على جروح القصيدة شفت صورة حميدة
طفلة وتنتظر يرجع ابوها ما تدري بسهم فكده رموها
**
على عيون الطفل نقره مصابه ولهفته وحزنه
واذا غاب الابو عنه يظل لاحضانه يتمنى
مثل حالة حميدة يصير تنام وتصحى بالونه
تظل عيونها تسأل ولا يحصل خبر منه
دمع طفله غريبة هوى بليل المصيبة
ضلت عالدرب تصفك بديها تتأمل بعد مسلم يجيها
***
من سمعوا خبر مسلم بني هاشم اجوا يمها
يسألوها على حالتها اهلها وحسوا بهمها
صغيرة وباليتم حست راحت ركضت لعمها
يعمي حسين جاوبني يكلها ودمعته يضمها
علامج يالحنينة اشوفنج حزينة
من جفك مسح راسي بحنانه يعني تيتمت والخوف اجانه
***
من تنظر على الاطفال ينشاف الدمع بيها
كلمن يم ابو كاعد وابوها ما يمر بيها
لو شافت طفل يضحك تهل موجة بواجيها
يبوية بهالارض طفلة عجب تمشي وتخليها
اضن جيتك بعيدة اظل بعدك وحيدة
ما ريد العمر بعدك يغالي ساكن بالجرح دوم على بالي
***
صعب يتعوض الوالد خيمة وحارس تحسبه
واصعب ما تشوفه العين طفل يتيتم بغربة
يا حسرة حميدة عليك يمسلم فركتك صعبة
عين الايست منك وعين على الدرب تغفة
تهل دمع الهظيمة صعب حال اليتيمة
باجر لو مشوا عنهه الهواشم تمشي على الهزل وية الفواطم
