آنه رايح بعد ما تشوفج عيني
يمه مثلج تره وداعج يبجيني
موقفي صعب والدي غرب
ليش هالدنيه بعد ما بيها رحمه
تكصد المجروح وبجرحه تلجمه
طبع اليسافر يجي وايوّدع امه
انه رايح يمه خل عطرج أشمه
ايعينج الله على هالزمان وضيمه
يمه يمكن بعد ما ارد للـخيمه
ماشي للحرب والدي بغرب
يمه كافي يكطع بكلبـــــي نحيبج
اغيابي يصعب لكن الاصعب مغيبج
جنت اتوقع اظل ليام شيـبــــج
ما حصل يالوالده وعذري حبيبج
اتوقعت ابقه وياج لخــير ايامج
من تكبرين اصيرن اقل خدامج
ذايب الكلب والدي بغرب
انه عكس الــــوادم بهاي القضيه
الج ما راح احضر بوكت المنيه
رايحه تظليـــن مشتـــــــاكه اليه
من البواجي يعمن عيونــج عليه
يمه حزنج يظل جمره بين اظلوعي
حته من انزل بكبري تجري دموعي
لغربتج تصب والدي بغرب
من اروحن للحرب ياقُرة الـعين
ينطبر راسي ييمه لنُصرة الدين
للخيم لمن يردني والدي حسـين
اوصيّتي يالوالده اعليه لتبجــين
من تنوحين يـــيمه تفز جـــروحي
لخاطري يالحبيه اعله كيفج نوحي
جسمي منخضب والدي بغرب
بعينج انظر جم رزيه وجم مصيبه
من تشوفيــــن الابو بشيبه خضيبه
ام الاكبر هــــذا اســــمج يالحبيبه
باجر ينا دوج يــــــــا ليله الغريبه
يمه هاي الخيم فــــــــوكج يحركوها
ويمه بالسوط تره متونج ايضربوها
امي تنضرب والدي بغرب
عالرمح راسي ييمه تشاهديني
يالحنينه وبالدموع اتـــــعاتبيني
من اشوفنج سبيه ايشب حنيني
سامحي الوالد ييمه وسامحيني
اسمع الحومه بسمي صداها ينادي
تنتظر جيـّــتي ســــاحة استشهادي
ابقه عالترب والدي بغرب
