دُرج السنين شايل كتير ..
صورة بطاقة
و كام جواب ..
وردة قديمة مطبّقة
جُوّة الكتاب .....
ألبوم صُور
شِلّة صُحاب ..
و إتفَرّقِت بيها السكك
و الحبل ساب
دُرج السنين مليان عذاب ..
دفتر قديم
و حُبوب صُداع ..
مفتاح لباب بيتنا إللي كان
مفتوح مشاع ..
وصل إستلام
تمن الضَياع ..
و فاتورَة فيها إللي إشتَرى
ويّا إللي باع ..
دُرج السنين في الزحمة ضاع ..
شخابيط قلم
قصاقيص ورق ..
حرفين و سهم بيحضنوا
قلب إتحرق ..
محبس دهب
دِبلَة و حَلق ..
مات العِيار لمّا الطريق
بينا إفتَرَق ..
دُرج السنين عُمرُه إتسرق
ساحة النقاش