يوم جميل صاحي نشيط ومستمتع جدا بيومي ودا على غير العادة فقررت اعمل حملة مع نفسي واسميه اليوم العالمي للتفائل وهدف اليوم دا مرور 24 ساعه من التفائل المستمر بدون انقطاع
بسم الله وعلى بركة الله غسلت وشي وصليت مع وجود ابتسامه ساطعه على وجهي فى بداية اليوم، نقيت اجمل لبس عندي مع برفن حلو اوي ونزلت الشارع ونازل وابتسامتي لا تفارقني
وانا نازل من البيت التشيرت بتاعي الجديد اللى لسه لابسه اتوسخ من شويه تراب كانوا على تربزين السلم ومع ذلك قولت الحمد لله وفضلت متفائل وابتسامتي على وجهي
كملت طريقي ولاقيت عم ابراهيم جارنا صبحيت عليه بس لاقيته مضايق عشان عربيته عطلانه ساعدته فى زقها واشتغلت الحمد لله ، عم ابراهيم شكرني وانا انبسط ومشيت
ولسه ابتسامتي على وجهي وانا ماشي شويه كمان وقفتني الست ام حسين وقالتلي عايزه خمسه ارغفه برغم ان رايح مشوار وبرغم ان لبس يعنى ما تبقي منوا لسه جديد الا انه ابتسامتي وقولي نعم كان ردي لام حسين وجبتلها عيش واديتهولها وكانت سعيده وانا كنت سعيد وسلمت عليها ومشيت وابتسامتي على وجهي ومشيت
وانا ماشي مختش بالي ورجلي نزلت في ميه لسه كنت هضايق واتنرفز افتكر ان انهارده يوم التفائل وكله خير فقولت لنفسي حصل خير وللاسف وصلت مشوار متاخر فدخلت بابتسامه مع اعتذار والحمد لله اتقبل اعتذاري وخلصت مشوار ومشيت ولسه التفائل مليني
قبلت عسكري مرور بيكلم نفسه فميلت عليه قولتلوا سيبها ع الله يا عم فبص ليا وضحك وقالي ونعم بالله تسلم يا باشا
وشويه ووقفت تاكسي وركبت فيه الصراحة كان السائق رغاي بطريقه فظيعه لكن افتكرت ان انهارده متفائل وكله خير ولسه الابتسامه موجوده ولذلك وانا نازل من التكست لاقيت السائق بيقولي فى رعايه الله يا باشا يوم سعيد باذن الله، انبسط اوي وروحت البيت وانا فرحان.
من سعتها عرفت قيمة قول رسول الله صلَ الله عليه وسلم عندما قال " تفائلوا بالخير تجدوه " برغم ان مقالتي مش كبيرة اوي الا انى متفائل خير ان ممكن تسعد اخرين ويستفاد منها اخرين :)
