هل محرم والعرش اعلن عزاء
ونادى جبريل بحزن يا كربلاء
تبجي ودموعك دمه
وتندب أمك فاطمه. يابوصالح
شهر آهات وحزن
بي سياط وبي متن. بالغاضرية
بي بواجي وبي دمع
چنه محسن والضلع. وحال الزجيه
والعريس وشمعته
والدموم الحنته. وسهم المنية
وبي تراجي اسلبن
وطفله حزنانه وتون. آه يارقيه
وانت تذكرها المصايب والبلا
وتبجي حال ايتام ظلت بالفله
وتدعي يارب السما
وتندب أمك فاطمة. يابوصالح
طف بواجي وفاجعه
والكفل والمشرعه. تكول الرواية
جربه بالطف ونهر
وعم يسمونه الكمر. وجفوفه آيه
والعقيله تيسرت
عالجمر يوم المشت. وية السبايا
يامصايب هالدرب
كعبه عثرت عالترب. احتركت عباية
عالكفل صاحت عقيلة حيدرة
شفت خدر الله احتركت فوك الثرى
حال عمتك تفهمه
وتندب امك فاطمة. يابوصالح
ام تنوح ويالمهد
تنادي يايمة الوالد. هالدر حليبي
صورتك يبني البقت
دمعه بعيوني العمت. شهكة نحيبي
يادللولك حزن
جمرة ظلت بالجفن. ناري ولهيبي
كلبي مايحمل الم
وردة يذبحها السهم. نحرك حبيبي
يمه ابوك حسين من رد للخيم
وانته بيده ونابت بنحرك سهم
طفل مات من الضما
وتندب أمك فاطمة. يابوصالح
سكنه ظلت عالوعد
راحت تحاجي العمد. وين الكفلني
من جرحته بهامته
وسفه صاحت جربته. جي ماروتني
راح اروح المصرعه
وابجي يم المشرعة. واشكيله حزني
ارد اكله مروتك
خدري نار بغيبتك. جمر وحركني
وركضت عطشانه والنار بكفاي
من التفت الكه الشمر يركض وراي
وحته حيدر شتمه
وتندب أمك فاطمة. يابوصالح
شلون حال اخت الولي
الفاركت غيرة علي. وآية خدرها
من بعد خدر الكفل
عمر يكضي عالهزل. آه ياصبرها
بعده وسفه تيسرت
وهي عالناكه وبجت. بس ماحضرها
بعد ماتحمل صبر
وهي تمشي عالجمر. آخر عمرها
والعمر فوك الهزل يخلص عجيبة
واسمي جان ام الخدر صرت الغريبة
وليلي ابد مانايمة
وتندب أمك فاطمة. يابوصالح
