ليلي ما أنامه لو يحل ظلامه

أذكُر الغوالي ابوحشة الليالي

****************

آنه زينب وإستمع لاحزاني ياليل

آنه بعيوني الشفت من هجمت الخيل

عادت ايام الحزن والحسره والويل

اليوم ذكراها العزيزه الهدّت الحيل

عوِّدت عليّه فاطمه الزجيّه

العاشت ابخيالي بوحشة الليالي

*******************

آنه ياليل الشفت من طاحت امي

ابعصرت الباب وضلع من عدها مدمي

وآنه من هم البتول اورثت همّي

اتذكرتها والجنين اكَبالي مرمي

اتذكّرِتْ وضِعها ومحسن وضلعها

مَرَتْ اعلى بالي بوحشة الليالي

*****************

آه ياليل ابخيامي من شفت نار

اتذكَرِت اُمي الزجية وحَرْكت الدار

وسهم المثلث اشوفه بعيني بسمار

ودم ضلع اُمي بخيالي باقي تِذكار

والضلع اذُكره وبدليلي حسره

وآنه هذا حالي بوحشة الليالي

******************

والله ياليل السياط الالمتني

ذكريات وعادت اتمُر اعلى متني

شفت بعيوني الزجيه كلِمَتني

اتكَلِي والله امصيبتج يُمّه اهضُمَتني

اتْحمّلِي يزينب متني هَم تعذّب

اتذكّرِي الجرالي بوحشة الليالي

**********************

تدري ياليل اشوكت يهدأ ونيني

حين اتواره ابلحد يسْكِنْ حنيني

اهوايه مرّت صور ياليل اعلى عيني

مانسيت الزهره من صاحت جنيني

بالكَلب عذابه محسن ومُصابه

نادتك يغالي بوحشة الليالي

*********************

كَلبي ياليل العزيزه اشما ذِكَرْها

يحنْ وأتْذَكر محاجيها وصُوَرها

عيني ماتُغفه ويعاشِرها سهرها

شلون واُمي تنام ياليل ابكَبرها

ياكَلب يكابر واُمي بالمقابر

بس دمع بُكَالي بوحشة الليالي

*******************