الضلمة أحلى وانت مش موجود
_____________________
الصبح مش دايماً إمام الشقشقة
الصبح ينفع رمز للخوف والشقا
شغلانة بتحبك ونفسها فيك
وانت شايفها اختك وراضعة معاك
بنوتة بتعاتبك من الشباك
علشان نسيتها فـــ حلمكم ع البحر
الصبح : ترويع الرؤى جمب انحسار السِّحر
.........................
مش كل من نادي عليك عايزك
ولا كل شمس عيونها ضي ونور
تفرق في أيه طيارة من نيزك ؟
أهي كلها اصطدامات ونار وكسور
...............................
الصبح قسط بتدفعه الأزهار
علشان يكون النص أسهل في القراءة
أيقونة الأمل المريب / المُفتَعل
في ظروف بتخرج بدري تصطاد البراءة
مين اللي قال ان الضلام أوحش ؟
مين اللي مضّي الشَِعر علي شيك الدلالة ؟
العتمة : فسحة من عيون الناس
العتمة : حالة حنينة بين اللي ممكن واستحالة .
.......................
الصبح مش هو الصباح يا عم
الصبح ما بيتشافشي دا بيتشم
إنت اللي مجروح ولا انا اللي جريح ؟
ولا احنا أصلا مهرجان للدّم ؟
........................
" يا حلو صبّح يا حلو طُل "
علي حد غيري أنا مش دُهلّ
وهاتلي شمس أطيب شوية
وزمزمية شروق وفًلّ
وبنت زرقا / سماوات نبيتي / عايز ابني بيتي / كدة جنب خيمة / فوق كتف غيمة / تنزل تزلزل في أي ذٌلّ
..............................
لو تشرقي لي بعد نص الليل
مش كنت اجيب الديب وإيدي فــ إيدُه
يا كل حاجة مصممة ع الدَّيل
طعم اللقا يمسح دلع مواعيدُه
_____________________
#أغاريد الجيل الجديد #عبدالله صبري
https://www.facebook.com/agarridgeneration
ساحة النقاش