<!--<!--
· أيوه جاى – وعندك واحد مرشح رئاسى توافقى , دم تقيل , لا طعم ولا لون ولا ريحة , شورتها لا بيهش ولا بينش , أبو الأمراض , بيشتكى من كل حاجة , عباراته المأثورة " يارب خدنى بقه .. ما تبهدلنيش ولا تسيبنى للعيال بتوع التحرير يبهدلوا فيا ... ياحنين .. ياكريم " .
· لا تكاد تطلع على أى صحيفة أو تفتح شاشة التليفزيون إلا ومجموعة من الناس اللى لهم فيها واللى ملهموش نازلين تحليل فى الرئيس التوافقى المطلوب فى المستعجل قبل ما الأسطى سواق البيجو يقوم يكمل خط سيره , مرة اعلان عن منصور حسن \ رئيس المجلس الأستشارى اللى ماحدش عايز منه استشارات خالص ولا حتى المجلس العسكرى اللى عينه , هو المرشح التوافقى وبالرغم من احترامنا الشديد لشخص الرجل واخلاقه إلا أنه جاى لنا زى ما يكون فى المنام !! كأنك بتحكى لى عن أيام زمان زى جدتى ما كانت بتحكى عن هوجة عرابى وأيام ما سعد باشا جه المنصورة ونزل فى بيت الشناوى . ما تعرفش ليه , جايز بسبب سنه وان كان كل المرشحين المحتملين بيلعبوا ما بين السبعين و الثمانين باستثناء الدكتور عبد المنعم أبو الفتوح وحمدين صباحى هما اللى بعد الشر بعد الشر لسه .
· يمكن بسبب ان الراجل كان محسوب على الرئيس المؤمن \ محمد انور السادات أول من باع مصر و القضية , وكان هيغير رأيه فى نائب رئيس الجمهورية , وكان هيحرمنا من حسنى مبارك هذه الموهبة الفذة ذو الغباء الفطرى النادر ويجيب لنا منصور حسن من وزارة الثقافة أو وزارة الدولة لشئون مجلس الشعب و الشورى اللى ما كانش لهم لزمة أيام العز بتاع الحزن الوطنى . قصدى الحزب الوطنى , لكن الحمد لله ربنا ستر و السادات قتلوه جماعة السيد المهندس \ عاصم عبد الماجد وريحونا الصراحة منه . وعلى فكرة عبد الماجد قدم استقالته كمتحدث رسمى للجماعة الأسلامية وريحنا منه .
· لقوا الفريق الدكتور \ أحمد شفيق موش واكل مع الناس بالرغم من ان الراجل غسل البلوفر اللى كل حزب الكنبة بيموت فيه , وصرح بأن عنده واحد تانى صوف انجليزى أحمر و لون فانلة النادى الأهلى يهبل أصلى من يورك شاير – يعنى بريطانيا العظمى وليفربول شخصيا , بس عاينه يترسم بيه ليوم تقديم أوراق الترشيح مع الشراب الأبيض لأنه زى ما انت عارف راجل كاجوال قوى جدا آخر حاجة . ناهيك عن انه أبدى استعداد كبير أنه يلبس بدلة كاملة وأحضر للمجلس العسكرى مجموعة كبيرة من الصور التذكارية أيام مصر للطيران مصورها وسط المزز بتاعة الشركة وايه , مزز صواريخ اشى مضيفات لسه بتطير ومضيفات بطلت لكن حاجة كده زى الفرخة العتقية .. تشوف الواحدة تقولشى بطة سودانى أصلى .. صلاة النبى أحسن , يعنى عاطفى على الآخر وده مطلوب برضه فى المرشح التوافقى علشان ركن المراة اللى هية بالظبط نص المجتمع واكتر – روح ربنا يكره فيه خلقه صبيان وبنات – رجال ونساء – مسلمين ومسيحيين – شرق وغرب – شمال وجنوب ....الخ – آمين .
· لكن ياسيدى الأخوان اعترضوا على شفيق وقالوا ان الراجل شيك ولكن على طراز الفرنجة ولا يلبس طاقية كاب زى طاقية فضيلة المرشد , واحنا تيار اسلامى موش ولا مؤاخذة ...... . احنا ناس بنحاول نثبت للعالم أجمع ان احنا جماعة سبور خالص بس موش للدرجة دى . وكفاية اللى احنا بنشوفه من تحت راس عبد المنعم أبو الفتوح وشباب الأخوان اللى محدش عارف يلمهم وملهموش كبير تيجى تقولى شفيق ... ياراجل . الحقيقة المجلس العسكرى تفهم وجهة نظر الأخوان مشكورا !!
· بعد استراحة قصيرة يادوب من لجنة تقصى الحقائق اللى هتريحنا من الشهداء ودمهم وبورسعيد نفسها اللى الحكومة ما بتحبهاش من زمان من أيام المخلوع . وأثناء ما لجنة الصحة بتشوف غرفة العناية المركزة المطلوبة لنقل المخلوع إلى سجن طره زى خلق الله المحبوسين لأتفه سبب . بس ادعى ربنا يهدى حسنى ويوافق - ده لو وافق وما زعلشى وقعد يدبدب فى الأرض ويرمى الهولز و الشيبسى لماما شوزان , قصدى سوزان . إيه اللى حصل ؟ مااطولش عليك قول طول هو اليوم باين من أوله .
