لا تطفوها شمعة زفاف وليدي
بخيمته انخليها لحد يطفيها
شمعة زفاف وليدي
والده وعندي حلم تتمنه عيني اتشاهده
لجاسم احضر زفته وافرح مثل كل والده
ما دريت بكربله جاسم يوذرونه العده
عمه جابه لخيمته يم جسم الاكبر مدده
هامته طبروها وللاسف طفوها
شمعة زفاف وليدي
كلبي يحجي بلوعته من يستمع حجي الكلب
كاعده اباب الخيم مشبوحه عيني اعله الدرب
لا تطفون الشمع ساعه ويرد من الحرب
اي رجع جاسم الي متحني من دمه اليصب
كلبي صاح بشوكه خل تظل معلوكه
شمعة زفاف وليدي
لا تكلولي انذبح ووليدي ما يرجع الي
كولو عريسج رجع كومي يرمله هلهلي
كومي حضري حنته وللغالي كومي استقبلي
يوم عرسه انحصنه بالله ومحمد علي
بالفرح ندعيله وخل تشع هالليله
شمعة زفاف وليدي
رمله صاحت يالزلم لحد يظل بخيمته
ارد اذب حجابي واصبغ شيبي من دم هامته
مدري ابجي مدري افرح مدري احضر حنته
ابني مو ميت تره ساعه ويكوم لزفته
ارد اشم الغالي وبيدي هاي تلالي
شمعة زفاف وليدي
امه واعرف لونخيته ما يردلي نخوتي
يمه فك عيني يجاسم لا تخيب رجوتي
ها يمعصب راسي انهض بيدك امسح دمعتي
اني ذاخرتك لشيبي وانته التلم كبرتي
انت عيني وشوفي ولازمه بجفوفي
شمعة زفاف وليدي
يمه ايس لو تردلي أسأل وماكو جواب
يمه بس حاجيني مره كلبي ما يحمل عذاب
يمه كوم ورد لهفتي يابدر عن ليلي غاب
يمه راح امشي يسيره وانته تبقه عالتراب
لليسر يوليدي راح اروح وبيدي
شمعة زفاف وليدي
