع بيطوح , ولا قالع ولا مؤاخذة هدومه وبيقول بعلو صوته " أنا جدع " زى اسماعيل ياسين فى فيلم المليونير ! ولا صحى الناس من نومهم وقلقهم !!
• ·       زى ماشفيق البنا قال – من عادة الرئيس انه يفضل شرب الخمر لوحده او مع خاصة خاصته زى الفريق الدكتور \ أحمد شفيق المرشح الرئاسى – تلميذه الوفى - ثانى اثنين فى الطيران وفى الشرب وفى السرقة ! آسف وان شاء الله خليفته فى الحكم !!
• ·       يانهار اسود !! شفيق ؟ ياراجل !! ده اللى ما بيعرفش مع الأعتذار للمطربة الخالدة !! ما بيعرفش ؟ آه ما بيعرفش أى حاجة ! الناس خيبتها السبت و الحد – وخيبة المتنيل على عينه ما وردت على حد ! شفيق ؟ .... ياراجل !!
• ·       اللى قتل واتقتل .. ضرب واتضرب ... شرب ... واتشرب ... سرق ... واتسرق ... نهب واتنهب . شفيق ؟ ... ياراجل !!
• ·       اللى متقدم فيه 45 بلاغا رسميا أمام سلطات التحقيق ! لم يتم فتح التحقيق معه فى اى بلاغ منهم – حتى الأخير اللى قدمه الحاقد \ عضو مجلس الشعب عصام سلطان , حرصا على مشاعر مؤيديه ومحبيه ومريديه اللى بيموتوا خالص فيه !! شفيق ؟ .... ياراجل !!
• ·       اللى كل مصر للطيران بتلعن اليوم اللى شافوه فيه ! اللى موظفى مصر للطيران عملوا مؤتمر صحفى فى نقابة الصحفيين لفضحه ! لولا البلطجية الرجالة بتوعه الله يسترهم , دخلوا على شوية الموظفين طيخ طاخ , وقدروا يفرقوهم ! شفيق ؟ ... ياراجل
• ·       اللى الدولة استلفت علشان سواد عيونه 3 مليار دولار عاشان يعمل لنا مطار جديد حلو كده على ذوقك ! نقوم نكتشف ان المطار غير مطابق للمواصفات !ويصلح لطائرات الرش العملاقة لمقاومة دودة القطن , وللطائرات الورقية و الأراجوزات الصيفية بتاعة العيال الصغيرة ! شفيق .............. ياراجللللللللللللللللللللللللللللللللللللللللللللللللللللللللللللللللللللللل
• ·       بذمتكم ودينكم – أنا راضى ذمتكم ودينكم ! لما نعيش سنة ونصف من أسوأ ما مر على البلاد و العباد ! تحولت فيه مصر إلى طابور عيش ! أو طابور بنزين ! أو طابور سولار ! هذا بالأضافة الى الطوابير القديمة المعروفة و المتراكمة على مدار عهود سابقة طويلة .
• ·       خلعنا رئيس ! وحكمنا 21 رئيس أقلهم برتبة لواء هم السادة أعضاء المجلس العسكرى ! وشوفوا اللى ماتوا من يوم 25 يناير 2011 مرورا بموقعة الجمل بقيادة السيد رئيس الوزراء الدكتور الفريق \ احمد شفيق – كشف العذرية – أحداث السفارة الأسرائيلية – ماسبيرو – محمد محمود – مجلس الوزراء – بورسعيد – وأخيرا العباسية  .
• ·       اللى مات واللى عنيه راحت ! ده غير المصابين والمنقوطين والمحبطين والمتوفين بالسكتة القلبية و الدماغية !!
• ·       كل ده ؟ وفى الآخر ترسى على اننا نختار الأستاذ الدكتور الشيخ \ محمد مرسى !! أو شفيق ؟ ..... ياراجللللللللللللللللللللللللللللللللللللللللللللللللللللللللللللللللللللللللللللللللللل !!
• ·       لألألألألألألألألألألألألألألألألألألألألألألألألألألألألألألألألألألألألألألألألألألألألألألألألألأ

آسفين ياريس .. ياحرامى ... يامرتشى ... ياخائن ... ياكنز اسرائيل الأستراتيجى ... ياعميل الغرب ..... ياخاين رئيسك ومتآمر عليه ..... ياواكل ناسك .. وبايع شعبك ووطنك بتراب الفلوس ...

ولكن مش هنتخب شفيق !

أما مرسى فعايز كرسى وعايز قاعدة وقعر مجلس ونحقق لما الناس ترجع من القسم – والمصابين يرجعوا من المستشفى بعد الخياطة ! ونجيب بطيخة تطرى على قلبنا !  ونشوف هترسى الحارة المصرية على ايه ؟ والليل وآخره