واويلاه على المظلوم واويلاه على المظلوم
*****
وجهي راح اوجهه للمرمي على وجهه
واصرخ هاجمونه الكوم ياخوية افزعلنه وكوم
**
من طحت من ظهر مهرك وشيبك يقطر دمه
كزبرت كاع المنية واكفهر وجه السمه
الدنيا ساحت الشمس طاحت الحور ناحت
كلهه صاحت ويه صيحة فاطمة
يالبست لهاتك كوم انظر خواتك
من خيمة لخيمة تحوم ياخوية افزعلنه وكوم
**
اصعد على التل واطيحن وانهض وارجع اطيح
محشرج ومبحوح صوتي بعد مابيه اصيح
عكب اخوتي راح صوتي اوفات فوتي
ردت موتي ولا اشوفنك ذبيح
من عالتل انظرك طايح متحرك
وانخاك بقلب مالوم ياخوية افزعلنه وكوم
***
الخيل من غارت علينة وجازت حدود الطنب
مارعوا حرمة حريمك خلاف عادات العرب
لوعونه روعونه مارعونه
وين اخونه ما فزع النه شعجب
ما تقبل حميتك لو داسوا ثنيتك
وانت الصلدم الجيدوم ياخوية افزعلنه وكوم
***
طرن الهيمة بناتك وهامن بروع القلب
الما تموت بسحك حافر تموت تالي من الرعب
الخيل تلكد علينة وتهد
وين نقصد المن نصد
للمفر ما ظل درب
صاحتلك رقية كوم الحك عليه
نادت بسمك ام جلثوم ياخوية افزعلنه وكوم
***
