بقلم - محمد حمدى
محروس : الناس زعلانة أن الكهربا بتطفى كُل يوم ساعة،وزعلت أكتر لما بقوا ساعتَين،طب لما الساعات تزيد هيعملوا إيه ؟!
محمد : هية الساعات هتزيد ؟!
محروس : أه؛دا فيه ناس بتقترح بكده .
محمود : الناس فى دايرتى مُش عاجبها طفى النور،وبيقولوا : "الكهربا فى دول الخليج زى الكهربا فى أوروبا،والدول المُتقدمة؛مُش بتطفى خالص،والسلوك تحت الأرض مُش على عماويد زى عندنا . "
محروس : يا حاج محمود؛الدولة بتوفر الغاز،اللى بيشغل محطات الكهربا؛ علشان تصدره بره،وتزود العملة الصعبة،وكمان علشان تريح مولدات الكهربا .
محمود : مصر على بحيرات مِن الغاز؛مصر بتصدر غاز،يا محروس !
محروس : إحنا مُش عاوزين كهربا فى النهار،ياريس .
عوض : إتكلم عن دايرتك بس،يا محروس .
محروس : إنت عاوز الكهربا فى النهار ليه ؟!
محمود : أنا عندى فى الدايرة،وعند غيرى الكهربا بتطفى فى الليل !
محروس : خلاص،يا خونا،أنا عندى الحل .
عزيز : حل إيه اللى عندك ؟!
محروس : الكهربا تطفى فى النهار،ومتطفاش بالليل،إحنا عاوزين كهربا فى النهار ليه ؟ النهار منور بالنور الربانى،النهار منور بنور الشمس،يا خونا،بقى يبقى عندنا الشمس الجميلة دى،ونحتاج للكهربا !
عزيز : هية الشمس عندنا إحنا بس،الشمس عند كل الدول؟
محروس : بس مُش بالحلاوة دى .
محمد : الشمس عندنا شعرها طويل،وناعم،وعيونها سود .
عوض : الكهربا لما كانت بتطفى أيام محمد مرسى -الله يرحمه-كانت الدنيا بتقوم عليه؛كان إبراهيم عيسى،ولميس الحديدى،وعمرو أديب،وباسم يوسف،وغيرهم بيطلعوا يقطعوا فيه،بالرغم أن الكهربا كانت بتقطع كتير بفعل فاعل .
محمد : الناس زهقت خالص مِن إرتفاع الأسعار،ومُش ناقصين طفى النور كمان !
محروس : إحنا عندنا إرتفاع أسعار،دا الدولة بتدى المواطن رغيف العيش المُدعم بشلن،وبتتحمل 40قرش تقريبًا على كل رغيف،الأسعار فى مصر مرتاحة خالص،يا خونا .
عوض : إنت بتطبل،يا محروس !
محمود : مصر فيها كنوز الأرض،يا مطبلاتى !
محمد : محروس عايش فى كوكب تانى !
محروس : سجل الكلام ده فى المضبطة عندك،يا سيادة الريس؛الناس دى تبع جهات معادية .
عوض : إخرس،يا كلب .
محروس : هو كل جلسة إخرس،ياكلب،إخرس،ياكلب !
محمد : إحنا عارفين إنت بتاخد فلوس منين؛علشان تقول الكلام ده !
محروس : دا إتهام بالرشوة،يا سيادة الريس !
عوض : اللى مبوظ البلد الناس اللى أمثال محروس .
محمود : دول الخليج معندهاش خير زى مصر،وبقت زى أوروبا !
محمد : علشان مفيش فساد عندهم زى مصر .
الريس : هنحارب الفساد؛علشان نبقى زيهم .
الجميع : موافقون .
( ملحوظة : لقد كتبت تلك القصة،ونشرتها على الإنترنت،يوم الإثنين،الموافق15يناير مِن عام 2024م )