· لقينا فرقة حسب الله الأعلامية بتعزف لحن جديد قديم سمته المرشح الرئاسى التوافقى وبرضه مطلوب مستعجل , حذر فزر يطلع مين ؟؟ أقولك ؟ موش هتصدق !! السيد نبيل العربى – متقولشى بقى دا راجل عمره العيبة ما تطلع من بقه , راجل جميل – 77 سنة يعنى نفس الرنج Range المطلوب- ابن ناس بدليل خدمته فى وزارة الخارجية – لا نعرف عنه الكثير وده مطلوب كنوع من الإثارة – قعد شوية صغنين قوى كوزير الخارجية المصرى بعد الثورة وهوب تم ترشيحه كأمين للجامعة العربية .
· ما تردد ساعتها بما يرضى الله أن اسرئيل تعتبره عدوها ولذلك سفروه على ثلاجة الجامعة العربية زى ما حصل أيام مجد عمرو موسى !! وفى ذات نفس الوقت فجأة لقى الرجل ترحيبا واجماعا من دول الخليج لدرجة ان دولة قطر العظمى سحبت مرشحها واعتبرت العربى هو مرشح قطر وبطلت عند مع مصر طالما تم سحب ترشيح خالد الذكر \ دكتور مصطفى الفقى – حزب وطنى انتساب !!!
· الحقيقة الأقوال متضاربة جدا بخصوص هذا الرجل بالتحديد . أنا أميل لأنه راجل كويس ووطنى وتاريخه ناصع طالما اسرئيل تعتبره عدوها , وما يؤكد ذلك تصريح الدكتور \ محمد البرادعى عن نبيل العربى بقوله ما نصه " الدكتور نبيل العربى الأمين العام لجامعة الدول العربية فخر لمصر فى علمه ووطنيته ونقائه . ولم يفكر أو يسعى يوما للترشح للرئاسة , ولا تزجو باسم الرجل فى هذا المناخ السياسى الملوث " .
· المهم ييجى ألدو ييجى شاهين – هل المهم هومين الرئيس ؟ المهم لنا وللوطن ومستقبله ما هى الأسس التى يجب توافرها فى شاغل هذا المنصب المهم جدا و الخطير ليس لمصر وحدها ولكن للعالم أجمع ؟ مصر لا تحتاج موظف بدرجة رئيس جمهورية !!! مصر تحتاج الى رئيس على أعلى درجة من الكفاءة والوطنية . رئيس مصر لازم يكون ملو هدومه . شىء يشرف بالبلدى كده ويسد عين الشمس .
· أما عن المعايير العلمية ففى الغرب و الدول المتقدمة وفى علم الأدارة فيه خطوات محددة لاختيار شاغل المنصب أيا كان المنصب . ولكن بعد تحديد المهمة – طيب المهمة عظيمة وهى رئيس جمهورية مصر العربية – مصر أم الدنيا فعلا – مهمة عظيمة ثقيلة لمن يفهم معنى الأمانة فى الآية الكريمة " إنا عرضنا الأمانة على السماوات و الأرض و الجبال – فأبين أن يحملنها وأشفقنا منها , وحملها الأنسان , أنه كان ظلوما جهولا ..الآية" . برضه هتقولى آية – انت تيار اسلامى ولا ايه ؟ اخوان ولا سلفى ؟ ولو كنت سلفى – عقلى ولا نقلى ؟
· أيضا فى علم الأدارة توجد معادلة خالدة مستخلصة من العلم والخبرة هى
Responsibilities = Authorities=Compensation Program والمعنى المسئوليات = السلطات و الصلاحيات المطلوبة لأنجاز هذه المهمة = مزايا ممنوحة لشاغل المنصب علشان ما يبصش بره المنصب . طبعا مفهوم – اعذرونى أصل بكسف من الكلام العيب بتاع الفساد و الرشوة ....الخ , نفسى رايحة قوى للشفافية . ينتج عن كده ايه حاجة اسمها توصيف وظيفى أو Job Description .
· ويختار الشخص إذا كان مطابقا للتوصيف الوظيفى على أساس مجموعة من العوامل لخصت فى أربع نقاط يسمونها بالأنجليزية ( A4) -
وهى 4 كلمات تبدأ بهذا الحرف :- الشكل و المظهر Appearance – الثقة بالنفس Assurance - الموقف ووجهات النظر Attitude - القدرة الصحية Ability . وهذا هو الفرق بين الأمم المتقدمة و الأمم المتأخرة – القاعدة The right man to the right place الشخص المناسب فى المكان المناسب . هتقولى عارفينها – هقولك أيوه بس عمرنا ما عملنا بيها ولا مرة واحدة .
· طبعا المعايير دى عايزة مقالة ثانية وأكثر نتكلم فيها ان شاء الله لاحقا , صدقونى لو طبقنا هذه المعايير موش هنلاقى حد ينطبق عليه هذه المواصفات بعد انسحاب الدكتور البرادعى سوى ابن مصر المناضل الدكتور \ عبد المنعم أبو الفتوح . وده موش هيحصل إلا على جثة المجلس العسكرى ودا اللى لازم نفكر فيه الان . قبل ما يفوت الأوان .
· مش لاقى حاجة اعملها سوى أن اتوجه الى الله بالدعاء " اللهم ولى أمورنا خيارنا ولا تولى أمورنا شرارنا – اللهم ارزقهم البطانة الصالحة الناصحة – اللهم من أراد بمصر خيرا فوفقه – ومن أراد بها سوءا أو شرا فرد كيده الى نحره وأرنا فيه عجائب قدرتك .
اللهم آمين
<!-- [endif] -->
ساحة النقاش