مريم إتهز الجذع ينزل رطب
وآنه هزّيت المهد شفت العجب
ما نزل بس الدمه بالغاضرية
يبني مذبوح وشلت راسك بإيديّة
إرحم أمّك إرحم أمّك
*******************
صورتك شالتهه عيني وفرحة صارت تنرسم
وبإسمك يردّد لساني وألهج آنه بهالإسم
ياحلم عمري وحياتي وعاشت أمّك هالحلم
يكبر إبني وهم أشوفه يمشي ما بين الزلم
لن أفز مرعوبة بعيوني صور
ودمعي يرسم بيهه بس سهم ونحر
لن رسملي صورتك سهم المنية
يبني مذبوح وشلت راسك بإيديّة
إرحم أمّك إرحم أمّك
***************
للمهد من شفته خالي فارگت روحي الجسد
ومن أموتن عندي أرحم فرگتك أكلف وأشد
من يصبّرني بغيابك من تفارگ للأبد
بالدمع گضّيته ليلي أحچي وحدي وي المهد
ما تفارگني بخيالي صورتك
إتموت أمّك لحظة لو ما شافتك
لا تطوّل للمغيب إرجع إليّه
يبني مذبوح وشلت راسك بإيديّة
إرحم أمّك إرحم أمّك
****************
كون سهم الگطع نحرك صاب نحري و وذّره
وكون يبني گبل دمّك سال دمّي إعله الثره
مو جرح فرگاك يبني لحظة بعدك ما بره
ينزف بآهات صبري والگلب شيصبّره
بيا سهم دهري رماني من رحت
إرحم أمّك يا حبيبي إرجع صحت
مو غيابك بالألم غيّم عليّه
يبني مذبوح وشلت راسك بإيديّة
إرحم أمّك إرحم أمّك
****************
شوگي سهّرني ليالي وگلبي ينزف عاطفه
وجفني من ساعة غيابك للمنية وما غفه
گلبي مجروح بغيابك والجرح لا ما شفه
والجمر ساكن دليلي ما خمد يبني وطفه
لو رحت ما ريد يبني هالعمر
للممات وما طفه بگلبي الجمر
نار فگدك تستعر للموت بيّه
يبني مذبوح وشلت راسك بإيديّة
إرحم أمّك إرحم أمّك
*******************
مو غريبة لو شفتني يبني مدهوشة عقل
أحمل آلام ومآسي وفرگتك ما تنحمل
عالمهد أركض وأردّن والدمع من دم يهل
من أشوف حسين أحلم للمهد رد الطفل
أركض بلهفة وأشاهد للمهد
رجّع إبني حسين والله عالوعد
إشلون ردّك لأمّك بهاي المسية
يبني مذبوح وشلت راسك بإيديّة
إرحم أمّك إرحم أمّك
********************
أسمع لصوتك يناغي وعالمهد يبني ألتفت
أركض بلهفة وإجيتك وأعثر بدمعي وطحت
لن لگيت المهد خالي وين چا عنّي رحت
غير آهات ونوايب غير جرحي ما شفت
بلا عقل ضلّيت مشدوهة عقل
آنه جيت لكربله بحضني طفل
بيش أمشي لو رحت آنه سبية
يبني مذبوح وشلت راسك بإيديّة
إرحم أمّك إرحم أمّك
**************
أظلمت دنياي يبني وغابت وياك الشمس
وراحت آمالي وحياتي وإنتهت يبني النفس
والدمع طوفان ينزل جفني يرفض ينحبس
وحالي يوليدي تغيّر يومي ما يشبه أمس
بالأمس فرحانة نورك من سطع
اليوم أبچي نحرك بسهم إنگطع
ومن دمه لفگدك دمعتي تضل جريّة
يبني مذبوح وشلت راسك بإيديّة
إرحم أمّك إرحم أمّك
*****************