(طريق)
ماشي الطريق عَمَّال يصَفَّر
حاطط إيديه ف جيوب مخاصمة الحب ومخاصمة الحياة
كانت وشوش الناس قديمة متَرَّبة شبه الشوارع والبيوت
سوَّاق بيلعن سلسفيل أُمّ اللي عَلِّمكو السواقة
عَيِّل صُغيَّر ساقطة من عينه البراءة
كَسَّر إزاز الحلم بشوية ظلط
لما اكتشف إن الطريق الصح متلون غلط
راجل عجوز طعَنه الزمن
شاخت عصايته..وسلِّمت ليه بالعمى
لما بيبدأ ف الجَريدة..يطُلّ بعيون البلد
بنت وولد
ماشين على حد السما
شابكين قلوبهم بحكايات
وفيونكة حمرا وشخبطات
وأماني مش شايفين وجعها لما تتحول فتات
واحد عبيط
عمال يتف علىاللي ماشي
كأنه بيقول للجميع
فوقوا بقى..بجنوني صِرت أنا الأمير
ضحكوا عليكم بالعقول
وانتوا أغبى من الحمير
دلقت عواطف فوقه جردل معتبر
مية غسيل وسخة..
وضحكت..واختفت
رجع الطريق تاني يصفر
يعدل الجُمَل اللي لخبطها البشر
لما بيبقى كل دا خيط مبتدأ
بيبان خبر
ساحة النقاش