دمعة وفه بعيونه جاسم الليله
وبكربله يزفونه جاسم الليله
طلع شباب من الخيم كومي يزينب هلهلي
انتظر هاللحظه من مده طويله
لزفة العريس احسب ليله ليله
خلها تحضر عمته وخل تندعيله
هلهليله يالعقيله هلهليله
مثل البدر بطلوعه جاسم الليله
بالطف علكنه اشموعه جاسم الليله
طلع شباب من الخيم كومي يزينب هلهلي
بهيجي ليله الوالده تنسه حزنها
من الفرح هالليله ما يغمض جفنها
حنه وشموع الفواطم حضرنها
تريد رمله تفرح بزفة ابنها
عريس ابنها اتشوفه جاسم الليله
وكامت تحني اجفوفه جاسم الليله
طلع شباب من الخيم كومي يزينب هلهلي
والده بلهفة فرح كامت تضمه
حايره شتهدي دمع لو تهدي بسمه
تكلك مبروك العرس جاسم ييمه
ويوم المبارك اشوف ابنك واشمه
فرحانه يم اوليدها جاسم الليله
غالي ويقبّل بيدها جاسم الليله
طلع شباب من الخيم كومي يزينب هلهلي
تكله يبني من الحسن عندك وصيه
زفتك للمعركه بهاي المسيه
عمرك اتقدمه لغريب الغاضريه
وانه احني اجفوفك بدم المنيه
لازم يوفي اوعوده جاسم الليله
اينفذ وصية عوده جاسم الليله
طلع شباب من الخيم كومي يزينب هلهلي
اتبدلت ليلة زفافك بالمآسي
راح ازفك للاجل يا اغله ناسي
يمه توديعك تره شيبلي راسي
قاسي وياي الزمان بطبعه قاسي
بالطف يقدم روحه جاسم الليله
ولا ماتطيب جروحه جاسم الليله
طلع شباب من الخيم كومي يزينب هلهلي
وداعة الله يا اعز من عمري انته
والله يا يمه احس ظهري كسرته
انت بس هالواحد وبالطف فكدته
المثلي حكها من تموت وتبجي سكته
هالواحد وضحيته جاسم الليله
بدم هامته حنيته جاسم الليله
طلع شباب من الخيم كومي يزينب هلهلي
