وحيده إو أهلي عافوني == حزينه إو تجري إعيوني
عليله إو هل غدرني البين == بعد ما شوف أبوي إحسين
وحيده إو أهلي عافوني
ــــــــــــــــــــــــــــــــــــــــــــــــــ ـــــــــــــــ
يبويه إحسين ما أكدر أظل بالدار == وإرسومك تغيب إو تختفي الأقمار
بعد ماشوف زينب عَمْتي يامغوار == بعد ما شوف أخواني يبو الأحرار
أظل وَيْ همّي حيرانه == أنوح إعليك ولهانه
مشه ضعن الأهل هالحين == بعد ما شوف أبوي إحسين
وحيده إو أهلي عافوني
ـــــــ
أوَدّعهُم هلي هاليوم مالومه == وأشوفن عَمْتي زينب تبجي مهمومه
وأشوفن عمّي العباس وإعلومه == كلت طلعة ضعنهم طلعه محسومه
ساعه إو ما بعد أنظر == أي شي إمن الضعن يعبر
بقيت آني أدير العين == بعد ما شوف أبوي إحسين
وحيده إو أهلي عافوني
ــــــــ
ظلّيت أبوسط آلامي والحسرات == أنظر للمكان البي تشع ضويات
مكان اليحوي رسم إحسين والآيات == على عيني تمر إرسوم أبو الطيبات
وأشوفه جالس إكبالي == يسألني على حالي
وأفز من شوفة الطيبين == بعد ما شوف أبوي إحسين
وحيده إو أهلي عافوني
ـــــ
تشب بيّه غدت نيران لهّابه == صرت مثل المُحب لو فارق أحبابه
معذور الأبو مو عنده أسبابه == نساني وإنشغل مهموم بمصابه
نسوني كُل هلي إبهمّي == مجالسهم بقت يمّي
وأدير العين مَدْري وين == بعد ما شوف أبوي إحسين
وحيده إو أهلي عافوني
ــــــ
شفت طير إبحزن واكف على داري == يصيح إبصوت والمدمع دمه جاري
يابنت الأكارم هاذي أخباري == أبو اليمّه غده إموذّر علت ناري
أبو فاضل وكع ظامي == علي الأكبر مضه السامي
مُضه حلمي الحلمته إسنين == بعد ما شوف أبوي إحسين
وحيده إو أهلي عافوني
