ينحر حسين راس حسين وينه تصيح جروحي
يكلي بالعوالي شايلينة يزينب نوحي
النحر سكته يحاجي اخته يزينب نوحي
**
المهر يحسين لمن جاني خالي اجيت من الخيم اركض يغالي
لذت بخيالي لا يظهر خيالي على التل ذكرت عزي ودلالي
اجيت لمصرعك وبمصرعك ريت تموت عيوني
يبو السجاد بعيونك تمنيت تشوف متوني
السبط شفته يحاجي اخته يزينب نوحي
**
ينحره من وكع من فوك مهره انذبح عطشان لو رووه قطره
يكلي من الكفا كطعوه نحره تشوفين برقبته اثنعش طبره
يزينب سهم المثلث اويلاه جرح ويضهده
السهم من ظهره جره وطلع وياه ثلث من جبده
سمعت ونته يحاجي اخته يزينب نوحي
**
شحجيلج يزينب والحجي هواي عشر خياله كام تدوس فوكاي
ضلوعي تطشرت بالكاع واعضاي يزينب يا غريبة سلبوا ارداي
خلوا جسمي عاري والرمل حار يجوي بنحري
حتى الخيل كامت تبجي للصار تدوس بصدري
على نايبته يحاجي اخته يزينب نوحي
**
سمعت صوتج بتل الزينبيه ماظلت خيم للفاطمية
من قلتيلي سلبوهه رقية زحف جيت على رمل الغاضرية
حرك كلبي يزينب حرك الخيام حرمنه بحيرة
واسمع صوت اراملنه والايتام يراعي الغيرة
اخو فقدته يحاجي اخته يزينب نوحي
**
يزينب قلبي راح يظل عليكم راسي وياكم يروح بسبيكم
الله يعينه من يسمع بجيكم وانتوا على الهزل مجتوفة اديكم
ما وصيج زينب لا تنوحين ارحمي بحالي
انتي الغالية وعليه تدرين دمعج غالي
على عايلته يحاجي اخته يزينب نوحي
**
