بقلم - محمد حمدى
عبدالهادى : عاوزين نعلقوا على البرسيم،وعلى الغلة،يابا محمد .
محمد : الدُنيا مغيمة،وشكلها هتشتى،ياعبدالهادى .
عبدالهادى : طب لو مشتتشى،يابا محمد ؟
محمد : يبقى عليه العوض،ومِنه العوض،ياعبدالهادى !
عبدالهادى : يارب سد النهضة يخرب،يابا محمد !
محمد : مِن بوقك لباب السما ياعبدالهادى !
عبدالهادى : إش خلا فيه قادة سودانيين عاوزين يسدوا النيل عن مصر .
محمد : عليك نور !
عبدالهادى : الجفاف بقى زى الدور بعد ما بدأوا يشتغلوا فى سد النهضة بتاعهم !
محمد : فاكر التُرعة الجانبية اليُسرى قبل سد النهضة ؟
عبدالهادى : دا لحد ثورة 25يناير2011م،كانت خمس أيام دور،وخمسة بطالة .
محمد : طب تعالى شوف دلوقتى !
عبدالهادى : دا لُوما رِزق المسيحى بيسيبلنا البوابة شوية كان زمان الرُز باظ كُل سنة .
محمد : مفيش حل غير أننا كُلنا نكون إيد واحدة زى زمان؛علشان الأعداء بتتربص بينا زى الديابة فى كُل مكان !
عبدالهادى : عندك حق؛لازم نكون إيد واحدة،ولا ده إخوانى،ولا ده حِزب وطنى،ولا ده سيساوى !
محمد : الأثيوبين كانوا بيعملولنا ألف حِساب زمان؛علشان كُنا بنقف كُلنا وقفة رِجالة !
عبدالهادى : على فكرة الأثيوبيين كانوا عاوزين يعملوا سد النهضة ده مِن أيام جمال عبدالناصر .
محمد : جمال قال : "لو إتعمل سد هينضرب بالطيارات"،والسادات قال نفس الكلام،ومُبارك قال لوزير الدِفاع :"إضرب السد فورًا مِن غير ما تاخد إذنى،ولا إذن مجلس الشعب..."؛علشان كُنا رجالة،وواقفين ضد أعداء الوطن وقفة رجالة !
عبدالهادى : الأعداء بتقول : "إن نهر النيل بالنسبة لمصر شريان الحياة "،علشان كده عملوا سد النهضة اللى هيأثر على حصة مصر بشكل ملحوظ .
محمد : ولا هنعرف نزرع رز،ولا قصب فى المُستقبل .
عبدالهادى : وإستصلاح الأراضى هيبقى صعب؛لقلة المية؛سد النهضة هيخرب بيتنا،يابا محمد !
(ملحوظة : لقد كتبت تلك القصة،ونشرتها على الإنترنت،يوم السبت الموافق 16يناير مِن عام 2016م )
😃😃😃😃